Sala ya shukrani

¹Mshukuruni Mwenyezi-Mungu, kwa kuwa ni mwema,[#Taz Zab 100:5; 106:1; 136:1]

kwa maana fadhili zake zadumu milele.

²Watu wa Israeli na waseme:

“Fadhili zake zadumu milele.”

³Wazawa wa Aroni na waseme:

“Fadhili zake zadumu milele.”

⁴Wote wamchao Mwenyezi-Mungu na waseme:

“Fadhili zake zadumu milele.”

⁵Katika taabu yangu nilimwomba Mwenyezi-Mungu,

naye akanisikia na kuniweka huru.

⁶Mwenyezi-Mungu yuko nami, siogopi kitu;[#Taz Ebr 13:6]

binadamu ataweza kunifanya nini?

⁷Mwenyezi-Mungu yuko nami, kunisaidia;

nami nitawaona maadui zangu wameshindwa.

⁸Afadhali kukimbilia usalama kwa Mwenyezi-Mungu,

kuliko kumtumainia mwanadamu.

⁹Afadhali kukimbilia usalama kwa Mwenyezi-Mungu,

kuliko kuwatumainia viongozi wa dunia.

¹⁰Mataifa yote yalinizingira,

lakini kwa jina la Mwenyezi-Mungu nikayaangamiza!

¹¹Yalinizunguka kila upande,

lakini kwa jina la Mwenyezi-Mungu, nikayaangamiza!

¹²Yalinizunguka, mengi kama nyuki,

lakini yakateketea kama kichaka motoni;

kwa jina la Mwenyezi-Mungu niliyaangamiza!

¹³Nilishambuliwa mno karibu nishindwe,

lakini Mwenyezi-Mungu alinisaidia.

¹⁴Mwenyezi-Mungu ni nguvu yangu kuu;

yeye mwenyewe ndiye wokovu wangu.

¹⁵Sauti za furaha ya ushindi zasikika hemani mwao waadilifu:

“Mkono wa Mwenyezi-Mungu umetenda mambo makuu!

¹⁶Mkono wa nguvu wa Mwenyezi-Mungu umeleta ushindi!

Mkono wa Mwenyezi-Mungu umetenda mambo makuu!”

¹⁷Sitakufa, bali nitaishi,

na kusimulia matendo ya Mwenyezi-Mungu.

¹⁸Mwenyezi-Mungu ameniadhibu sana,

lakini hakuniacha nife.

¹⁹Nifungulie milango ya watu waadilifu,

niingie na kumshukuru Mwenyezi-Mungu!

²⁰Huu ndio mlango wa Mwenyezi-Mungu,

watu waadilifu watapitia humo.

²¹Nakushukuru, ee Mungu kwa kunijibu;

kwa sababu wewe ni wokovu wangu.

²²Jiwe walilokataa waashi,[#Taz Luka 20:17; Mate 4:11; 1Pet 2:7]

limekuwa jiwe kuu la msingi.

²³Hiyo ni kazi yake Mwenyezi-Mungu

nayo ni ya ajabu sana kwetu.

²⁴Hii ndiyo siku aliyoifanya Mwenyezi-Mungu;

tushangilie na kufurahi.

²⁵Tafadhali utuokoe, ee Mwenyezi-Mungu![#Taz Mat 21:9; Marko 11:9; Yoh 12:13]

Tafadhali utufanikishe, ee Mwenyezi-Mungu!

²⁶Abarikiwe huyo ajaye kwa jina la Mwenyezi-Mungu![#Taz Mat 21:9; 23:39; Marko 11:9; Luka 13:35; 19:38; Yoh 12:13]

Twawabariki kutoka nyumbani mwa Mwenyezi-Mungu

²⁷Mwenyezi-Mungu ni Mungu;

yeye ametujalia mwanga wake

Shikeni matawi ya sherehe,

mkiandamana mpaka madhabahuni.

²⁸Wewe ni Mungu wangu, nami ninakushukuru;

ninakutukuza, ee Mungu wangu.

²⁹Mshukuruni Mwenyezi-Mungu kwa kuwa ni mwema,

kwa maana fadhili zake zadumu milele.