Mangangaral 11

Ang Gawain ng Taong Marunong

¹Ipuhunan mo ang pera mo sa negosyo

at sa kalaunan ay kikita ka.

²Ilagay mo ang pera mo sa ibaʼt ibang negosyo,[#11:2 : Sa literal, pito o walo.; #11:2 : O Magbigay ka sa maraming tao.]

dahil hindi mo alam kung anong kalamidad

ang darating dito sa mundo.

³Kapag makapal na ang ulap,

magbubuhos ito ng ulan sa mundo.

At kung saan natumba ang puno,

doon iyon mananatili.

⁴Kung palagi ka lang maghihintay

ng magandang panahon,

hindi ka makakapagtanim

at wala kang aanihin.

⁵Kung paanong hindi mo nalalaman

ang direksyon ng hangin

o kung paano lumalaki ang sanggol

sa sinapupunan ng kanyang ina,

hindi mo rin maiintindihan

ang gawa ng Diyos,

ang Manlilikha ng lahat ng bagay.

⁶Maghasik ka ng binhi

sa umaga hanggang gabi,

dahil hindi mo alam

kung alin sa itinanim mo ang tutubo,

o kung lahat ito ay tutubo.

Alalahanin Mo ang Iyong Manlilikha

⁷Ang liwanag ay napakatamis,

at nakalulugod sa mata

na makita ang araw.

⁸Kaya sa buong buhay mo

ay maging masaya ka,

gaano man ito kahaba.

Ngunit, alalahanin mong

darating ang kamatayan

at magtatagal iyon.

Lahat ng mangyayari

ay walang kabuluhan.

⁹Kayong mga kabataan, magsaya kayo

habang kayoʼy bata pa.

Gawin ninyo ang gusto ninyong gawin,

pero alalahanin ninyong hahatulan kayo ng Diyos

ayon sa inyong mga ginawa.

¹⁰Huwag kayong mag-alala o mabalisa man

dahil ang panahon ng kabataan

ay lumilipas lang.