Hoseas 8

Parurusahan ng Diyos ang Israel

¹“Hipan ninyo ang trumpeta

upang bigyang babala

ang aking mga mamamayan,

ang Israel na itinuturing

na tahanan ng Panginoon ,

na lulusubin sila

ng kalabang kasimbilis ng agila.

Sapagkat sinira nila ang kasunduan ko

sa kanila

at nilabag nila

ang aking Kautusan.

²Sumasamo sila sa akin,

‘Diyos ng Israel,

kinikilala ka namin.’

³Ngunit itinakwil nila ang mabuti,

kaya hahabulin sila

ng kanilang kalaban.

⁴Pumili sila ng mga hari

at mga opisyal na hindi ko pinili.

Gumawa sila ng mga diyos-diyosan

mula sa kanilang mga pilak at ginto,

at ang mga ito ang nagdala

sa kanila sa kapahamakan.

⁵Itinatakwil ko[#8:5 : Sa Hebreo, niya.]

ang diyos-diyosang

baka ng mga taga-Samaria.

Galit na galit ako sa kanila.

Hanggang kailan sila

mananatiling marumi?

⁶Ang diyos-diyosang baka ng Samaria

ay ginawa lamang

ng mga platero na taga-Israel.

Hindi iyon Diyos!

Tiyak na dudurugin iyon.

⁷“Para silang naghahasik ng hangin

at nag-aani ng buhawi.

Para ding trigo na walang uhay,

kaya walang makukuhang pagkain.

At kung mamumunga man,

taga-ibang bansa naman

ang lalamon nito.

⁸Ang Israel ay nilamon

ng ibang bansa.

At ngayong nakikisalamuha siya sa kanila,

para na siyang kasangkapang

walang silbi.

⁹Para siyang asnong-gubat

na nag-iisa at naliligaw.

Humingi siya ng tulong sa Asiria;

binayaran niya ang kanyang

mga kakamping bansa

para ipagtanggol siya.

¹⁰Ngunit kahit nagpasakop siya

sa mga bansang iyon,

titipunin ko ngayon

ang kanyang mga mamamayan

at parurusahan.

At magsisimula na

ang kanilang paghihirap

sa pang-aapi ng isang hari

at ng mga opisyal niya.

¹¹“Nagpagawa nga sila

ng maraming altar

para sa mga handog sa paglilinis,

subalit doon din

sila gumawa ng kasalanan.

¹²Kahit sa kanilaʼy ipinagkaloob ko

ang lahat kong kautusan,

ngunit sa kanilang paningin,

wariʼy hindi para sa kanila ang mga ito.

¹³Naghahandog sila sa akin

at kinakain nila ang karneng handog,

ngunit hindi nalulugod

ang Panginoon sa kanila.

At ngayon aalalahanin ko

ang kanilang kasamaan

at parurusahan ko sila

dahil sa kanilang mga kasalanan.

Babalik sila sa Ehipto.

¹⁴Kinalimutan ng mga taga-Israel

ang lumikha sa kanila.

Sila at ang mga taga-Juda

ay nagtayo ng mga palasyo

at maraming napapaderang bayan.

Ngunit susunugin ko

ang kanilang mga lungsod

at ang matitibay na bahagi nito.”