¹Lakini nasema ya kuwa mrithi, wakati wote awapo mtoto, hana tofauti na mtumwa, ingawa ni bwana wa yote;

²bali yuko chini ya mawakili na watunzaji, hadi wakati uliokwisha kuamriwa na baba.

³Kadhalika na sisi, tulipokuwa watoto, tulikuwa tukitumikishwa na kawaida za kwanza za dunia.[#Gal 3:23; 5:1; Kol 2:20; #4:3 Katika Kigiriki ni ‘Kawaida za kwanza za dunia’.]

⁴Lakini ulipowadia utimilifu wa wakati, Mungu alimtuma Mwanawe ambaye amezaliwa na mwanamke, amezaliwa chini ya sheria,[#Efe 1:10]

⁵kusudi awakomboe hao waliokuwa chini ya sheria, ili sisi tupate kupokea hali ya kuwa wana.[#Rum 8:15-17; #Gal 3:13,26]

⁶Na kwa kuwa ninyi mmekuwa wana, Mungu alimtuma Roho wa Mwanawe mioyoni mwetu, aliaye, Aba, yaani, Baba.[#Rum 8:15]

⁷Kama ni hivyo, wewe si mtumwa tena bali u mwana; na kama u mwana, basi, u mrithi kwa Mungu.[#Gal 3:29; Rum 8:16,17]

Paulo awashutumu Wagalatia

⁸Lakini wakati ule, kwa kuwa hamkumjua Mungu, mliwatumikia wao ambao kwa asili si miungu.

⁹Bali sasa mkiisha kumjua Mungu, au zaidi kujulikana na Mungu, kwa nini kuyarejea tena mafundisho ya kwanza yaliyo manyonge, yenye upungufu, ambayo mnataka kuyatumikia tena?

¹⁰Mnashika siku, na miezi, na nyakati, na miaka.[#Rum 14:5; Kol 2:16]

¹¹Nawachelea, isiwe labda nimejitaabisha bure kwa ajili yenu.[#2 Yoh 1:8]

¹²Ndugu zangu, nawasihi, iweni kama mimi, maana mimi ni kama ninyi. Hamkunidhulumu kwa lolote.[#2 Kor 2:5]

¹³Lakini mwajua ya kuwa niliwahubiria Injili mara ya kwanza kwa sababu ya udhaifu wa mwili;[#Mdo 16:6; 1 Kor 2:3]

¹⁴na jaribu lililowapata katika mwili wangu hamkulidharau wala kulikataa, bali mlinipokea kama malaika wa Mungu, kama Kristo Yesu.[#Mdo 14:11,12]

¹⁵Kuko wapi, basi, kule kujiita heri? Maana nawashuhudu kwamba, kama ingaliwezekana, mngaling'oa macho yenu, mkanipa mimi.

¹⁶Je! Nimekuwa adui yenu kwa sababu nawaambia yaliyo kweli?[#Amo 5:10]

¹⁷Hao wana shauku nanyi, lakini si kwa nia nzuri, bali wanataka kuwafungia nje, ili kwamba ninyi mwaonee wao shauku.[#Gal 1:7]

¹⁸Navyo ni vizuri kuonewa shauku katika neno jema sikuzote, wala si wakati nikiwapo mimi pamoja nanyi tu.

¹⁹Watoto wangu wadogo, ambao nawaonea uchungu tena mpaka Kristo aumbike ndani yenu;[#1 Kor 4:15]

²⁰laiti ningekuwapo pamoja nanyi sasa, na kuigeuza sauti yangu! Maana naona shaka kwa ajili yenu.

Mfano wa Hajiri na Sara

²¹Niambieni, ninyi mnaotaka kuwa chini ya sheria, je! Hamwisikii sheria?[#Gal 3:23]

²²Kwa maana imeandikwa ya kuwa, Abrahamu alikuwa na wana wawili mmoja kwa mjakazi, na mwingine kwa mwanamke huru.[#Mwa 16:15; 21:2,9]

²³Lakini yule wa mjakazi alizaliwa kwa mwili, yule wa mwanamke huru kwa ahadi.[#Rum 9:7-9; Mwa 17:16]

²⁴Mambo haya husemwa kwa mfano; kwa maana hawa ndio kama maagano mawili, moja kutoka mlima Sinai, lizaalo kwa utumwa, ambalo ni Hajiri.[#Gal 5:1; Rum 8:15]

²⁵Maana Hajiri ni kama mlima Sinai ulioko Arabuni, umelingana na Yerusalemu wa sasa; kwa kuwa yuko utumwani pamoja na watoto wake.

²⁶Bali Yerusalemu wa juu ni muungwana, naye ndiye mama yetu sisi.[#Ebr 12:22]

²⁷Kwa maana imeandikwa,[#Isa 54:1]

Furahi, wewe uliye tasa, usiyezaa;

Paza sauti, ulie, wewe usiye na uchungu;

Maana watoto wake aliyeachwa pekee ni wengi

Kuliko wa huyo aliye na mume.

²⁸Basi, ndugu zangu, kama Isaka sisi tu watoto wa ahadi.

²⁹Lakini kama vile siku zile yule aliyezaliwa kwa mwili alivyomwudhi yule aliyezaliwa kwa Roho, ndivyo ilivyo na sasa.[#Mwa 21:9]

³⁰Lakini lasemaje andiko? Mfukuze mjakazi na mwanawe, kwa maana mwana wa mjakazi hatarithi kabisa pamoja na mwana wa muungwana.[#Mwa 21:10,12; Yn 8:35]

³¹Kwa hiyo, ndugu zangu, sisi si watoto wa mjakazi, bali tu watoto wa huyo aliye muungwana.[#Gal 3:29]