Yesu amtakasa mwenye ukoma

¹Naye aliposhuka mlimani, makutano mengi walimfuata.[#Mk 1:40-44; Lk 5:12-14]

²Na tazama, akaja mtu mwenye ukoma akamsujudia, akisema, Bwana, ukitaka, waweza kunitakasa.

³Yesu akanyosha mkono, akamgusa, akisema Nataka; takasika. Na mara ukoma wake ukatakasika.

⁴Yesu akamwambia, Angalia, usimwambie mtu; ila nenda zako, ukajioneshe kwa kuhani, ukaitoe sadaka kama alivyoamuru Musa, iwe ushuhuda kwao.[#Law 13:49; 14:1-32; Mt 9:30; Mk 7:36; Lk 17:14]

Yesu amponya mtumishi wa afisa

⁵Na alipoingia Kapernaumu, afisa mmoja alimjia,[#Lk 7:1-10; #Yn 4:47]

⁶akamsihi, akisema, Bwana, mtumishi wangu amelala nyumbani, mgonjwa wa kupooza, anaumwa sana.

⁷Yesu akamwambia, Nitakuja, nimponye.

⁸Yule afisa akamjibu, akasema, Bwana, mimi sistahili wewe uingie chini ya dari yangu; lakini sema neno tu, na mtumishi wangu atapona.

⁹Kwa maana mimi nami ni mtu niliyewekwa chini ya mamlaka, mwenye askari chini yangu; nikimwambia huyu, Nenda, huenda; na huyu, Njoo, huja; na mtumwa wangu, Fanya hivi, hufanya.

¹⁰Yesu aliposikia hayo, alistaajabu, akawaambia wale waliomfuata, Amin, nawaambieni, Sijaona imani kubwa namna hii, kwa yeyote katika Israeli.[#Mt 15:28]

¹¹Nami nawaambieni, ya kwamba wengi watakuja kutoka mashariki na magharibi, nao wataketi pamoja na Abrahamu, na Isaka, na Yakobo katika ufalme wa mbinguni;[#Lk 13:29; Isa 49:12; 59:19; Mal 1:11; Zab 107:3]

¹²bali wana wa ufalme watatupwa katika giza la nje, ndiko kutakuwako kilio na kusaga meno.[#Mt 22:13; 24:51; 25:30; Lk 13:28]

¹³Naye Yesu akamwambia yule afisa, Nenda zako; na iwe kwako kama ulivyoamini. Mtumishi wake akapona wakati ule ule.[#Mt 9:29; 15:28]

Yesu aponya wengi nyumbani kwa Petro

¹⁴Na Yesu alipofika nyumbani kwa Petro, akamwona mkwe wa Petro, mamaye mkewe, amelala kitandani akiugua homa.[#Mk 1:29-34; Lk 4:38-41; #1 Kor 9:5]

¹⁵Akamgusa mkono, homa ikamwacha; naye akaondoka, akawatumikia.

¹⁶Hata kulipokuwa jioni, wakamletea wengi wenye pepo; akawatoa pepo kwa neno lake, akawaponya wote waliokuwa wagonjwa,

¹⁷ili litimie lile neno lililonenwa na nabii Isaya, akisema,[#Isa 53:4]

Mwenyewe aliutwaa udhaifu wetu,

Na kuyachukua magonjwa yetu.

Watakaokuwa wafuasi wa Yesu

¹⁸Naye Yesu alipoona makutano mengi wakimzunguka, aliamuru kuvuka kwenda ng'ambo.[#Mk 4:35; Lk 8:22]

¹⁹Mwandishi mmoja akamwendea, akamwambia, Mwalimu, nitakufuata kokote uendako.[#Lk 9:57-60]

²⁰Yesu akamwambia, Mbweha wana pango, na ndege wa angani wana viota; lakini Mwana wa Adamu hana pa kulaza kichwa chake.[#2 Kor 8:9]

²¹Mwingine katika wanafunzi wake akamwambia, Bwana, nipe ruhusa kwanza, niende nikamzike baba yangu.[#1 Fal 19:20]

²²Lakini Yesu akamwambia, Nifuate; waache wafu wazike wafu wao.[#Yn 1:43; 5:25; Rum 6:13]

Yesu atuliza dhoruba

²³Akapanda katika mashua, wanafunzi wake wakamfuata.[#Mk 4:36-41; Lk 8:23-25; #Zab 4:8]

²⁴Kukawa na msukosuko mkuu baharini, hata mashua ikafunikwa na mawimbi; naye alikuwa amelala usingizi.

²⁵Wanafunzi wake wakamwendea, wakamwamsha, wakisema, Bwana, tuokoe, tunaangamia.

²⁶Akawaambia, Mbona mmekuwa waoga, enyi wa imani haba? Mara akaondoka, akazikemea pepo na bahari; kukawa shwari kuu.[#Mt 14:31; 16:8]

²⁷Wale watu wakamaka wakisema, Huyu ni mtu wa namna gani hata pepo na bahari zamtii?

Yesu awaponya Wagadara wenye pepo

²⁸Naye alipofika ng'ambo, katika nchi ya Wagadara, watu wawili wenye pepo walikutana naye, wakitoka makaburini, wakali mno, hata mtu asiweze kuipitia njia ile.[#Mk 5:1-17; Lk 8:26-37]

²⁹Na tazama, wakapiga kelele, wakisema, Tuna nini nawe, Mwana wa Mungu? Je! Umekuja kututesa kabla ya wakati wetu?[#Lk 4:41; 2 Pet 2:4]

³⁰Basi, kulikuwako mbali nao kundi la nguruwe wengi wakila.

³¹Wale pepo wakamsihi, wakisema, Ukitutoa, tuache twende, tukaingie katika lile kundi la nguruwe.

³²Akawaambia, Nendeni. Wakatoka, wakaingia katika nguruwe; na kumbe! Kundi lote wakateremka kwa kasi gengeni hadi baharini, wakafa maji.

³³Lakini wachungaji walikimbia, wakaenda zao mjini, wakazieneza habari zote na habari za wale wenye pepo pia.

³⁴Na tazama, mji wote ukatoka kwenda kumlaki Yesu; nao walipomwona, walimsihi aondoke katika nchi yao.