Mungu mtawala mkuu

¹Mwenyezi-Mungu anatawala,

mataifa yanatetemeka!

Ameketi juu ya viumbe vyenye mabawa,

nayo dunia inatikisika!

²Mwenyezi-Mungu ni mkuu katika Siyoni;

ametukuka juu ya mataifa yote.

³Wote na walisifu jina lake kuu la kutisha.

Mtakatifu ndiye yeye!

⁴Ee mfalme mkuu, mpenda uadilifu!

Umethibitisha haki katika Israeli;

umeleta uadilifu na haki.

⁵Msifuni Mwenyezi-Mungu, Mungu wetu;

angukeni kifudifudi mbele zake.

Mtakatifu ndiye yeye!

⁶Mose na Aroni walikuwa makuhani wake;

Samueli alikuwa miongoni mwa waliomlilia.

Walimlilia Mwenyezi-Mungu naye akawasikiliza.

⁷Alisema nao katika mnara wa wingu;

waliyazingatia matakwa yake na amri alizowapa.

⁸Ee Mwenyezi-Mungu, Mungu wetu, wewe uliwasikiliza;

kwao ulikuwa Mungu mwenye kusamehe,

ingawa uliwaadhibu kwa makosa yao.

⁹Msifuni Mwenyezi-Mungu, Mungu wetu;

abuduni katika mlima wake mtakatifu!

Mwenyezi-Mungu, Mungu wetu, ni mtakatifu.