Mungu ataiangamiza Moabu

¹Kauli ya Mungu dhidi ya nchi ya Moabu.[#15:1--16:14 Taz Isa 25:10-12; Yer 48:1-47; Eze 25:8-11; Amosi 2;1-3; Sef 2:8-11]

Mji wa Ari nchini Moabu umeangamizwa usiku;

mji wa Kiri nchini Moabu umeteketezwa usiku.

²Watu wa Diboni wamepanda hekaluni, hadi mahali pa juu kuomboleza,

watu wa Moabu wanalia kwa ajili ya Nebo na Medeba;

vichwa vyote vimenyolewa upara,

ndevu zao zote zimekatwa kabisa.

³Wanapita njiani wamevaa mavazi ya gunia.

Kwenye paa za nyumba na viwanja vya mji

watu wanalia na kukauka kwa machozi.

⁴Watu wa Heshboni na Eleale wanalia,

sauti zao zinasikika hadi Yahazi.

Hata askari wa Moabu wanalia kwa sauti;

mioyo yao inatetemeka.

⁵Moyo wangu unasononeka juu ya nchi ya Moabu;

wakimbizi wake wanakimbilia Soari,

wanakimbia mpaka Eglath-shelishiya.

Wanapanda njia ya kwenda Luhithi wakilia,

njiani kwenda Horonaimu wanatoa kilio cha maangamizi.

⁶Kijito cha Nimrimu kimekauka;

nyasi zimekauka, majani mabichi yamenyauka,

hakuna chochote kinachoota hapo.

⁷Watu wanavuka kijito cha Mierebi

wamebeba mali yao yote waliyochuma,

na kila walichojiwekea kama akiba.

⁸Kilio kimezuka pote nchini Moabu,

maombolezo yao yamefika Eglaimu,

naam, yamefika mpaka Beer-elimu.

⁹Maji ya Diboni yamejaa damu,

lakini Mungu ataongeza msiba wa Diboni.

Hao wachache watakaobaki hai

na kukimbia kutoka nchini Moabu,

watapelekewa simba wa kuwaua.