Kilio cha kitaifa na sala kwa ajili ya msaada

¹Ee Mungu, tumesikia kwa masikio yetu

Baba zetu wametuambia,

Matendo uliyoyatenda siku zao, siku za kale.

²Wewe kwa mkono wako uliwafukuza mataifa,[#Kut 15:17; Kum 7:1; Yos 10:42]

Ukawakalisha wao.

Wewe uliwatesa watu wa nchi,

Ukawafanikisha wao.

³Maana hawakuitwaa nchi kwa upanga wao,[#Yos 24:12; Kum 4:37]

Wala hawakupata ushindi kwa mkono wao;

Bali mkono wako wa kulia, naam, mkono wako,

Na nuru ya uso wako, kwa kuwa ulipendezwa nao.

⁴Ee Mungu, Wewe ndiwe mfalme wangu,[#Zab 74:12]

Uagize mambo ya wokovu kwa Yakobo.

⁵Kwa nguvu zako tutawaangusha watesi wetu;[#Dan 8:4]

Kwa jina lako tutawakanyaga watupingao.

⁶Maana sitautumainia upinde wangu,[#Zab 33:16]

Wala upanga wangu hauwezi kuniokoa.

⁷Bali Wewe ndiwe uliyetuokoa kutoka kwa watesi wetu;

Na watuchukiao umewaaibisha.

⁸Tumejisifia Mungu mchana kutwa,[#Zab 34:2; Rum 2:17; 1 Kor 1:31]

Na jina lako tutalishukuru milele.

⁹Lakini umetutupa, umetufedhehesha,

Wala huendi na majeshi yetu.

¹⁰Waturudisha nyuma tukampa mtesi kisogo,[#Law 26:17; Kum 28:25]

Na watuchukiao wanajipatia mateka.

¹¹Umetutoa kama kondoo tuwe chakula,[#Kum 4:27; 2 Fal 17:6; Zab 60:1; Yer 32:37; Lk 21:24]

Na kututawanya kati ya mataifa.

¹²Wawauza watu wako bila kupata mali,[#Isa 52:3,4]

Wala hukupata faida kwa thamani yao.

¹³Umetufanya kuwa lawama kwa jirani zetu,

Mzaha na dhihaka kwao wanaotuzunguka.

¹⁴Umetufanya kuwa mithali kwa mataifa,

Sababu ya kutikisa kichwa kwa watu wa nchi.

¹⁵Mchana kutwa fedheha yangu i mbele yangu,

Na aibu imeufunika uso wangu,

¹⁶Kwa sauti ya mwenye kulaumu na kukufuru,[#Zab 8:2]

Kwa sababu ya adui na mjilipiza kisasi.

¹⁷Haya yote yametupata, bali hatukukusahau,[#Dan 9:13]

Wala hatukulivunja agano lako.

¹⁸Hatukuiacha mioyo yetu irudi nyuma,

Wala hatua zetu hazikuiacha njia yako,

¹⁹Japo ulituponda katika pango la mbwamwitu,[#Isa 34:13]

Na kutufunika kwa uvuli wa mauti.

²⁰Ikiwa tumelisahau jina la Mungu wetu,

Au kumnyoshea mungu mgeni mikono yetu;

²¹Je! Mungu hangegundua jambo hilo?[#Ayu 31:14; Zab 139:1; 1 Sam 16:7; Mhu 12:14; Yn 2:25; Mdo 1:24; Rum 2:16; Ebr 4:12; Ufu 2:23]

Maana ndiye azijuaye siri za moyo.

²²Hasha! Kwa ajili yako tunauawa mchana kutwa;[#Rum 8:36]

Tunafanywa kama kondoo waendao kuchinjwa.

²³Amka, Bwana, mbona umelala?

Ondoka, usitutupe milele.

²⁴Mbona unatuficha uso wako,

Na kusahau kuonewa na kudhulumiwa kwetu?

²⁵Maana nafsi yetu imeinama mavumbini,

Tumbo letu limegandamana na nchi.

²⁶Uinuke, uwe msaada wetu,

Utukomboe kwa ajili ya fadhili zako.