¹И по днех шестих поят Иисус петра и иакова и иоанна брата его, и возведе их на гору высоку едины,

²и преобразися пред ними: и просветися лице его яко солнце, ризы же его быша белы яко свет.

³И се, явистася им моисей и илиа, с ним глаголюща.

⁴Отвещав же петр рече (ко) Иисусови: Господи, добро есть нам зде быти: аще хощеши, сотворим зде три сени, тебе едину, и моисеови едину, и едину илии.

⁵Еще (же) ему глаголющу, се, облак светел осени их: и се, глас из облака глаголя: сей есть Сын мой возлюбленный, о немже благоволих: того послушайте.

⁶И слышавше ученицы падоша ницы и убояшася зело.

⁷И приступль Иисус прикоснуся их и рече: востаните и не бойтеся.

⁸Возведше же очи свои, ни когоже видеша, токмо Иисуса единаго.

⁹И сходящым им с горы, заповеда им Иисус, глаголя: ни комуже поведите видения, дондеже Сын Человеческий из мертвых воскреснет.

¹⁰И вопросиша его ученицы его, глаголюще: что убо книжницы глаголют, яко илии подобает приити прежде?

¹¹Иисус же отвещав рече им: илиа убо приидет прежде и устроит вся:

¹²глаголю же вам, яко илиа уже прииде, и не познаша его, но сотвориша о нем, елика восхотеша: тако и Сын Человеческий имать пострадати от них.

¹³Тогда разумеша ученицы, яко о иоанне крестители рече им.

¹⁴И пришедшым им к народу, приступи к нему человек, кланяяся ему

¹⁵и глаголя: Господи, помилуй сына моего, яко на новы месяцы беснуется и зле страждет: множицею бо падает во огнь и множицею в воду:

¹⁶и приведох его ко учеником твоим, и не возмогоша его изцелити.

¹⁷Отвещав же Иисус рече: о, роде неверный и развращенный, доколе буду с вами? доколе терплю вам? приведите ми его семо.

¹⁸И запрети ему Иисус, и изыде из него бес: и изцеле отрок от часа того.

¹⁹Тогда приступльше ученицы ко Иисусу на едине, реша: почто мы не возмогохом изгнати его?

²⁰Иисус же рече им: за неверствие ваше: аминь бо глаголю вам: аще имате веру яко зерно горушно, речете горе сей: прейди отсюду тамо, и прейдет: и ничтоже невозможно будет вам:

²¹сей же род не исходит, токмо молитвою и постом.

²²Живущым же им в галилеи, рече им Иисус: предан имать быти Сын Человеческий в руце человеком,

²³и убиют его, и в третий день востанет. И скорбни быша зело.

²⁴Пришедшым же им в капернаум, приступиша приемлющии дидрахмы к петрови и реша: учитель ваш не даст ли дидрахмы?

²⁵Глаголя: ей. И егда вниде в дом, предвари его Иисус, глаголя: что ти мнится, симоне? царие земстии от киих приемлют дани или кинсон? от своих ли сынов, или от чужих?

²⁶Глагола ему петр: от чужих. Рече ему Иисус: убо свободни суть сынове:

²⁷но да не соблазним их, шед на море, верзи удицу, и, юже прежде имеши рыбу, возми: и отверз уста ей, обрящеши статир: той взем даждь им за мя и за ся.