Tumaini la kuponywa katika Yerusalemu

¹Mungu wenu asema:

“Wafarijini watu wangu,

nendeni mkawafariji.

²Semeni na wenyeji wa Yerusalemu kwa upole,

waambieni kwamba utumwa wao umekwisha,

wamesamehewa uovu wao.

Mwenyezi-Mungu amewaadhibu maradufu

kwa sababu ya dhambi zao zote.”

³Sauti ya mtu anaita jangwani:[#40:3 Hapa haisemwi moja kwa moja kwamba anayeita ni nabii ila neno hilo la Mungu linakuja kwa njia ya mtu ambaye ni kama fumbo. Baadhi ya wafafanuzi wanafikiri yahusu sauti kutoka kwa malaika au wajumbe wa kimbingu au wa mbinguni ambao walikwisha kuweko katika mkutano wa ushauri au halmashauri ya kimungu na hivyo wanaweza kuwasilisha kwa nabii ujumbe ambao itambidi naye kuupeleka kwa niaba ya Mwenyezi-Mungu (rejea 1Fal 22:19-23; Yobu 1:6; 2:1; Isa 6:2). Lakini wengine wanadhani hapa yahusu mtindo wa kimaandishi ambao shabaha yake ni kumweka Mwenyezi-Mungu katika hali yake inayopita mazingira ya binadamu. Hata hivyo jambo muhimu ni kutambua hatua au mwendo wa neno au ujumbe wa Mungu ambao unawafikia walengwa kwa kupitia mtu mmoja hadi hata mwingine (Zab 19:1-4). Maneno “sauti … jangwani” yanatafsiri vilivyo katika tafsiri ya Kigiriki ya Septuajinta (LXX) na kama inavyokaririwa katika Agano Jipya katika Mat 3:3; Marko 1:3; Yoh 1:23.]

“Mtayarishieni Mwenyezi-Mungu njia,

nyosheni barabara kuu kwa ajili ya Mungu wetu.

⁴Kila bonde litasawazishwa,

kila mlima na kilima vitashushwa;

ardhi isiyo sawa itafanywa sawa,

mahali pa kuparuza patalainishwa.

⁵Kisha utukufu wa Mwenyezi-Mungu utafunuliwa,[#40:5 Maana ya kibiblia ni kuonekana kwa uwezo au nguvu na ukuu na utakatifu wake Mungu kuwaokoa watu wake (Kut 33:18-23; Zab 19:1; Isa 6:3; Eze 1:28; 10:4; taz Yoh 1:14 maelezo). “Na watu wote watauona”: Kuokolewa uhamishoni Babuloni kutafanya utukufu na ukuu wake Mungu utambuliwe na watu wote. Rejea Isa 42:8; Yer 2:11.]

na watu wote pamoja watauona.

Mwenyezi-Mungu mwenyewe ametamka hayo.”

⁶Sikiliza! Kuna sauti inasema, “Tangaza!”[#40:6 Taz Isa 40:3 maelezo. Na kuhusu maneno “binadamu wote ni kama majani”, rejea Zab 103:15-16.]

Nami nikauliza, “Nitangaze nini?”

Naye: “Tangaza: binadamu wote ni kama majani;

uthabiti wao ni kama ua la shambani.

⁷Majani hunyauka na ua hufifia,[#40:7 Yobu 14:2.]

Mwenyezi-Mungu avumishapo upepo juu yake.

Hakika binadamu ni kama majani.

⁸Majani hunyauka na ua hufifia,

lakini neno la Mungu wetu ladumu milele.”

⁹Nenda juu ya mlima mrefu,

ewe Siyoni, ukatangaze habari njema.

Paza sauti yako kwa nguvu,

ewe Yerusalemu, ukatangaze habari njema.

paza sauti yako bila kuogopa.

Iambie miji ya Yuda:

“Mungu wenu anakuja.”

¹⁰Bwana Mungu anakuja na nguvu,

kwa mkono wake anatawala.

Zawadi yake iko pamoja naye,

na tuzo lake analo.

¹¹Atalilisha kundi lake kama mchungaji,

atawakusanya wanakondoo mikononi mwake,

atawabeba kifuani pake,

na kondoo wanyonyeshao atawaongoza polepole.

Mungu wa Israeli hana kifani

¹²Nani awezaye kupima maji ya bahari kwa konzi yake,

kuzipima mbingu kwa mikono yake?

Nani awezaye kuutia udongo wa dunia kikombeni;

kuipima milima kwa mizani

au vilima kwa kipimo cha uzani?

¹³Nani awezaye kuiongoza akili ya Mwenyezi-Mungu,

au kuwa mshauri wake na kumfunza?

¹⁴Mwenyezi-Mungu alimtaka nani shauri,

ndipo akapata kuwa mwenye ujuzi?

Nani aliyemfunza njia za haki?

Nani aliyemfundisha maarifa,

na kumwonesha namna ya kuwa na akili?

¹⁵Kwake mataifa ni kama tone la maji katika ndoo,

ni kama vumbi juu ya mizani.

Kwake visiwa ni vyepesi kama vumbi laini.

¹⁶Kuni zote za Lebanoni

na wanyama wake wote

havitoshi kwa sadaka ya kuteketezwa mbele yake.

¹⁷Mataifa yote si kitu mbele yake;

kwake ni vitu duni kabisa na batili.

¹⁸Mtamlinganisha Mungu na nini basi,

au ni kitu gani cha kumfananisha naye?

¹⁹Je, anafanana na kinyago?

Hicho, fundi hukichonga,

mfua dhahabu akakipaka dhahabu,

na kukitengenezea minyororo ya fedha!

²⁰Au ni sanamu ya mti mgumu?

Hiyo ni ukuni mtu anaochagua,

akamtafuta fundi stadi,

naye akamchongea sanamu imara!

²¹Je, nyinyi bado hamjui?

Je, hamjapata kusikia?

Je, hamkuambiwa tangu mwanzo?

Je, hamjafahamu mwanzo wa dunia?

²²Dunia iliumbwa na huyo aketiye juu ya mbingu;

kutoka huko wakazi wa dunia ni kama panzi!

Yeye amezitandaza mbingu kama pazia,

na kuzikunjua kama hema la kuishi.

²³Yeye huwaporomosha wakuu wenye nguvu,

watawala wa dunia huwafanya kuwa si kitu.

²⁴Mara tu wanaposimikwa na kuanza kuota,

hata kabla hawajatoa mizizi kama miti udongoni,

Mwenyezi-Mungu akiwapulizia hunyauka,

kimbunga huwapeperusha kama makapi!

²⁵Mungu Mtakatifu auliza hivi:

“Nani basi, mtakayemlinganisha nami?

Je, kuna mtu aliye kama mimi?”

²⁶Inueni macho yenu juu mbinguni!

Je, ni nani aliyeziumba nyota hizo?

Ni yule aziongozaye kama jeshi lake,

anayeijua idadi yake yote,

aziitaye kila moja kwa jina lake.

Kwa sababu yeye ni mwenye nguvu nyingi,

hakuna hata moja inayokosekana.

²⁷Enyi watu wa Israeli wazawa wa Yakobo,

kwa nini mnalalamika na kusema:

“Mwenyezi-Mungu hatujali sisi!

Mungu wetu hajali haki yetu!”

²⁸Je, nyinyi bado hamjui?

Je, hamjapata kusikia?

Mwenyezi-Mungu ndiye Mungu wa milele;

yeye ndiye Muumba wa kila kitu duniani.

Yeye hafifii kamwe wala kuishiwa nguvu.

Maarifa yake hayachunguziki.

²⁹Yeye huwapa uwezo walio hafifu,

wanyonge huwapa nguvu.

³⁰Hata vijana watafifia na kulegea;

naam, wataanguka kwa uchovu.

³¹Lakini wote wanaomtumainia Mwenyezi-Mungu,[#40:31 Rejea Zab 25:3; 33:20-21; Isa 49:23.]

watapata nguvu mpya.

Watapanda juu kwa mabawa kama tai;

watakimbia bila kuchoka;

watatembea bila kulegea.