Ombi la ukombozi katika shida na ukatili

¹Mungu wangu, Mungu wangu,[#Mt 27:46; Mk 15:34; Ebr 5:7]

Mbona umeniacha?

Mbona U mbali na wokovu wangu,

Na maneno ya kuugua kwangu?

²Ee Mungu wangu, nalia mchana lakini hujibu

Na wakati wa usiku lakini sipati raha.

³Lakini Wewe U Mtakatifu,[#Isa 6:3; Ufu 4:8]

Utukuzwaye na sifa za Israeli.

⁴Baba zetu walikutumainia Wewe,

Walitumainia, na Wewe ukawaokoa.

⁵Walikulilia Wewe wakaokoka,

Walikutumainia, nao hawakuaibika.

⁶Lakini mimi ni mdudu wala si mtu,[#Isa 53:3]

Nimedharauliwa na kupuuzwa na watu.

⁷Wote wanionao hunicheka sana,[#Mt 27:39; 9:24; Mk 15:20,29; Lk 23:35; 16:14]

Hunifyonya, wakitikisa vichwa vyao;

⁸Husema, Umtegemee BWANA; na amponye;[#Mt 27:43]

Na amwokoe sasa, maana apendezwa naye.

⁹Naam, Wewe ndiwe uliyenitoa tumboni,

Ulinisalimisha matitini mwa mama yangu.

¹⁰Kwako nilitupwa tangu tumboni,

Toka tumboni mwa mamangu ndiwe Mungu wangu.

¹¹Usiwe mbali nami maana taabu i karibu,

Kwa maana hakuna msaidizi.

¹²Mafahali wengi wamenizunguka,

Walio hodari wa Bashani wamenisonga;

¹³Wananifumbulia vinywa vyao,[#Zab 35:21; 1 Pet 5:8]

Kama simba apapuraye na kunguruma.

¹⁴Nimemwagika kama maji,

Mifupa yangu yote imeteguka,

Moyo wangu umekuwa kama nta,

Na kuyeyuka ndani ya moyo wangu.

¹⁵Nguvu zangu zimekauka kama gae,[#Mit 17:22]

Ulimi wangu waambatana na taya zangu;

Unaniweka katika mavumbi ya mauti

¹⁶Kwa maana mbwa wamenizunguka;[#Zek 12:10; Lk 23:33; Yn 20:27]

Kusanyiko la waovu wamenisonga;

Wamenidunga mikono na miguu.

¹⁷Naweza kuihesabu mifupa yangu yote;

Wao wananitazama na kunikodolea macho.

¹⁸Wanagawanya nguo zangu,[#Mt 27:35; Mk 15:24; Lk 23:34; Yn 19:24]

Na vazi langu wanalipigia kura.

¹⁹Nawe, BWANA, usiwe mbali,

Ee Nguvu zangu, fanya haraka kunisaidia.

²⁰Uniponye nafsi yangu na upanga,

Mpenzi wangu na nguvu za mbwa.

²¹Kinywani mwa simba uniokoe;[#2 Tim 4:17]

Naam, toka pembe za nyati umenijibu.

²²Nitalihubiri jina lako kwa ndugu zangu,[#Ebr 2:12; Yn 20:17]

Katikati ya kusanyiko nitakusifu.

²³Ninyi mnaomcha BWANA, msifuni,

Enyi nyote mlio wazawa wa Yakobo, mtukuzeni,

Mcheni, enyi nyote mlio wazawa wa Israeli.

²⁴Maana hapuuzi

Wala kuchukizwa na mateso ya anayeteswa,

Wala hamfichi uso wake,

Bali humsikia akimlilia.

²⁵Kwako zinatoka sifa zangu

Katika kusanyiko kubwa.

Nitaziondoa nadhiri zangu

Mbele yao wamchao.

²⁶Wapole watakula na kushiba,[#Yn 6:51,57]

Wamtafutao BWANA watamsifu;

Mioyo yenu na iishi milele.

²⁷Miisho yote ya dunia itakumbuka,[#Zab 2:8]

Na watu watamrejea BWANA;

Jamaa zote za mataifa watamsujudia.

²⁸Maana ufalme ni wa BWANA,[#Zab 47:7-9; Zek 14:9; Mt 6:13]

Naye ndiye awatawalaye mataifa.

²⁹Wakwasi wote wa dunia watakula na kusujudu,[#Isa 26:19]

Humwinamia wote washukao mavumbini;

Naam, yeye asiyeweza kujihuisha nafsi yake,

³⁰Wazawa wake watamtumikia.

Zitasimuliwa habari za BWANA,

Kwa kizazi kitakachokuja,

³¹Watautangaza wokovu wake kwa watakaozaliwa,

Ya kwamba ndiye aliyeyafanya.