Ufalme wa amani

¹Kutatokea chipukizi katika kisiki cha Yese,[#11:1 Taz Ufu 5:5; 22:16]

tawi litachipua mizizini mwake.

²Roho ya Mwenyezi-Mungu itakaa kwake,

roho ya hekima na maarifa,

roho ya shauri jema na nguvu,

roho ya ujuzi na ya kumcha Mwenyezi-Mungu.

³Atafurahia kumcha Mwenyezi-Mungu.

Hatahukumu kadiri ya mambo ya njenje,

wala kuamua kufuatana na yale anayosikia.

⁴Atawapatia haki watu maskini,[#11:4 Taz 2Thes 2:8]

atawaamulia sawasawa wanyonge nchini.

Kwa neno lake ataiadhibu dunia,

kwa tamko lake atawaua waovu.

⁵Haki itakuwa kama mkanda wa kujifunga,[#11:5 Taz Efe 6:14]

uaminifu utakaa naye kama mkanda kiunoni.

⁶Mbwamwitu ataishi pamoja na mwanakondoo,[#11:6-9 Taz Isa 65:25]

chui watapumzika pamoja na mwanambuzi.

Ndama na wanasimba watakula pamoja,

na mtoto mdogo atawaongoza.

⁷Ngombe na dubu watakula pamoja,

ndama wao watapumzika pamoja;

na simba atakula majani kama ng'ombe.

⁸Mtoto mchanga atacheza kwenye shimo la nyoka

mtoto ataweza kutia mkono shimoni mwa nyoka wa sumu.

⁹Katika mlima mtakatifu wa Mungu[#11:9 Taz Hab 2:14]

hakutakuwa na madhara wala uharibifu.

Maana kumjua Mwenyezi-Mungu kutaenea pote nchini,

kama vile maji yajaavyo baharini.

Walio uhamishoni watarudi

¹⁰Siku ile chipukizi wa Yese atakuwa ishara kwa mataifa; mataifa yatamtafuta na makazi yake yatatukuka.[#11:10 Taz Roma 15:12]

¹¹Siku hiyo, Bwana ataunyosha mkono wake tena kuwarejesha watu wake waliosalia huko Ashuru, Misri, Pathrosi, Kushi, Elamu, Shinari, Hamathi na sehemu za pwani.

¹²Naye atatweka bendera kuwaashiria mataifa,

kuwakusanya Waisraeli waliodharauliwa,

kuwaleta pamoja watu wa Yuda waliotawanywa,

na kuwarudisha toka pembe nne za dunia.

¹³Wivu wa Efraimu juu ya Yuda utakoma,

hakutakuwa tena na uadui kati ya Yuda na Efraimu.

¹⁴Wote pamoja watawavamia Wafilisti walio magharibi,

pamoja watawapora watu wakaao mashariki.

Watawashinda Waedomu na Wamoabu,

nao Waamoni watawatii.

¹⁵Mwenyezi-Mungu atakausha ghuba ya bahari ya Shamu,[#11:15 Kiebrania: Bahari ya Misri.]

kwa pumzi yake ichomayo atakausha mto Eufrate,

nao utagawanyika katika vijito saba,

watu wavuke humo miguu mikavu.

¹⁶Tena, kutakuwa na barabara kuu toka Ashuru

kwa ajili ya watu wake waliobaki humo

kama ilivyokuwa kwa Waisraeli

wakati walipotoka nchini Misri.