Salmo 31

Salmo 31

¹Panginoon , sa inyo ako humihingi ng kalinga.

Huwag nʼyong hayaang akoʼy mapahiya.

Iligtas nʼyo ako sapagkat kayo ay matuwid.

²Pakinggan nʼyo ako at agad na iligtas.

Kayo sa akin ay batong kanlungan,

at pader na tanggulan

para sa aking kaligtasan.

³Dahil kayo ang aking matibay

na batong kanlungan,

pangunahan nʼyo ako at patnubayan

nang kayo ay aking maparangalan.

⁴Ilayo nʼyo ako sa bitag ng aking mga kaaway,

dahil kayo ang aking matibay na tanggulan.

⁵Ipinagkakatiwala ko sa inyong

mga kamay ang aking espiritu.

Iligtas nʼyo ako, Panginoon ,

dahil kayo ang Diyos na maaasahan.

⁶Panginoon , namumuhi ako sa mga sumasamba

sa mga diyos-diyosan na walang kabuluhan,

dahil sa inyo ako nagtitiwala.

⁷Akoʼy magagalak sa inyong pag-ibig,

dahil nakita nʼyo ang aking pagdurusa,

at nalalaman nʼyo ang tinitiis kong kahirapan.

⁸Hindi nʼyo ako ibinigay sa aking mga kaaway,

sa halip iniligtas nʼyo ako sa kapahamakan.

⁹Panginoon , kahabagan nʼyo po ako,

dahil akoʼy labis nang nahihirapan.

Namumugto na ang aking mga mata sa pag-iyak,

at nanghihina na ako.

¹⁰Ang buhay koʼy punong-puno ng kasawian;

umiikli ang buhay ko

dahil sa pag-iyak at kalungkutan.

Nanghihina na ako sa kapighatiang aking nararanasan,

at parang nadudurog na ang aking mga buto.

¹¹Kinukutya ako ng aking mga kaaway,

at hinahamak ng aking mga kapitbahay.

Iniiwasan na ako ng mga dati kong kaibigan;

kapag nakikita nila ako sa daan,

akoʼy kanilang nilalayuan.

¹²Para akong patay na kanilang kinalimutan,

at parang basag na sisidlang

wala nang halaga.

¹³Marami akong naririnig na banta laban sa akin.

Natatakot akong pumunta kahit saan,

dahil plano nilang patayin ako.

¹⁴Ngunit ako ay nagtitiwala sa inyo, Panginoon .

Sinasabi kong,

“Kayo ang aking Diyos!”

¹⁵Ang aking kinabukasan ay nasa inyong mga kamay.

Iligtas nʼyo po ako sa aking mga kaaway na umuusig sa akin.

¹⁶Ipadama nʼyo ang inyong kabutihan sa akin na inyong lingkod.

Sa inyong pagmamahal, iligtas nʼyo ako.

¹⁷Panginoon , huwag nʼyong payagang akoʼy mapahiya,

dahil sa inyo ako tumatawag.

Ang masasama sana ang mapahiya

at manahimik doon sa libingan.

¹⁸Patahimikin nʼyo silang mga sinungaling,

pati ang mga mayayabang at mapagmataas

na binabalewala at hinahamak

ang mga matutuwid.

¹⁹O kay dakila ng inyong kabutihan;

sa mga may takot sa inyo,

pagpapalaʼy inyong inilaan.

Nakikita ng karamihan ang mga ginawa nʼyong kabutihan

sa mga taong kayo ang kanlungan.

²⁰Itinago nʼyo sila sa ilalim

ng inyong pagkalinga.

At doon ay ligtas sila sa mga masamang balak

at pang-iinsulto ng iba.

²¹Purihin ang Panginoon ,

dahil kahanga-hanga ang pag-ibig niyang ipinakita sa akin

noong akoʼy naipit sa isang

sinasalakay na bayan.

²²Doon akoʼy natakot at nasabi ko,

“Binalewala na ako ng Panginoon .”

Ngunit narinig niya pala ang aking kahilingan,

at akoʼy kanyang tinulungan.

²³O, kayong tapat niyang mga mamamayan,

mahalin ninyo ang Panginoon .

Iniingatan niya ang mga tapat sa kanya,

ngunit lubos ang kanyang parusa sa mga mapagmataas.

²⁴Magpakatatag kayo

at lakasan ninyo ang inyong loob,

kayong mga umaasa sa Panginoon .