Huduma impendezayo Mungu

¹Upendano wa ndugu na udumu.[#Yn 13:34; 2 Pet 1:7]

²Msisahau kuwafadhili wageni; maana kwa njia hii wengine wamewakaribisha malaika pasipo kujua.[#Mwa 18:1-8; 19:1-3; Rum 12:13; 1 Pet 4:9]

³Wakumbukeni hao waliofungwa kana kwamba mmefungwa pamoja nao; na hao wanaodhulumiwa, kwa vile ninyi nanyi mlivyo katika mwili.[#Mt 25:36]

⁴Ndoa na iheshimiwe na watu wote, na malazi yawe safi; kwa maana waasherati na wazinzi Mungu atawahukumia adhabu.[#Gal 5:19,21; Efe 5:5]

⁵Msiwe na tabia ya kupenda fedha; muwe radhi na vitu mlivyo navyo; kwa kuwa yeye mwenyewe amesema, Sitakupungukia kamwe, wala sitakuacha.[#Kum 31:6,8; Yos 1:5; 1 Tim 6:6]

⁶Hata tunathubutu kusema,[#Zab 118:6]

Bwana ndiye anisaidiaye, sitaogopa;

Mwanadamu atanitenda nini?

⁷Wakumbukeni wale waliokuwa wakiwaongoza, waliowaambia neno la Mungu; tena, kwa kuuchunguza sana mwisho wa mwenendo wao, iigeni imani yao.[#1 Kor 4:16]

⁸Yesu Kristo ni yeye yule, jana na leo na hata milele.[#1 Kor 3:11; Ufu 1:17]

⁹Msichukuliwe na mafundisho ya namna nyingine nyingine, na ya kigeni; maana ni vizuri moyo ufanywe imara kwa neema, wala si kwa vyakula, ambavyo wao waliokwenda navyo hawakupata faida.[#Efe 4:14; Rum 14:17; 2 Kor 1:21]

¹⁰Tuna madhabahu ambayo wale waihudumiayo ile hema hawana ruhusa kula vitu vyake.[#Ebr 8:4,5]

¹¹Maana wanyama wale ambao damu yao huletwa ndani ya patakatifu na kuhani mkuu kwa ajili ya dhambi, viwiliwili vyao huteketezwa nje ya kambi.[#Law 16:27]

¹²Kwa ajili hii Yesu naye, ili awatakase watu kwa damu yake mwenyewe, aliteswa nje ya lango.[#Mt 21:39; Yn 9:22]

¹³Basi na tutoke tumwendee nje ya kambi, tukichukua shutuma yake.[#Ebr 11:26; 12:2]

¹⁴Maana hapa hatuna mji udumuo, bali twautafuta ule ujao.[#Ebr 11:10; 12:22]

¹⁵Basi, kwa njia yake yeye, na tumpe Mungu dhabihu ya sifa daima, yaani, tunda la midomo iliungamalo jina lake.[#Law 7:12; 2 Nya 29:31; Zab 50:14,23; Isa 57:19; Hos 14:2]

¹⁶Lakini msisahau kutenda mema na kushirikiana; maana sadaka kama hizi ndizo zimpendezazo Mungu.[#Flp 4:18]

¹⁷Watiini viongozi wenu, na kuwanyenyekea; maana wao wanakesha kwa ajili ya roho zenu, kama watu watakaotoa hesabu, ili kwamba wafanye hivyo kwa furaha wala si kwa huzuni; maana haitawafaa ninyi.[#1 The 5:12; Eze 3:17]

¹⁸Tuombeeni; maana tunaamini kwamba tuna dhamiri njema, tukitaka kuwa na mwenendo mwema katika mambo yote.[#2 Kor 1:12; Mdo 24:16]

¹⁹Nami nawasihi zaidi sana kufanya hayo ili nirudishwe kwenu upesi.

Baraka

²⁰Basi, Mungu wa amani aliyemleta tena kutoka kwa wafu Mchungaji Mkuu wa kondoo, kwa damu ya agano la milele, yeye Bwana wetu Yesu,[#Isa 63:11; 55:3; Zek 9:11; Yer 32:40; Eze 37:26; Yn 10:12; 1 Pet 2:25]

²¹awafanye ninyi kuwa wakamilifu katika kila tendo jema, mpate kuyafanya mapenzi yake, naye akifanya ndani yetu lipendezalo mbele zake, kwa Yesu Kristo; utukufu una yeye milele na milele. Amina.

Mahimizo ya mwisho na salamu

²²Lakini nawasihi, ndugu, mchukuliane na neno hili lenye maonyo maana nimewaandikia kwa maneno machache.[#Yak 1:21]

²³Jueni ya kuwa ndugu yetu Timotheo amekwisha kufunguliwa; ambaye, akija upesi, nitaonana nanyi pamoja naye.

²⁴Wasalimuni viongozi wenu wote, na watakatifu wote; hao walio wa Italia wanawasalimu.

²⁵Neema na iwe nanyi nyote.