Petro na Kornelio

¹Kulikuwa na mtu mmoja huko Kaisarea aitwaye Kornelio, jemadari wa kikosi kimoja kiitwacho “Kikosi cha Italia.”[#10:1 Kikosi cha jeshi katika muundo wa kijeshi wa Waroma kilikuwa na askari wapatao 600.]

²Alikuwa mtu mwema; naye pamoja na jamaa yake yote walimcha Mungu; alikuwa anafanya mengi kusaidia maskini wa Kiyahudi na alikuwa anasali daima.[#10:2 Ingawa yeye hakuwa Myahudi, alikuwa mmoja wa wale ambao waliithamini dini ya Wayahudi na mara nyingi waliruhusiwa kushiriki ibada zao katika masunagogi. Luka mara kadhaa anawataja watu wasio Wayahudi na ambao walikuwa wenye kumcha Mungu: (13:16; 16:14; 18:7; taz pia Luka 7:1-9).]

³Yapata saa tisa alasiri, aliona dhahiri katika maono malaika wa Mungu akiingia ndani na kumwambia, “Kornelio!”[#10:3 Angalia maelezo ya 10:30.]

⁴Kornelio alimkodolea macho huyo malaika kwa hofu, akamwambia, “Kuna nini Mheshimiwa?” Huyo malaika akamwambia, “Mungu amezipokea sala na sadaka zako kwa maskini wala hatazisahau.

⁵Sasa, watume watu Yopa wakamwite mtu mmoja aitwaye Simoni, kwa jina lingine Petro.

⁶Yeye yumo nyumbani kwa Simoni mtengenezaji wa ngozi ambaye nyumba yake iko karibu na bahari.”

⁷Huyo malaika aliyesema hayo alipokwisha kwenda zake, Kornelio aliwaita watumishi wawili wa nyumbani na mmoja wa askari zake ambaye alikuwa mcha Mungu,

⁸akawaeleza yote yaliyotukia, akawatuma Yopa.

⁹Kesho yake, hao watu watatu wakiwa bado safarini, lakini karibu kufika Yopa, Petro alipanda juu ya paa la nyumba yapata saa sita mchana ili kusali.[#10:9 Nyumba nyingi huko Palestina wakati huo zilikuwa na paa tambarare ambapo watu waliweza kukaa au kupumzika juu yake, na hapo palifikiwa kwa ngazi upande wa nje.]

¹⁰Aliona njaa, akatamani kupata chakula. Chakula kilipokuwa kinatayarishwa, akaota ndoto.

¹¹Aliona mbingu zimefunguliwa na kitu kama shuka kubwa inateremshwa chini ikiwa imeshikwa pembe zake nne.

¹²Ndani ya shuka hiyo kulikuwa na kila aina ya wanyama: wanyama wenye miguu minne, wanyama watambaao na ndege wa angani.

¹³Akasikia sauti ikimwambia: “Petro, amka uchinje, ule!”

¹⁴Petro akajibu, “La, Bwana; mimi sijaonja kamwe chochote ambacho ni najisi au kichafu.”[#10:14 Wayahudi waliruhusiwa kula nyama ya wanyama waliotajwa kuwa safi. Wanyama wengine kama vile nguruwe, walikuwa najisi kulingana na Kitabu cha Walawi.]

¹⁵Ile sauti ikasikika tena ikimwambia: “Usiviite najisi vitu ambavyo Mungu amevitakasa!”

¹⁶Jambo hili lilifanyika mara tatu, kisha ile shuka ikarudishwa juu mbinguni.

¹⁷Petro alipokuwa bado anashangaa juu ya maana ya hayo maono aliyokuwa ameyaona, wale watu waliotumwa na Kornelio, baada ya kuigundua nyumba ya Simoni, walifika mlangoni,

¹⁸wakaita kwa sauti: “Je, kuna mgeni humu aitwaye Simoni Petro?”

¹⁹Petro alikuwa bado anajaribu kuelewa yale maono, na hapo Roho akamwambia, “Sikiliza! Kuna watu watatu hapa, wanakutafuta.

²⁰Shuka upesi na wala usisite kwenda pamoja nao kwa maana ni mimi niliyewatuma.”

²¹Basi, Petro akateremka chini, akawaambia hao watu, “Mimi ndiye mnayemtafuta. Kwa nini mmekuja?”

²²Wao wakamjibu, “Jemadari Kornelio ambaye ni mtu mwema, mcha Mungu na mwenye kuheshimika mbele ya Wayahudi wote, ametutuma. Aliambiwa na malaika mtakatifu akualike nyumbani kwake ili asikilize chochote ulicho nacho cha kusema.”

²³Petro akawakaribisha ndani, akawapa mahali pa kulala usiku ule.

Kesho yake, Petro alianza safari pamoja nao, na baadhi ya ndugu wa huko Yopa walifuatana naye.

²⁴Siku ya pili yake walifika Kaisarea na huko Kornelio alikuwa anawangojea pamoja na jamaa na marafiki aliokuwa amewaalika.

²⁵Petro alipokuwa anaingia, Kornelio alitoka nje kumlaki, akapiga magoti mbele yake na kuinama chini kabisa.[#10:25 Hakuwa Myahudi, naye anataka kumpa Petro heshima ambazo hupewa mjumbe wa kimungu, lakini Petro anamzuia (aya 26; Ling Mate 14:11-18).]

²⁶Lakini Petro alimwinua, akamwambia, “Simama, kwa maana mimi ni binadamu tu.”

²⁷Petro aliendelea kuongea na Kornelio wakiwa wanaingia nyumbani ambamo aliwakuta watu wengi wamekusanyika.

²⁸Petro akawaambia, “Nyinyi wenyewe mnajua kwamba Myahudi yeyote amekatazwa na sheria yake ya dini kushirikiana na watu wa mataifa mengine. Lakini Mungu amenijulisha nisimfikirie mtu yeyote kuwa najisi au mchafu.[#10:28 Wayahudi walijaribu kadiri walivyoweza kuepa kuwa na uhusiano na watu wasio Wayahudi kama vile kula nao, kuingia nyumbani kwao. Hayo yote kwa sababu za kidini (ling Yoh 18:28). Taz pia maelezo ya Mate 11:3.]

²⁹Kwa sababu hiyo, mliponiita nimekuja bila kusita. Basi, nawaulizeni: kwa nini mmeniita?”

³⁰Kornelio akasema, “Siku tatu zilizopita saa kama hii, saa tisa alasiri, nilikuwa nikisali chumbani mwangu. Ghafla, mtu aliyekuwa amevaa mavazi yenye kung'aa alisimama mbele yangu,[#10:30 Muda huo ulikuwa kwa kawaida muda wa sala za jioni (Mate 3:1).]

³¹akasema: ‘Kornelio! Sala yako na sadaka zako kwa maskini zimekubaliwa na Mungu.

³²Mtume mtu Yopa akamwite mtu mmoja aitwaye Simoni, kwa jina lingine Petro; yuko nyumbani kwa Simoni mtengenezaji wa ngozi karibu na bahari.’

³³Kwa hiyo nilikutumia ujumbe bila kuchelewa, nawe umefanya vyema kuja. Sasa, sisi tuko mbele ya Mungu, kusikiliza chochote ambacho Bwana amekuamuru kusema.”

Hotuba ya Petro

³⁴Hapo Petro akaanza kusema: “Sasa nimetambua kwamba hakika Mungu hana ubaguzi.

³⁵Mtu wa taifa lolote anayemcha Mungu na kutenda yaliyo sawa anapokelewa naye.

³⁶Huu ndio ule ujumbe Mungu alioupeleka kwa watu wa Israeli, akitangaza Habari Njema iletayo amani kwa njia ya Yesu Kristo ambaye ni Bwana wa wote.

³⁷Nyinyi mnajua jambo lililotukia katika nchi yote ya Wayahudi kuanzia Galilaya baada ya ule ubatizo aliohubiri Yohane.

³⁸Mnamjua Yesu wa Nazareti na jinsi Mungu alivyomteua kwa kummiminia Roho Mtakatifu na nguvu. Mungu alikuwa pamoja naye; yeye alikwenda huko na huko akitenda mema na kuwaponya wote waliokuwa wamevamiwa na Ibilisi.[#10:38 Taz 2:22 maelezo.]

³⁹Sisi ni mashahidi wa mambo yote aliyotenda katika nchi ya Wayahudi na katika Yerusalemu. Walimuua kwa kumtundika msalabani;

⁴⁰lakini Mungu alimfufua siku ya tatu, akamfanya aonekane,[#10:40 Msemo maalumu katika mahubiri ya mitume unaoambatana na imani ya Kikristo. Kwa mara ya kwanza unapatikana katika 1Kor 15:4.]

⁴¹si kwa watu wote, ila kwa wale Mungu aliokwisha wachagua wawe mashahidi wake, yaani sisi tuliokula na kunywa pamoja naye baada ya kufufuka kwake kutoka kwa wafu.

⁴²Alituamuru kuihubiri Habari Njema kwa watu wote na kushuhudia kwamba yeye ndiye aliyeteuliwa na Mungu awe Mwamuzi wa walio hai na wafu.

⁴³Manabii wote waliongea juu yake kwamba kila mtu atakayemwamini atasamehewa dhambi zake zote kwa jina lake.”

Kornelio na jamaa yake wanampokea Roho Mtakatifu

⁴⁴Wakati Petro alipokuwa bado anasema maneno hayo, Roho Mtakatifu aliwashukia wote waliokuwa wanasikiliza ujumbe huo.

⁴⁵Wale Wayahudi waumini waliokuja pamoja na Petro kutoka Yopa walishangaa kuona kuwa Mungu aliwamiminia kipawa cha Roho Mtakatifu watu wa mataifa mengine pia;

⁴⁶maana waliwasikia wakiongea kwa lugha mbalimbali wakimtukuza Mungu. Hapo Petro akasema,[#10:46 Hapa kitendo au tukio lile la Pentekoste linatukia tena kwa watu wasio Wayahudi.]

⁴⁷“Watu hawa wamempokea Roho Mtakatifu kama sisi wenyewe tulivyompokea. Je, kuna yeyote atakayeweza kuwazuia wasibatizwe kwa maji?”

⁴⁸Basi, akaamuru wabatizwe kwa jina la Yesu Kristo. Kisha wakamwomba akae nao kwa siku chache.