Kusalitiwa na rafiki

¹Ee Mungu, uisikilize sala yangu,

Wala usijifiche nikuombapo rehema.

²Unisikilize na kunijibu,

Nimetangatanga nikilalama na kuugua.

³Kwa sababu ya sauti ya adui,

Kwa sababu ya dhuluma yake yule mwovu.

Kwa maana wananitupia uovu,

Na kwa ghadhabu wananiudhi.

⁴Moyo wangu unaumia ndani yangu,[#Zab 102:3-5; Mt 26:37,38; Yn 12:27; 2 Kor 1:8-10]

Na hofu za mauti zimeniangukia.

⁵Hofu na tetemeko limenijia,

Na hofu kubwa imeniingia.

⁶Nikasema, Ningekuwa na mbawa kama njiwa,

Ningeruka mbali na kustarehe.

⁷Ningekwenda zangu mbali,

Ningetua jangwani.

⁸Ningefanya haraka kuzikimbia

Dhoruba na tufani.

⁹Ee Bwana, uwaangamize, uzivuruge ndimi zao,

Maana nimeona dhuluma na fitina katika mji.

¹⁰Mchana na usiku huzunguka kutani mwake;

Uovu na taabu zimo ndani yake;

¹¹Tamaa mbaya zimo ndani yake;

Dhuluma na hila haziondoki mitaani mwake.

¹²Kwa maana si adui aliyenitukana;

Kama ndivyo, ningevumilia.

Aliyejitukuza juu yangu siye anichukiaye;

Kama ndivyo, ningejificha asinione.

¹³Bali ni wewe, mtu mwenzangu,[#2 Sam 15:12]

Rafiki yangu, niliyejuana nawe sana.

¹⁴Tumehusiana vizuri; na kutembea

Nyumbani mwa Mungu pamoja na mkutano.

¹⁵Mauti na iwapate kwa ghafla,[#Hes 16:30]

Na washuke kuzimu wangali hai,

Maana uovu uko nyumbani mwao moyoni mwao.

¹⁶Nami nitamwita Mungu,

Na BWANA ataniokoa;

¹⁷Jioni, asubuhi, na adhuhuri nitalalama na kuugua,[#Dan 6:10; Lk 18:1; Mdo 3:1]

Naye ataisikia sauti yangu.

¹⁸Ameiokoa nafsi yangu iwe salama, asinikaribie mtu,[#2 Nya 32:7]

Maana walioshindana nami walikuwa wengi.

¹⁹Mungu atawalaye tangu milele atanisikia;[#Kum 33:27]

Na kuwaadhibu,

maana hawajirekebishi,

Wala kumcha Mungu.

²⁰Mwenzangu amenyosha mkono awadhuru waliopatana naye,

Amelivunja agano lake.

²¹Kinywa chake ni laini kuliko siagi,

Bali moyo wake ni vita.

Maneno yake ni mororo kuliko mafuta,

Lakini yanakata kama upanga mkali.

²²Umtwike BWANA mzigo wako naye atakutegemeza,[#Zab 37:24]

Hatamwacha mwenye haki aondoshwe milele.

²³Nawe, Ee Mungu, utawateremsha,

Wafikie shimo la uharibifu;

Watu wa damu na hila hawataishi nusu ya siku zao,

Bali mimi nitakutumaini Wewe.