Послание к Титу 3

¹Воспоминай тем началствующым и владеющым повиноватися и покарятися, и ко всякому делу благу готовым быти:

²ни единаго хулити, не сварливым быти, но тихим, всяку являющым кротость ко всем человеком.

³Бехом бо иногда и мы несмысленни, и непокориви, и прельщени, работающе похотем и сластем различным, в злобе и зависти живуще, мерзцы (суще и) ненавидяще друг друга.

⁴Егда же благодать и человеколюбие явися спаса нашего Бога,

⁵не от дел праведных, ихже сотворихом мы, но по своей его милости, спасе нас банею пакибытия и обновления духа святаго,

⁶егоже излия на нас обилно Иисус Христом, спасителем нашим,

⁷да оправдившеся благодатию его, наследницы будем по упованию жизни вечныя.

⁸(Чадо тите,) верно слово, и о сих хощу тя извещати, да пекутся добрым делом прилежати веровавшии Богу: сия суть полезна человеком и добра.

⁹Буих же стязаний и родословий и рвений и сваров законных отступай: суть бо неполезны и суетны.

¹⁰Еретика человека по первом и вторем наказании отрицайся,

¹¹ведый, яко развратися таковый, и согрешает, и есть самоосужден.

¹²егда послю артему к тебе или тихика, потщися приити ко мне в никополь: тамо бо судих озимети.

¹³Зину законника и аполлоса скоро предпосли, и да ничтоже им скудно будет.

¹⁴Да учатся же и наши добрым делом прилежати в нужная требования, да не будут безплодни.

¹⁵Целуют тя со мною сущии вси. Целуй любящыя ны в вере. Благодать со всеми вами. Аминь.