Salmo 21

Salmo 21

¹Panginoon , nagagalak ang hari sa kalakasan

na inyong ibinibigay

Labis siyang nasisiyahan sa bigay

ninyong tagumpay.

²Ibinigay nʼyo sa kanya

ang kanyang hinahangad;

hindi nʼyo ipinagkait

ang kanyang kahilingan.

³Tinanggap nʼyo siya,

at pinagkalooban ng masaganang pagpapala.

Pinutungan nʼyo ang ulo niya

ng koronang yari sa purong ginto.

⁴Hiniling niya sa inyo na dagdagan

ang buhay niya,

at binigyan nʼyo siya ng mahabang buhay

na magpakailanman.

⁵Dahil sa pagbibigay nʼyo

ng tagumpay sa kanya,

naging tanyag siya at makapangyarihan.

⁶Sapagkat nagtitiwala siya sa inyo, Panginoon ,

pinagpala nʼyo siya ng mga pagpapalang

walang katapusan,

at pinasaya nʼyo siya sa inyong piling.

⁷At dahil minamahal nʼyo siya nang tapat,

Kataas-taasang Diyos,

hindi siya mabubuwal.

⁸Sa pamamagitan ng inyong kapangyarihan,

matatalo nʼyo ang lahat nʼyong mga kaaway.

⁹At kapag kayo ay dumating,

Panginoon ,

lilipulin nʼyo sila.

Dahil sa galit nʼyo, siyaʼy tutupukin

na parang dayami

sa naglalagablab na apoy.

¹⁰Uubusin nʼyo ang lahat ng mga anak nila

sa buong kalupaan,

upang wala nang magpatuloy

ng kanilang lahi.

¹¹Nagbabalak sila ng masama

laban sa inyo,

ngunit hindi sila magtatagumpay.

¹²Tatakas sila kapag nakita nilang nakatutok na

sa kanila ang inyong pana.

¹³Panginoon , pinupuri namin kayo

dahil sa inyong kalakasan.

Aawit kami ng mga papuri

dahil sa inyong kapangyarihan.