¹Подобно бо есть Царствие небесное человеку домовиту, иже изыде купно утро наяти делатели в виноград свой,

²и совещав с делатели по пенязю на день, посла их в виноград свой.

³И изшед в третий час, виде ины стоящя на торжищи праздны,

⁴и тем рече: идите и вы в виноград мой, и еже будет правда, дам вам. Они же идоша.

⁵Паки же изшед в шестый и девятый час, сотвори такоже.

⁶Во единыйженадесять час изшед, обрете другия стоящя праздны и глагола им: что зде стоите весь день праздни?

⁷Глаголаша ему: яко никтоже нас наят. Глагола им: идите и вы в виноград (мой), и еже будет праведно, приимете.

⁸Вечеру же бывшу, глагола господин винограда к приставнику своему: призови делатели и даждь им мзду, начен от последних до первых.

⁹И пришедше иже во единыйнадесять час, прияша по пенязю.

¹⁰Пришедше же первии мняху, яко вящше приимут: и прияша и тии по пенязю:

¹¹приемше же роптаху на господина,

¹²глаголюще, яко сии последнии един час сотвориша, и равных нам сотворил их еси, понесшым тяготу дне и вар.

¹³Он же отвещав рече единому их: друже, не обижу тебе: не по пенязю ли совещал еси со мною?

¹⁴возми твое и иди: хощу же и сему последнему дати, якоже и тебе:

¹⁵или несть ми леть сотворити, еже хощу, во своих ми? аще око твое лукаво есть, яко аз благ есмь?

¹⁶Тако будут последнии перви, и первии последни: мнози бо суть звани, мало же избранных.

¹⁷И восходя Иисус во Иерусалим, поят обанадесяте ученика едины на пути и рече им:

¹⁸се, восходим во Иерусалим, и Сын Человеческий предан будет архиереем и книжником: и осудят его на смерть,

¹⁹и предадят его языком на поругание и биение и пропятие: и в третий день воскреснет.

²⁰Тогда приступи к нему мати сыну зеведеову с сынома своима, кланяющися и просящи нечто от него.

²¹Он же рече ей: чесо хощеши? Глагола ему: рцы, да сядета сия оба сына моя, един одесную тебе, и един ошуюю (тебе), во Царствии твоем.

²²Отвещав же Иисус рече: не веста, чесо просита: можета ли пити чашу, юже аз имам пити, или крещением, имже аз крещаюся, креститися? Глаголаста ему: можева.

²³И глагола има: чашу убо мою испиета, и крещением, имже аз крещаюся, имате креститися: а еже сести одесную мене и ошуюю мене, несть мое дати, но имже уготовася от Отца моего.

²⁴И слышавше десять, негодоваша о обою брату.

²⁵Иисус же призвав их, рече: весте, яко князи язык господствуют ими, и велицыи обладают ими:

²⁶не тако же будет в вас: но иже аще хощет в вас вящший быти, да будет вам слуга:

²⁷и иже аще хощет в вас быти первый, буди вам раб:

²⁸якоже Сын Человеческий не прииде, да послужат ему, но послужити и дати душу свою избавление за многих.

²⁹И исходящу ему от иерихона, по нем иде народ мног.

³⁰И се, два слепца седяща при пути, слышавша, яко Иисус мимоходит, возописта, глаголюща: помилуй ны, Господи, Сыне давидов.

³¹Народ же прещаше има, да умолчита: она же паче вопияста, глаголюща: помилуй ны, Господи, Сыне давидов.

³²И востав Иисус возгласи я и рече: что хощета, да сотворю вама?

³³Глаголаста ему: Господи, да отверзетеся очи наю.

³⁴милосердовав же Иисус прикоснуся очию има: и абие прозреста има очи, и по нем идоста.