¹Siku hiyo, Mwenyezi-Mungu atautwaa upanga wake mkubwa, mkali na imara, na kuliadhibu dude Lewiyathani joka lirukalo na danganyifu; Mwenyezi-Mungu ataliua joka liishilo baharini.[#27:1 Joka la kutisha katika hadithi za kale; hapa latumika kuyataja mataifa yaliyowakandamiza Waisraeli.; #27:1-13 Sehemu hii inashughulikia dhamira kadha wa kadha zisizo na uhusiano maalumu kati yake: Katika aya ya 1 mataifa mengine yatahukumiwa; Waisraeli ni shamba la mzabibu la Mungu (aya 2-6), lazima ya kuteseka (aya 7-11) lakini Waisraeli watakaosalia wataachana na uovu wao (aya 12-13).]

²Siku hiyo, Mwenyezi-Mungu atasema hivi:

“Imbeni utenzi wa shamba langu zuri la mizabibu!

³Mimi, Mwenyezi-Mungu, ni mkulima wake;

nalimwagilia maji kila wakati.

ninalilinda usiku na mchana,

lisije likaharibiwa na mtu yeyote.

⁴Silikasirikii tena shamba hili;

kama miiba na mbigili ingelilivamia,

mimi ningepambana nayo na kuichoma moto.

⁵Maadui za watu wangu wakitaka ulinzi wangu,

basi, na wafanye amani nami;

naam, wafanye amani nami.”

⁶Itakuja siku wazawa wa Yakobo watashika mizizi;[#27:6 Maneno yanayotaja kitu kilekile (Isa 5:7).]

naam, watu wa Israeli watachanua na kuchipua,

na kuijaza dunia yote kwa matunda.

⁷Mungu hakuwaadhibu Waisraeli vikali

kama alivyowaadhibu maadui wake;

Waisraeli waliopotea vitani,

ni wachache kuliko wale wa maadui zake.

⁸Aliwaadhibu watu wake kwa kuwapeleka uhamishoni.

Wakati wa upepo mkali wa mashariki,

aliwaondoa kwa kipigo kikali.

⁹Hivi ndivyo uovu wa wazawa wa Yakobo utakavyoondolewa,

hivi ndivyo dhambi yake itakavyofutwa kabisa:

ataziharibu madhabahu za miungu;

mawe yake yatasagwasagwa kama chokaa;

Ashera, wala madhabahu za kufukizia ubani hazitabaki.

¹⁰Mji ule wa ngome sasa umekuwa mtupu,[#27:10 Yahusu mji fulani ambao ulikuwa adui wa Yerusalemu (rejea Isa 24:10; 26:5).]

umeachwa na kuhamwa kama jangwa,

humo ndama wanalisha na kupumzika.

¹¹Matawi ya miti yamekauka na kuvunjika;

kina mama huyaokota wakawashia moto.

Watu hawa hawajaelewa kitu,

kwa hiyo Mungu, Muumba wao, hatawahurumia,

yeye aliyewafanya, hatawafadhili.

¹²Siku hiyo, kutoka mto Eufrate hadi mpakani mwa Misri, Mwenyezi-Mungu ataipura nafaka yake, nanyi Waisraeli mtakusanywa mmojammoja.[#27:12 Maneno “Kutoka mto Eufrate … hadi mpakani mwa Misri” yanamaanisha eneo lote lililochukuliwa kuwa eneo la Waisraeli.]

¹³Siku hiyo, tarumbeta kubwa itapigwa na watu wote wa Israeli waliopotea nchini Ashuru au waliotawanywa nchini Misri watarudi na kumwabudu Mwenyezi-Mungu juu ya mlima mtakatifu huko Yerusalemu.[#27:13 Zab 2:6 maelezo.; #27:12-13 Kuhusu picha na vielelezo kadha wa kadha vya kurudi kwa Waisraeli kutoka uhamishoni taz Isa 11:11-16; mavuno (Yoe 3:13; Mat 13:39; Ufu 14:15-16); kusanyiko linaloitwa kwa mlio wa tarumbeta (Hes 10:2-10; Yoe 2:15; rejea Mat 24:31; 1Thes 4:16).]