Kifo cha Lazaro

¹Basi mtu mmoja alikuwa mgonjwa, Lazaro wa Bethania, mwenyeji wa mji wa Mariamu na Martha, dada yake.[#Lk 10:38-39]

²Ndiye Mariamu yule aliyempaka Bwana marhamu, akamfuta miguu kwa nywele zake, ambaye Lazaro nduguye alikuwa mgonjwa.[#Yn 12:3]

³Basi wale dada wakatuma ujumbe kwake wakisema, Bwana, yeye umpendaye ni mgonjwa.

⁴Naye Yesu aliposikia, alisema, Ugonjwa huu si wa mauti, bali ni kwa ajili ya utukufu wa Mungu, ili Mwana wa Mungu atukuzwe kwa huo.[#Yn 9:3]

⁵Naye Yesu alimpenda Martha na dada yake na Lazaro.

⁶Basi aliposikia ya kwamba ni mgonjwa, bado alikaa siku mbili pale pale alipokuwapo.

⁷Kisha, baada ya hayo, akawaambia wanafunzi wake, Twendeni Yudea tena.

⁸Wale wanafunzi wakamwambia, Rabi, juzi juzi tu Wayahudi walikuwa wakitafuta kukupiga kwa mawe, nawe unakwenda huko tena?[#Kum 15:11; Yn 8:59; 10:31]

⁹Yesu akajibu, Je! Saa za mchana si kumi na mbili? Mtu akienda mchana hajikwai; kwa sababu aiona nuru ya ulimwengu huu.[#Yn 9:4,5; 1 Yoh 2:10]

¹⁰Bali akienda usiku hujikwaa; kwa sababu nuru haimo ndani yake.[#Yn 12:35; 1 Yoh 2:11]

¹¹Aliyasema hayo; kisha, baada ya hayo, akawaambia, Rafiki yetu, Lazaro, amelala; lakini ninakwenda nipate kumwamsha.[#Mt 9:24; Lk 8:52]

¹²Basi wale wanafunzi wakamwambia, Bwana, ikiwa amelala, atapona.

¹³Lakini Yesu alikuwa amenena habari ya mauti yake; nao walidhania ya kuwa ananena habari ya kulala usingizi.

¹⁴Basi hapo Yesu akawaambia waziwazi, Lazaro amekufa.

¹⁵Nami nafurahi kwa ajili yenu kwamba sikuwako huko, ili mpate kuamini; lakini na twendeni kwake.[#Zek 9:9]

¹⁶Basi Tomaso, aitwaye Pacha, akawaambia wanafunzi wenziwe, Twendeni na sisi, ili tufe pamoja naye.[#Mk 10:32; 14:31]

Yesu aliye ufufuo na uzima

¹⁷Basi Yesu alipofika, alimkuta amekwisha kuwamo kaburini yapata siku nne.

¹⁸Na Bethania ilikuwa karibu na Yerusalemu, kadiri ya maili mbili hivi;

¹⁹na watu wengi katika Wayahudi walikuwa wamekuja kwa Martha na Mariamu, ili kuwafariji kwa ajili ya ndugu yao.

²⁰Basi Martha aliposikia kwamba Yesu anakuja, alikwenda kumlaki; na Mariamu alikuwa akikaa nyumbani.

²¹Basi Martha akamwambia Yesu, Bwana, kama ungalikuwapo hapa, ndugu yangu hangalikufa.[#Yn 3:32]

²²Lakini hata sasa najua ya kuwa yoyote utakayomwomba Mungu, Mungu atakupa.

²³Yesu akamwambia, Ndugu yako atafufuka.

²⁴Martha akamwambia, Najua ya kuwa atafufuka katika ufufuo siku ya mwisho.[#Yn 5:29; 6:40; Lk 14:14]

²⁵Yesu akamwambia, Mimi ndimi huo ufufuo, na uzima. Yeye aniaminiye mimi, hata akifa, atakuwa anaishi;

²⁶naye kila aishiye na kuniamini hatakufa kabisa hata milele. Je! Unayasadiki hayo?[#Yn 5:24; 8:51]

²⁷Akamwambia, Naam, Bwana, mimi nimesadiki ya kwamba wewe ndiwe Kristo, Mwana wa Mungu, yule ajaye ulimwenguni.[#Yn 6:69]

Yesu alia

²⁸Naye alipokwisha kusema hayo, alikwenda zake; akamwita umbu lake Mariamu faraghani, akisema, Mwalimu yupo anakuita.

²⁹Naye aliposikia, aliondoka upesi, akamwendea.

³⁰Na Yesu alikuwa hajafika ndani ya kijiji; lakini alikuwa angalipo pale pale alipomlaki Martha.[#Yn 11:20]

³¹Basi wale Wayahudi waliokuwapo na Mariamu nyumbani, wakimfariji, walipomwona jinsi alivyoondoka upesi na kutoka, walimfuata; huku wakidhania ya kuwa anakwenda kaburini ili alilie huko.

³²Basi Mariamu alipofika pale alipokuwapo Yesu, na kumwona, alianguka miguuni pake, akamwambia, Bwana, kama ungalikuwapo hapa, ndugu yangu hangalikufa.[#Yn 11:21]

³³Basi Yesu alipomwona analia, na wale Wayahudi waliofuatana naye wanalia, aliugua rohoni, akafadhaika roho yake,[#Yn 13:21]

³⁴akasema, Mmemweka wapi? Wakamwambia, Bwana, njoo utazame.

³⁵Yesu akalia machozi.[#Lk 19:41]

³⁶Basi Wayahudi wakasema, Angalieni jinsi alivyompenda.

³⁷Bali wengine wao wakasema, Je! Huyu aliyemfumbua macho yule kipofu, hakuweza kumfanya na huyu asife?

Yesu amfufua Lazaro

³⁸Basi Yesu, akiwa na huzuni tena moyoni mwake, akafika kwenye kaburi. Nalo lilikuwa ni pango, na jiwe limewekwa juu yake.[#Isa 53:1; Mt 27:60]

³⁹Yesu akasema, Liondoeni jiwe. Martha, dada yake yule aliyefariki, akamwambia, Bwana, ananuka sasa; maana amekuwa maiti siku nne.[#Yn 20:1]

⁴⁰Yesu akamwambia, Mimi sikukuambia ya kwamba ukiamini utauona utukufu wa Mungu?[#Isa 6:10; Yn 4:23,25,26]

⁴¹Basi wakaliondoa lile jiwe. Yesu akainua macho yake juu, akasema, Baba, nakushukuru kwa kuwa umenisikia.

⁴²Nami nilijua ya kuwa wewe wanisikia sikuzote; lakini kwa ajili ya mkutano huu wanaohudhuria nilisema haya, ili wapate kusadiki kwamba ndiwe uliyenituma.[#Yn 12:30]

⁴³Naye akiisha kusema hayo, akalia kwa sauti kuu, Lazaro, njoo huku nje.

⁴⁴Akatoka nje yule aliyekufa, akiwa amefungwa sanda miguuni na mikononi, na uso wake amefungwa leso. Naye Yesu akawaambia, Mfungueni, mkamwache aende zake.

Njama za kumwua Yesu

⁴⁵Basi wengi katika Wayahudi waliokuja kwa Mariamu, na kuyaona yale aliyoyafanya, wakamwamini.[#Lk 16:31; Yn 10:42; 12:42]

⁴⁶Lakini wengine wakaenda zao kwa Mafarisayo, wakawaambia aliyoyafanya Yesu.

⁴⁷Basi wakuu wa makuhani na Mafarisayo wakakusanya baraza, wakasema, Tunafanya nini? Maana mtu huyu afanya ishara nyingi.

⁴⁸Tukimwacha hivi, watu wote watamwamini; na Warumi watakuja, watatuondolea mahali petu na taifa letu.

⁴⁹Mtu mmoja miongoni mwao, Kayafa, aliyekuwa Kuhani Mkuu mwaka ule, akawaambia, Ninyi hamjui neno lolote;

⁵⁰wala hamfikiri ya kwamba yafaa mtu mmoja afe kwa ajili ya watu, wala lisiangamie taifa zima.[#Yn 18:14]

⁵¹Na neno hilo yeye hakulisema kwa nafsi yake; bali kwa kuwa alikuwa Kuhani Mkuu mwaka ule, alitabiri ya kwamba Yesu atakufa kwa ajili ya taifa hilo.[#Mwa 50:20; Kut 28:30; Hes 27:21]

⁵²Wala si kwa ajili ya taifa hilo tu; lakini pamoja na hayo awakusanye watoto wa Mungu waliotawanyika, ili wawe wamoja.[#Yn 10:16; 1 Yoh 2:2; Mt 12:30]

⁵³Basi tangu siku ile walifanya shauri la kumwua.

⁵⁴Kwa hiyo Yesu hakutembea tena kwa wazi katikati ya Wayahudi; bali alitoka huko, akaenda mahali karibu na jangwa, mpaka mji uitwao Efraimu; akakaa huko pamoja na wanafunzi wake.

⁵⁵Na Pasaka ya Wayahudi ilikuwa karibu; na wengi wakakwea toka mashambani kwenda Yerusalemu kabla ya Pasaka, ili wajitakase.[#2 Nya 30:17; Mk 10:32; Mdo 21:24,26]

⁵⁶Basi wao wakamtafuta Yesu, wakasemezana wakiwa wamesimama hekaluni, Mwaonaje? Haji kabisa sikukuu hii?

⁵⁷Na wakuu wa makuhani na Mafarisayo walikuwa wametoa amri ya kwamba mtu akimjua alipo, alete habari, ili wapate kumkamata.