Kutoamini kwa ndugu za Yesu

¹Na baada ya hayo Yesu alikuwa akitembea katika Galilaya; maana hakutaka kutembea katika Yudea, kwa sababu Wayahudi walikuwa wakitaka kumwua.[#Mk 9:30; Lk 9:51]

²Na sikukuu ya Wayahudi, sikukuu ya vibanda, ilikuwa karibu.[#Law 23:34; Kum 16:13]

³Basi ndugu zake wakamwambia, Ondoka hapa, uende Yudea, wanafunzi wako nao wapate kuzitazama kazi zako unazozifanya.[#Yn 2:12; Mt 12:46; Mdo 1:14]

⁴Kwa maana hakuna mtu afanyaye mambo kwa siri, naye yeye mwenyewe anataka kujulikana. Ukifanya mambo haya, basi jidhihirishe kwa ulimwengu.

⁵Maana hata nduguze hawakumwamini.[#Mt 13:55]

⁶Basi Yesu akawaambia, Wakati wangu haujafika bado; ila wakati wenu sikuzote upo.[#Yn 2:4]

⁷Ulimwengu hauwezi kuwachukia ninyi; bali hunichukia mimi, kwa sababu mimi naushuhudia ya kuwa kazi zake ni mbovu.[#Yn 15:18]

⁸Pandeni ninyi kwenda kula sikukuu; mimi sipandi bado kwenda kula sikukuu hii, kwa kuwa wakati wangu haujatimia.

⁹Naye alipokwisha kuwaambia hayo, alibaki huko Galilaya.

Yesu katika sikukuu ya vibanda

¹⁰Hata ndugu zake walipokwisha kupanda kuiendea sikukuu, ndipo yeye naye alipopanda, si kwa wazi bali kana kwamba kwa siri.

¹¹Basi Wayahudi wakamtafuta kwenye sikukuu, wakasema, Yuko wapi yule?

¹²Kukawa na manung'uniko mengi katika makutano juu yake. Wengine wakasema, Ni mtu mwema. Na wengine wakasema, Sivyo; bali anawadanganya makutano.

¹³Lakini hakuna mtu aliyemsema waziwazi, kwa sababu ya kuwaogopa Wayahudi.[#Yn 9:22; 12:42; 19:38]

¹⁴Hata ikawa katikati ya sikukuu Yesu alipanda kuingia hekaluni, akafundisha.

¹⁵Wayahudi wakastaajabu wakisema, Amepataje huyu kujua elimu, ambaye hakusoma?[#Mt 13:54; Lk 2:47]

¹⁶Basi Yesu akawajibu, akasema, Mafunzo yangu si yangu mimi, ila ni yake yeye aliyenituma.[#Yn 12:49]

¹⁷Mtu akipenda kuyatenda mapenzi yake, atajua habari ya yale mafunzo, kwamba yatoka kwa Mungu, au kwamba mimi nanena kwa nafsi yangu tu.

¹⁸Yeye anenaye kwa nafsi yake tu hutafuta utukufu wake mwenyewe; bali yeye anayetafuta utukufu wake aliyemtuma, huyo ni wa kweli, wala ndani yake hamna udhalimu.[#Yn 5:41,44]

¹⁹Je! Musa hakuwapa torati? Wala hakuna mmoja wenu aitendaye torati. Mbona mnatafuta kuniua?[#Yn 5:16,18,47; Mdo 7:53; Rum 2:17-29]

²⁰Mkutano wakajibu, Ama! Una pepo! Ni nani anayetafuta kukuua?[#Mk 3:21; Yn 8:48,52; 10:20]

²¹Yesu akajibu, akawaambia, Mimi nilitenda kazi moja, nanyi nyote mnaistaajabia.[#Yn 5:16]

²²Musa aliwapa tohara; lakini si kwamba yatoka kwa Musa, bali kwa mababa; nanyi mwatahiri mtu siku ya sabato.[#Mwa 17:10; Law 12:3]

²³Basi ikiwa mtu hupashwa tohara siku ya sabato, ili Torati ya Musa isije ikavunjika, mbona mnanikasirikia mimi kwa sababu nilimfanya mtu kuwa mzima kabisa siku ya sabato?[#Yn 5:9]

²⁴Basi msihukumu kwa kuangalia kwa nje tu, bali ifanyeni hukumu iliyo ya haki.[#Yn 8:15; #7:24 Katika Kigiriki ni ‘hukumu ya macho’.]

Huyu ndiye Kristo?

²⁵Basi baadhi ya watu wa Yerusalemu wakasema, Je! Huyu siye wanayemtafuta ili wamwue?[#Yn 7:19]

²⁶Na kumbe! Anena waziwazi, wala hawamwambii neno! Inawezekana hao wakuu wanajua hakika ya kuwa huyu ndiye Kristo?

²⁷Lakini huyu twamjua atokako; bali Kristo atakapokuja hakuna ajuaye atokako.[#Yn 7:41]

²⁸Basi Yesu akapaza sauti yake hekaluni, akifundisha na kusema, Mimi mnanijua, na huko nitokako mnakujua; wala sikuja kwa nafsi yangu; ila yeye aliyenituma ni wa kweli, msiyemjua ninyi.

²⁹Mimi namjua, kwa kuwa nimetoka kwake, naye ndiye aliyenituma.[#Mt 11:27]

³⁰Basi wakatafuta kumkamata; lakini hakuna mtu aliyeunyosha mkono wake ili kumshika, kwa sababu saa yake ilikuwa haijafika bado.[#Yn 8:20; 13:1; Lk 22:53]

³¹Na watu wengi katika mkutano wakamwamini; wakasema, Atakapokuja Kristo, je! Atafanya ishara nyingi zaidi kuliko hizi alizozifanya huyu?[#Yn 8:30; 10:42; 11:45; 12:42]

Maofisa watumwa kumkamata Yesu

³²Mafarisayo wakawasikia mkutano wakinung'unika hivi juu yake; basi wakuu wa makuhani na Mafarisayo wakatuma watumishi ili wamkamate.

³³Basi Yesu akasema, Bado kitambo kidogo nipo pamoja nanyi; kisha naenda zangu kwake yeye aliyenituma.[#Yn 13:33]

³⁴Mtanitafuta wala hamtaniona; nami nilipo ninyi hamwezi kuja.[#Yn 8:21; 13:36; 17:24]

³⁵Basi Wayahudi wakasemezana, Huyu atakwenda wapi hata sisi tusimwone? Ati! Atakwenda kwa Utawanyiko wa Wagiriki, na kuwafundisha Wagiriki?

³⁶Ni neno gani hilo alilolisema, Mtanitafuta wala hamtaniona; nami nilipo ninyi hamwezi kuja?

Mito ya maji yaliyo hai

³⁷Katika siku ya mwisho, siku ile kubwa ya sikukuu, Yesu akasimama, akapaza sauti yake akisema, Mtu akiona kiu, na aje kwangu anywe.[#Law 23:36; Yn 4:10,14]

³⁸Aniaminiye mimi, kama vile maandiko yalivyonena, mito ya maji yaliyo hai itatoka ndani yake.[#Eze 47:1,12; Zek 13:1; 14:8; Yoe 2:28; 3:18; Isa 44:3; 55:1; 58:11]

³⁹Na neno hilo alilisema kuhusu Roho, ambaye wale wamwaminio watampokea baadaye; kwa maana Roho alikuwa hajaja, kwa sababu Yesu alikuwa hajatukuzwa.[#Yn 16:7; 2 Kor 3:17]

Mgawanyiko kati ya watu

⁴⁰Basi wengine katika mkutano walipoyasikia maneno hayo, walisema, Hakika huyu ndiye nabii yule.[#Yn 6:14; Kum 18:15]

⁴¹Wengine walisema, Huyu ndiye Kristo. Wengine wakasema, Je! Kristo atoka Galilaya?[#Yn 1:46]

⁴²Andiko halikusema ya kwamba Kristo atoka katika uzao wa Daudi, na kutoka Bethlehemu, mji ule alioukaa Daudi?[#2 Sam 7:12; Mik 5:2; Mt 2:5,6; 22:42; Zab 89:3]

⁴³Basi kukaingia matengano katika mkutano kwa ajili yake.[#Yn 9:16]

⁴⁴Baadhi yao wakataka kumkamata, lakini hakuna mtu aliyenyosha mikono yake ili kumshika.[#Yn 7:30]

Kutoamini kwa wenye mamlaka

⁴⁵Basi wale watumishi wakawaendea wakuu wa makuhani na Mafarisayo. Nao wakawaambia, Mbona hamkumleta?[#Yn 7:32]

⁴⁶Wale watumishi wakajibu. Hajanena kamwe mtu yeyote kama huyu anavyonena.[#Mt 7:28,29]

⁴⁷Basi Mafarisayo wakawajibu, Je! Ninyi nanyi mmedanganyika?

⁴⁸Ni nani katika wakuu amwaminiye, au katika Mafarisayo?[#Yn 12:42]

⁴⁹Lakini makutano hawa wasioifahamu torati wamelaaniwa.

⁵⁰Akawaambia Nikodemo, (naye ni yule aliyemwendea zamani, maana ni mmoja wao),[#Yn 3:1-2]

⁵¹Je! Torati yetu humhukumu mtu kabla ya kumsikia kwanza, na kujua atendavyo?[#Kum 1:16,17; 19:15]

⁵²Wakajibu, wakamwambia, Je! Wewe nawe umetoka Galilaya! Chunguza, na utaona kuwa Galilaya hakutatoka nabii.[#Yn 1:46; 7:41]