Paulo anakwenda tena Makedonia na Ugiriki

¹Ile ghasia ya Efeso ilipokwisha tulia Paulo aliwaita pamoja wale waumini, akawatia moyo. Kisha akawaaga, akasafiri kwenda Makedonia.

²Alipitia sehemu za nchi zile akiwatia watu moyo kwa maneno mengi. Halafu akafika Ugiriki

³ambako alikaa kwa miezi mitatu. Alipokuwa anajitayarisha kwenda Siria, aligundua kwamba Wayahudi walikuwa wanamfanyia mpango mbaya; hivyo aliamua kurudi kwa kupitia Makedonia.[#20:3 Labda wakati wa masika ya mwaka 56-57 B.K. Wakati ambapo Paulo aliandika barua kwa Waroma (Rom 15:25-28).]

⁴Sopatro, mwana wa Pirho, kutoka Berea, aliandamana naye; pia Aristarko na Sekundo kutoka Thesalonike, Gayo kutoka Derbe, Timotheo, Tukiko na Trofimo wa mkoa wa Asia.[#20:4 Walioandamana na Paulo walikuwa wawakilishi wa makanisa yaliyopeleka zawadi zao kule Yerusalemu (1Kor 16:3-4). Huenda Sopatro alikuwa mtu yule yule anayetajwa katika Rom 16:29 hali Trofimo anatajwa pia katika 21:29 na 2Tim 4:20.]

⁵Hao walitutangulia na kutungojea kule Troa.[#20:5 Hapa habari inaanza tena kusimuliwa kwa kutumia wingi (sisi tu…).]

⁶Sisi, baada ya sikukuu ya mikate isiyotiwa chachu, tulipanda meli kutoka Filipi na baada ya siku tatu tukawafikia kule Troa. Huko tulikaa kwa muda wa juma moja.[#20:6 Taz Mate 12:3-4 maelezo.]

Kukutana na waumini wa Troa kwa mara ya mwisho

⁷Jumamosi jioni tulikutana ili kumega mkate. Kwa vile Paulo alikuwa amekusudia kuondoka kesho yake, aliwahutubia watu na kuendelea kuongea nao hadi usiku wa manane.[#20:7 Neno kwa neno: Wayahudi walihesabu siku ya kwanza ya juma mara Sabato ilipokwisha, yaani jioni yapata saa 9-10 alasiri. Hapo ndipo ilipoanza siku ya kwanza ya Juma, yaani Jumapili. Basi kwa kukumbuka siku ya ufufuo wa Yesu (Mat 28:1; Marko 16:1-2,9; Luka 24:1; Yoh 20:1,19) hiyo siku ilikuwa kwa waumini wa kwanza siku maalumu ya kukutana. Hapa na katika 1Kor 16:2 na tena mara nyingi katika maandishi ya karne ya kwanza B.K. yahusu kile walichokiita “Siku ya Bwana” (Ufu 1:10). Siku hiyo ya Jumapili walikutana (taz 2:42), yaani kuadhimisha Karamu ya Bwana, ambayo ilikwisha adhimishwa kule Yerusalemu (2:42,46).]

⁸Katika chumba tulimokuwa, ghorofani, kulikuwa na taa nyingi zinawaka.

⁹Kijana mmoja aitwaye Eutuko alikuwa ameketi dirishani wakati Paulo alipokuwa anaendelea kuhutubu. Eutuko alianza kusinzia kidogokidogo na hatimaye usingizi ukambana, akaanguka chini kutoka ghorofa ya tatu. Wakamwokota amekwisha kufa.

¹⁰Lakini Paulo alishuka chini, akainama, akamkumbatia na kusema, “Msiwe na wasiwasi maana kuna uhai bado ndani yake.”

¹¹Kisha akapanda tena ghorofani, akamega mkate, akala. Aliendelea kuhubiri kwa muda mrefu hadi alfajiri, halafu akaondoka.

¹²Wale watu walimchukua yule kijana hadi nyumbani akiwa mzima kabisa, wakapata kitulizo kikubwa.

Safari kutoka Troa kwenda Mileto

¹³Sisi tulipanda meli tukatangulia kwenda Aso ambako tungemchukua Paulo. Ndivyo alivyopanga; maana alitaka kufika huko kwa kupitia nchi kavu.

¹⁴Basi, alitukuta kule Aso, tukampandisha melini, tukaenda Mitulene.[#20:14 Bandari ya kisiwa cha Lesbo, pwani ya mashariki ya Asia Ndogo.]

¹⁵Kutoka huko tulisafiri tukafika Kio kesho yake. Siku ya pili, tulitia nanga Samo na kesho yake tukafika Mileto.[#20:15 Kisiwa kusini mwa Lesbo, mkabala na pwani ya Smurna.; #20:15 Bandari kusini mwa Efeso.]

¹⁶Paulo alikuwa amekusudia kuendelea na safari kwa meli bila kupitia Efeso ili asikawie zaidi huko Asia. Alikuwa na haraka ya kufika Yerusalemu kwa sikukuu ya Pentekoste kama ingewezekana.[#20:16 Taz 2:1 maelezo.]

Paulo anawaaga wazee wa Efeso

¹⁷Kutoka Mileto Paulo alituma ujumbe kwa wazee wa Efeso wakutane naye.

¹⁸Walipofika kwake aliwaambia, “Mnajua jinsi nilivyokaa nanyi siku zote tangu siku ile ya kwanza nilipofika Asia.[#20:18 Efeso ulikuwa mji wa kwanza wa mkoa wa Asia ambao Paulo aliutembelea; taz 18:19, na pia maelezo ya 19:10.]

¹⁹Mnajua jinsi nilivyomtumikia Bwana kwa unyenyekevu wote, kwa machozi na matatizo yaliyonipata kutokana na mipango ya hila ya Wayahudi.

²⁰Mnajua kwamba sikusita hata kidogo kuwahubiria hadharani na nyumbani mwenu na kuwafundisha chochote ambacho kingewasaidieni.

²¹Niliwaonya wote — Wayahudi, kadhalika na watu wa mataifa, wamgeukie Mungu na kumwamini Bwana wetu Yesu.

²²Sasa, sikilizeni! Mimi, nikiwa ninamtii Roho, nakwenda Yerusalemu bila kufahamu yatakayonipata huko.[#20:22 Ling na aya 23 na Mate 16:6-7; 19:21. tafsiri nyingine yamkini, ingawaje hafifu zaidi: au:]

²³Ninachojua tu ni kwamba Roho Mtakatifu ananithibitishia katika kila mji kwamba vifungo na mateso ndivyo vinavyoningojea.

²⁴Lakini, siuthamini uhai wangu kuwa kitu sana kwangu mradi tu nikamilishe ule utume wangu na ile kazi aliyonipa Bwana Yesu niifanye, yaani nishuhudie Habari Njema ya neema ya Mungu.

²⁵“Nimepita miongoni mwenu nyote nikiuhubiri ufalme wa Mungu. Sasa lakini, najua hakuna hata mmoja wenu atakayeniona tena.

²⁶Hivyo, leo hii ninawathibitishieni rasmi kwamba ikijatokea akapotea mmoja wenu, mimi sina lawama yoyote.

²⁷Kwa maana sikusita hata kidogo kuwatangazieni azimio lote la Mungu.

²⁸Jihadharini wenyewe; lilindeni lile kundi ambalo Roho Mtakatifu amewaweka nyinyi muwe walezi wake. Lichungeni kanisa la Mungu ambalo amejipatia kwa damu ya Mwanae.[#20:28 Yaani, au: Neno la Kigiriki “Episkopos” limetupatia neno letu Kwa kutaja watu haohao neno (Kigiriki: “presbuteros”) linatumiwa pia katika aya 17. Ling Fil 1:1; na angalia Tito 1:6-7.; #20:28 Maneno: yaweza kueleweka kama]

²⁹Nafahamu vizuri sana kwamba baada ya kuondoka kwangu mbwamwitu wakali watawavamieni, na hawatakuwa na huruma kwa kundi hilo.[#20:29-30 Waalimu wa uwongo ambao watajiingiza katika kundi (Mat 7:15 Ling na Marko 13:22; 2Pet 2:1; pia Kumb 31:29). Watu wanaotajwa katika aya ya 30 watazuka kutoka ndani ya jumuiya. Ling na 1Tim 1:2-3 na Ufu 2:2-7, ujumbe waliopelekewa baadaye watu haohao wa Efeso.]

³⁰Hata kutoka miongoni mwenu watatokea watu ambao watasema mambo ya uongo ili kuwapotosha watu na kuwafanya wawafuate wao tu.

³¹Kwa hiyo, muwe macho mkikumbuka kwamba kwa muda wa miaka mitatu, usiku na mchana, sikuchoka kumwonya kila mmoja wenu kwa machozi.[#20:31 Kwa kukadiria; Ling na 19:8,10.]

³²“Na sasa basi, ninawaweka nyinyi chini ya ulinzi wa Mungu na ujumbe wa neema yake. Yeye anao uwezo wa kuwajenga na kuwawezesha mzipate zile baraka alizowawekea watu wake.

³³Mimi sikutamani hata mara moja fedha, wala dhahabu, wala nguo za mtu yeyote.[#20:33-34 Ling na 1Sam 12:3-5.]

³⁴Mnajua nyinyi wenyewe kwamba nimefanya kazi kwa mikono yangu mwenyewe, ili kujipatia mahitaji yangu na ya wenzangu.

³⁵Nimekuwa nikiwapeni daima mfano kwamba kwa kufanya kazi mithili hiyo tunapaswa kuwasaidia walio dhaifu, tukikumbuka maneno ya Bwana Yesu mwenyewe: ‘Heri zaidi kutoa kuliko kupokea.’”[#20:35 Maneno ya Yesu ambayo hayakuandikwa katika Injili (lakini angalia Luka 6:38).]

³⁶Baada ya kusema hayo, Paulo alipiga magoti pamoja nao wote, akasali.

³⁷Wote walikuwa wanalia, na kumwaga kwa kumkumbatia na kumbusu.

³⁸Jambo lililowahuzunisha zaidi lilikuwa neno alilosema kwamba hawangemwona tena. Basi, wakamsindikiza hadi melini.