Shangwe kwa kusamehewa

¹Heri aliyesamehewa dhambi,[#Rum 4:7-8; Zab 85:2]

Na kuondolewa makosa yake.

²Heri ambaye BWANA hamhesabii hatia,[#Law 17:4; Rum 5:13; Yn 1:47; 2 Kor 1:12]

Na ambaye rohoni mwake hamna hila.

³Nilipokosa kuungama dhambi zangu, mifupa yangu ilipooza

Kwa kulia kwangu mchana kutwa.

⁴Kwa maana mchana na usiku

Mkono wako ulinilemea.

Jasho langu likakauka hata nikawa

Kama nchi kavu wakati wa kaskazi.

⁵Ndipo nikakuungamia dhambi yangu,[#Mit 28:13; Isa 65:24; Lk 15:18]

Wala sikuuficha upotovu wangu.

Nilisema, Nitayakiri maasi yangu kwa BWANA,

Nawe ukanisamehe upotovu wa dhambi yangu.

⁶Kwa hiyo, hebu kila akuaminiye[#1 Tim 1:16; Isa 55:6; Yn 7:34]

Akuombe awapo katika dhiki.

Hakika maji makuu yafurikapo,

Hayatamfikia yeye.

⁷Kimbilio langu utanilinda nisipate mateso,[#Zab 9:9; Mit 18:10; Isa 4:6; Mt 23:37; Kol 3:3]

Utanizungusha nyimbo za kufurahia wokovu wangu.

⁸Nitakufundisha na kukuonesha njia utakayoiendea;[#Isa 48:17]

Nitakushauri, jicho langu likikutazama.

⁹Msiwe kama farasi wala nyumbu,

Wasiokuwa na akili.

Kwa matandiko ya lijamu na hatamu

Sharti kuwazuia hao, au hawatakukaribia.

¹⁰Naye mtu mwovu ana mapigo mengi,[#Mit 13:21; Zab 34:8; Mit 16:20; Yer 17:7]

Bali amtumainiaye BWANA fadhili zitamzunguka.

¹¹Mfurahieni BWANA;

Shangilieni, enyi wenye haki

Pigeni vigelegele vya furaha;

Ninyi nyote mlio wanyofu wa moyo.