Sala ya ukombozi kutoka kwa watesaji

¹Ee BWANA, usikie haki, ukisikilize kilio changu,

Utege sikio lako kwa maombi yangu,

Yasiyotoka katika midomo ya hila.

²Hukumu yangu na itoke kwako,

Macho yako na yatazame mambo ya adili.

³Umenijaribu moyo wangu, umenijia usiku,[#Ayu 23:10; Yak 3:2]

Umenichunguza usione neno;

Nimenuia kinywa changu kisikose,

⁴Kuhusu matendo ya wanadamu;[#Rum 12:2]

Kwa neno la midomo yako

Nimejiepusha na njia za wenye jeuri.

⁵Nyayo zangu zimeshikamana na njia zako,

Hatua zangu hazikuondoshwa.

⁶Ee Mungu, nimekuita kwa maana utaitika,

Utege sikio lako ulisikie neno langu.

⁷Dhihirisha fadhili zako za ajabu

Wewe uwaokoaye wanaokukimbilia;

Kwa mkono wako wa kulia

Uwaokoe kutoka kwa adui zao.

⁸Unilinde kama mboni ya jicho,[#Kum 32:10]

Unifiche chini ya kivuli cha mbawa zako;

⁹Wasinione wasio haki wanaonionea,

Adui za roho yangu wanaonizunguka.

¹⁰Wamejawa na ukaidi,

Kwa vinywa vyao wanajigamba.

¹¹Wamenifuatia; na sasa wananizunguka,[#1 Sam 23:26]

Na kuyakaza macho yao watuangushe chini.

¹²Kama mfano wa simba atakaye kurarua,

Kama mwanasimba aoteaye katika maotea yake.

¹³Inuka, Ee BWANA, umkabili, umwangushe,

Kwa upanga wako uniokoe nafsi yangu na mtu mbaya.

¹⁴Ee BWANA, kwa mkono wako uniokoe na watu,

Watu wa dunia hii ambao fungu lao liko katika maisha haya.

Matumbo yao wayajaza kwa hazina yako,

Hushiba wana, huwaachia watoto wao akiba zao,

¹⁵Bali mimi nikutazame uso wako katika haki,[#Ayu 19:26,27; Kol 1:15]

Niamkapo nishibishwe kwa sura yako.