Ecclesiastico 11

¹Naitataas ng maralita ang kanyang noo kung siya'y marunong,

at ibibilang siya sa hanay ng mga dakila.

Ang Anyong Panlabas

²Huwag mong dadakilain ang isang tao dahil lamang sa kanyang magandang kaanyuan,

at huwag mo namang hahamakin ang sinuman dahil sa kanyang kapangitan.

³Ang pukyutan ay isa sa pinakamaliit na hayop na lumilipad,

ngunit ang kanyang pulot ay pinakamasarap.

⁴Huwag mong ipagmarangya ang magara mong kasuotan,

at huwag kang magmamataas sa panahong ikaw ay pinaparangalan;

sapagkat kahanga-hanga ang pamamaraan ng Panginoon,

at lingid sa mga tao ang kanyang mga gawa.

⁵Maraming hari ang napilitang maupo sa lupa,

at may naging hari naman na di sukat akalain.

⁶May mga pinunong nawalan ng kapangyarihan,

at may mga tanyag na tao ang nahulog sa kapangyarihan ng iba.

Ang Pag-iingat

⁷Magsuri ka muna bago ka humatol,

at isipin mo muna bago ka magmatuwid.

⁸Makinig ka muna bago ka sumagot,

at huwag kang sumabad hangga't hindi natatapos ang nagsasalita.

⁹Huwag kang makipagtalo tungkol sa mga bagay na wala ka namang kinalaman,

at huwag kang makikialam sa pagpapasya ng mga makasalanan.

¹⁰Anak, huwag mong pakaramihan ang iyong mga panukala,

kapag napakarami ng iyong saklaw, hindi mo makakayanan;

kung naghahabol ka, hindi ka aabot,

at kung ikaw ang hinahabol, hindi ka makakatakas.

¹¹May taong trabaho nang trabaho at lagi nang humahangos,

patuloy ang kayod ngunit lalo lamang naghihikahos.

¹²Mayroon namang bahagya nang makagulapay,

babagal-bagal, mahina, walang kaya, at sadsad sa hirap,

ngunit nang lingapin siya ng Panginoon,

naging matiwasay ang kanyang buhay.

¹³Nakabangon siya at nag-ani ng tagumpay,

at namangha ang lahat sa nangyari sa kanya.

^14-15-16Kung minsa'y masarap, kung minsa'y masaklap ang padala ng Panginoon:

ang kabiguan at tagumpay, ang kayamanan at karukhaan,

ang buhay at kamatayan ay sa kanya nagmumula.

¹⁷Mananatili sa banal ang kaloob ng Panginoon,

at ang pagpapala niya'y nagdudulot ng patuloy na tagumpay.

¹⁸Maaaring yumaman ang isang tao sa pamamagitan ng pagsisikap at pagkakait sa sarili,[#Awit 49:10; Lu. 12:16-21.]

ngunit sa bandang huli, ano ang mapapala niya?

¹⁹Sasabihin niya: “Maaari na akong mamahinga ngayon,

maaari na akong magpasarap sa buhay sa dami ng aking naipon.”

Ngunit hindi niya alam kung hanggang kailan siya mabubuhay,

at iiwan niya sa iba ang lahat niyang pinagpaguran.

²⁰Panindigan mo ang pinasukang kasunduan, at tuparin iyon nang buong sikap,

at magpakatanda ka sa iyong hanapbuhay.

²¹Huwag kang maiinggit sa tagumpay ng masasamang tao.

Gawin mo ang iyong tungkulin, at manalig ka sa Panginoon,

sapagkat madali sa kanya na ang dukha'y payamanin.

²²Ang gantimpala ng makatarungan ay ang pagpapala ng Panginoon,

at matutupad ang kanyang mithiin sa sandaling panahon.

²³Huwag kang labis na mabahala sa iyong mga pangangailangan,

o kung ano ang sasapitin mo sa darating na panahon.

²⁴At huwag mo ring akalaing nasa iyo na ang lahat,

o kaya'y wala nang kasawiang maaaring mangyari sa iyo sa darating na panahon.

²⁵Sa panahon ng kasaganaan, nakakalimutan ang hirap,

at sa panahon ng kasawian, nakakalimutan ang tagumpay.

²⁶Madali sa Panginoon ang maghintay sa araw ng pagkamatay ng isang tao,

upang parusahan o gantimpalaan siya sa kanyang mga ginawa.

²⁷Sa oras na iyon, makikilala ng lahat ang kanyang mga gawa,

at ang kaginhawahang tinamasa niya sa nakaraan, ay mapapawi sa isang sandali ng paghihirap.

²⁸Kaya, huwag mong sabihing mapalad ang isang tao bago siya mamatay,

sapagkat sa kanyang pagkamatay lamang lalabas ang buong katotohanan.

Mag-ingat sa Pagpili ng Kaibigan

²⁹Piliin mo ang taong isasama mo sa iyong tahanan,

sapagkat lubhang marami ang pamamaraan ng manlilinlang.

³⁰Ang palalo ay parang ibong bihag na ipinapain,

parang espiya na nag-aabang ng iyong pagbagsak.

³¹Binabaluktot niya ang kahulugan ng mga bagay,

pinasasama ang mabuti at binibigyang-sala ang walang kasalanan.

³²Sa isang tilamsik ng apoy nagmumula ang siga;

ang makasalanang may masamang hangarin ay humahantong sa pagdanak ng dugo.

³³Mag-ingat ka sa taong masama at sa kanyang mga pakana,

baka ikaw ay ipahamak niya magpakailanman.

³⁴Kapag kumupkop ka sa iyong tahanan ng taong di mo kaanu-ano,

magúgulo ang iyong sambahayan, at lalayuan ka ng mga kadugo mo.