Baragumu za fedha

¹Kisha BWANA akanena na Musa, akamwambia,

²Jifanyie tarumbeta mbili za fedha; utazifanya za kazi ya ufuzi; nawe utazitumia kwa kuwaita mkutano wakutane, na kwa kusafiri kwao yale makambi.[#Zab 81:3; 89:15; Isa 1:13; Hos 8:1; Yoe 1:14]

³Na hapo watakapozipiga hizo tarumbeta, mkutano wote utakukutanikia wewe, hapo mlangoni pa hema ya kukutania.[#Yer 4:5; Yoe 2:15; Zab 22:22; 35:18; Isa 55:1-4; Zek 8:21-23; Ufu 22:17]

⁴Nao wakipiga tarumbeta moja tu ndipo wakuu, walio vichwa vya maelfu ya Israeli, watakukutanikia wewe[#Hes 1:16; 7:2; Kut 18:21]

⁵Tena hapo mtakapopiga sauti ya kugutusha sana, makambi yaliyoko upande wa mashariki yatasafiri. Tena hapo mtakapopiga sauti ya kugutusha ya pili, makambi yaliyoko upande wa kusini yatasafiri;[#Hes 2:3]

⁶watapiga sauti ya kugutusha kwa ajili ya safari zao.

⁷Lakini mkutano utakapokutanishwa pamoja mtapiga, lakini hamtapiga sauti ya kugutusha.[#Yoe 2:1]

⁸Wana wa Haruni, makuhani, ndio watakaopiga hizo tarumbeta; nazo zitakuwa kwenu ni amri ya milele katika vizazi vyenu vyote.[#Hes 31:6; Yos 6:4; 1 Nya 15:23-24; 16:6; 2 Nya 13:12]

⁹Tena hapo mtakapokwenda kupiga vita katika nchi yenu, kupigana na adui awaoneaye ninyi, ndipo mtakapopiga sauti ya kugutusha kwa tarumbeta; nanyi mtakumbukwa mbele za BWANA, Mungu wenu, nanyi mtaokolewa na adui zenu.[#Amu 2:18; 3:27; 1 Sam 10:18; Zab 106:42; Mwa 8:1; 1 Fal 8:44; Zab 106:4]

¹⁰Tena katika siku ya furaha yenu, na katika sikukuu zenu zilizoamriwa, na katika kuandama miezi kwenu, mtapiga hizo tarumbeta juu ya sadaka zenu za kuteketezwa, na juu ya dhabihu za sadaka zenu za amani; nazo zitakuwa kwenu ni ukumbusho mbele za Mungu wenu; mimi ndimi BWANA, Mungu wenu.[#Law 23:24; 1 Nya 15:24; 2 Nya 7:6; Ezr 3:10; Neh 12:35; Zab 81:3; Kut 28:29; 30:16; Yos 4:7; 1 Kor 11:24-26]

Kuondoka toka Sinai

¹¹Ikawa mwaka wa pili, mwezi wa pili, siku ya ishirini ya mwezi, hilo wingu liliinuka kutoka pale juu ya maskani ya ushahidi.[#Hes 9:17]

¹²Wana wa Israeli wakasafiri kwenda mbele, kwa safari zao kutoka jangwa la Sinai; na hilo wingu likakaa katika jangwa la Parani.[#Kut 40:36; Hes 1:1; Kut 19:1; Hes 12:16; 13:3,26; Mwa 21:21; Kum 1:1; 32:2; 1 Sam 25:1; Hab 3:3]

¹³Nao wakasafiri kwanza kwa amri ya BWANA kwa mkono wa Musa.[#Hes 2:34]

¹⁴Mahali pa mbele ilisafiri beramu ya kambi ya wana wa Yuda, kwa majeshi yao; na Nashoni mwana wa Aminadabu ndiye aliyekuwa juu ya jeshi lake.

¹⁵Na juu ya jeshi la kabila la wana wa Isakari alikuwa Nethaneli mwana wa Suari.

¹⁶Na juu ya jeshi la kabila la wana wa Zabuloni ni Eliabu mwana wa Heloni.

¹⁷Na maskani ilishushwa; na wana wa Gershoni, na wana wa Merari, walioichukua maskani, wakasafiri kwenda mbele.[#Hes 1:51; 4:24,31]

¹⁸Kisha beramu ya kambi ya Reubeni ikasafiri kwenda mbele kwa majeshi yao; na juu ya jeshi lake alikuwa Elisuri mwana wa Shedeuri.

¹⁹Tena juu ya jeshi la kabila la wana wa Simeoni ni Shelumieli mwana wa Suri-shadai.

²⁰Tena juu ya jeshi la kabila la wana wa Gadi ni Eliasafu mwana wa Deueli.

²¹Ndipo wakasafiri Wakohathi wenye kuvichukua vile vitu vitakatifu; na hao wengine wakaisimamisha maskani kabla hawajaja wao.

²²Kisha beramu ya kambi ya wana wa Efraimu ikasafiri kwenda mbele kwa majeshi yao; na juu ya jeshi lake ni Elishama mwana wa Amihudi.

²³Tena juu ya jeshi la kabila la wana wa Manase ni Gamalieli mwana wa Pedasuri.

²⁴Tena juu ya jeshi la kabila la wana wa Benyamini ni Abidani mwana wa Gideoni.

²⁵Kisha beramu ya kambi ya wana wa Dani, ambayo ilikuwa ni nyuma ya makambi yote, ikasafiri, kwa majeshi yao; na juu ya jeshi lake ni Ahiezeri mwana wa Amishadai.[#Yos 6:9]

²⁶Tena juu ya jeshi la kabila la wana wa Asheri ni Pagieli mwana wa Okrani;

²⁷Tena juu ya jeshi la kabila la wana wa Naftali ni Ahira mwana wa Enani.

²⁸Ndivyo zilivyokuwa safari zao wana wa Israeli kwa majeshi: yao; nao wakasafiri kwenda mbele.[#Zab 80:1; Wim 6:10]

²⁹Kisha Musa akamwambia Hobabu, mwana wa Reueli Mmidiani, mkwewe Musa, Sisi twasafiri kwenenda mahali ambapo BWANA amenena habari zake hivi, Nitawapa ninyi mahali hapo; uje pamoja nasi, nasi tutakufanyia mema; kwa kuwa BWANA ametamka mema juu ya Israeli.[#Kut 2:18; Mwa 12:7; Amu 1:16; 4:11; Mwa 32:12; Kut 6:7,8]

³⁰Naye akamwambia, Siendi mimi; ila nitairudia nchi yangu mwenyewe, na kwa jamaa zangu mwenyewe.

³¹Naye akamwambia, Usituache, tafadhali; kwa kuwa wewe wajua jinsi tutakavyopiga kambi, nawe utakuwa kiongozi wetu.[#Ayu 29:15]

³²Isitoshe, ukienda pamoja nasi, naam, mema yote ambayo BWANA atatutendea, nawe tutakutendea vivyo hivyo.

³³Basi wakasafiri kutoka penye mlima wa BWANA safari ya siku tatu; na sanduku la Agano la BWANA likatangulia mbele yao mwendo wa siku tatu, ili kuwatafutia mahali pa kupumzika.[#Kut 3:2; Kum 1:33; Yer 31:2]

³⁴Na wingu la BWANA lilikuwa juu yao mchana hapo waliposafiri kwenda mbele kutoka kambini.[#Kut 13:21; Neh 9:12,19; Zab 105:39]

³⁵Ilikuwa, hapo sanduku liliposafiri kwenda mbele, ndipo Musa akasema, Inuka, Ee BWANA, adui zako na watawanyike; na wakimbie mbele zako hao wakuchukiao.[#Zab 68:1,2; Isa 51:9]

³⁶Tena hapo liliposimama, akasema, Ee BWANA, uwarudie maelfu kumi ya maelfu ya Israeli.[#Zab 90:14,17; 132:8; #10:36 Au Rudi Ee BWANA wa maelfu na maelfu ya Israeli.]