1Sinabi ng Panginoon ,
“Babilonia, mauupo ka sa lupa.
Mauupo ka nang walang trono.
Ikaw na parang birheng pihikan
at mahinhin noon
ngunit hindi na ngayon.
2Isa ka nang alipin ngayon,
kaya kumuha ka
ng batong gilingan
at maggiling ka na ng trigo.
Alisin mo na ang belo mo,
at itaas ang damit mo
para makita ang iyong hita
habang tumatawid ka sa ilog.
3Lalabas ang iyong kahubaran
at mapapahiya ka.
Maghihiganti ako sa iyo
at hindi kita kaaawaan.”
4Ang ating Tagapagligtas,
na ang pangalan
ay Panginoon ng mga Hukbo
ay ang Banal na Diyos ng Israel.
5“Babilonia, maupo ka nang tahimik
doon sa kadiliman.
Hindi ka na tatawaging reyna
ng mga kaharian.
6Nagalit ako
sa aking mga mamamayan
at itinakwil ko sila.
Kaya ibinigay ko sila
sa iyong mga kamay,
at hindi mo sila kinaawaan.
Pati ang matatanda
ay iyong pinagmalupitan
ng mabigat na pamatok.
7Sinasabi mong ang iyong
pagiging reyna
ay walang katapusan.
Ngunit hindi mo inisip
ang iyong mga ginawa
at kung ano ang maidudulot nito
sa iyo sa huli.
8“Kaya makinig ka,
ikaw na mahilig sa kalayawan
at panatag ang kalooban.
Sinasabi mo sa iyong sarili,
‘Nag-iisa lang ako. Walang akong katulad.
Kailanmaʼy hindi ako mababalo
o mawawalan ng mga anak.’
9Ngunit bigla itong mangyayari sa iyo
sa isang iglap, sa isang araw:
Mababalo ka
at mawawalan ng mga anak.
Talagang mangyayari ito sa iyo
kahit na marami ka pang alam
na mahika o panggagaway.
10Naniniwala kang
hindi ka mapapahamak
sa paggawa mo ng kasamaan,
dahil inaakala mong walang nakakakita sa iyo.
Inililigaw ka ng iyong
karunungan at kaalaman,
at iyon din ang dahilan
kung bakit sinasabi mong
ikaw ang Diyos
at wala nang iba pa.
11Kung kaya, darating sa iyo ang kapahamakan
at hindi mo malalaman
kung papaano mo iyon mailalayo
sa pamamagitan ng iyong mahika.
Darating din sa iyo ang salot
na hindi mo mababayaran
para tumigil.
Biglang darating sa iyo
ang pagkawasak na hindi mo
akalaing mangyayari.
12“Sige, ipagpatuloy mo
ang iyong mga mahika
at mga pangkukulam
na iyong ginagawa
mula noong bata ka pa.
Baka sakaling magtagumpay ka,
o baka sakaling matakot sa iyo
ang mga kaaway mo.
13Pagod ka na sa marami mong mga pakana.
Magpatulong ka
sa iyong mga tao na nag-aaral
tungkol sa mga bituin
at nanghuhula bawat buwan
tungkol sa mga mangyayari sa iyo.
14Ang totoo, para silang
mga dayaming madaling
nasusunog.
Ni hindi nga nila maililigtas
ang kanilang sarili sa apoy.
At ang apoy na itoʼy hindi tulad
ng pangkaraniwang init
kundi talagang napakainit.
15Ano ngayon ang magagawa
ng mga taong hinihingan mo ng payo
mula nang bata ka pa?
Ang bawat isa sa kanilaʼy
naligaw ng landas
at hindi makakapagligtas sa iyo.”