Maono ya nne: Kikapu cha matunda

¹Bwana Mwenyezi-Mungu alinijalia maono mengine: Niliona kikapu kilichojaa matunda ya kiangazi.

²Naye Mwenyezi-Mungu akaniuliza: “Amosi, unaona nini?” Nami nikamjibu, “Naona kikapu cha matunda ya kiangazi.” Kisha Mwenyezi-Mungu akaniambia:

“Mwisho umewafikia watu wangu wa Israeli.

Sitavumilia tena maovu yao.

³Siku hiyo, nyimbo za ikulu zitakuwa maombolezo.

Kutakuwa na maiti nyingi,

nazo zitatupwa nje kimyakimya.”

Mungu ataiadhibu Israeli

⁴Sikilizeni enyi mnaowakandamiza wanyonge

na kuwaletea maangamizi fukara wa nchi.

⁵Mnajisemea mioyoni mwenu:

“Sikukuu ya mwezi mwandamo itakwisha lini

ili tuanze tena kuuza nafaka yetu?

Siku ya Sabato itakwisha lini

ili tupate kuuza ngano yetu?

Tutatumia vipimo hafifu vya wastani na uzito,

tutadanganya watu kwa mizani isizo sawa,

⁶hata kuuza ngano hafifu kwa bei kubwa.

Tutaweza kununua watu fukara kwa fedha,

na wahitaji kwa jozi ya kandambili.”

⁷Mwenyezi-Mungu, fahari ya Yakobo, ameapa:[#8:7 Maneno haya yanatumika karibu kama jina la sifa la Mungu; yanahusu Mwenyezi-Mungu mwenyewe. Taz Amo 7:2.]

“Hakika, sitayasahau matendo yao maovu.

⁸Kwa hiyo, dunia itatetemeka[#8:8 Nabii Amosi anataja tetemeko la ardhi mara kwa mara (1:1; 2:13 3:14-15; 9:1).]

na kila mtu nchini ataomboleza.

Nchi yote itayumbayumba;

itapanda na kushuka,

kama yanavyojaa na kupwa maji ya mto Nili!”

⁹Bwana Mwenyezi-Mungu asema,

“Siku hiyo nitalifanya jua litue adhuhuri,

na kuijaza nchi giza mchana.

¹⁰Sherehe zenu nitazigeuza kuwa kilio,

na nyimbo zenu za furaha kuwa maombolezo.

Nitawafanya nyote mvae magunia kwa huzuni

na kunyoa vipara vichwa vyenu,

kama kuomboleza kifo cha mtoto wa pekee;

na siku ya mwisho itakuwa ya uchungu mkubwa.”

¹¹Bwana Mwenyezi-Mungu asema,

“Siku zaja ambapo nitaleta njaa nchini.

Lakini sio njaa na kiu ya chakula na maji,

bali njaa ya kusikia maneno ya Mwenyezi-Mungu.

¹²Watu watatangatanga kutoka bahari hata bahari,

kutoka upande wa kaskazini mpaka mashariki.

Watakimbia huko na huko wakitafuta neno la Mwenyezi-Mungu,

lakini hawatalipata.

¹³“Siku hiyo, hata vijana wenye afya,

wa kiume kwa wa kike,

watazimia kwa kiu.

¹⁴Wale wanaoapa kwa mungu wa uongo wa Samaria,[#8:14 “mungu wa uongo” hapa Kiebrania ni “Ashima” jina ambalo wafafanuzi wanafikiri yahusu namna ya mungu kwa mfano wa ng'ombe dume. Watu walizoea kuapa kwa miungu katika mahali pa ibada mjini Dani (taz 7:9 maelezo) na katika mahali pa ibada mjini Beer-sheba (taz 5:5).]

na kusema: ‘Kwa nafsi ya mungu wako ee Dani’;

na, ‘Kwa nafsi ya mungu wa Beer-sheba’,

wote wataanguka na hawatainuka tena kamwe.”