Sifa za hekima

¹“Hakika kuna machimbo ya fedha,

na mahali ambako dhahabu husafishwa.

²Watu huchimba chuma ardhini,

huyeyusha shaba kutoka mawe ya madini.

³Wachimba migodi huleta taa gizani,

huchunguza vina vya ardhi

na kuchimbua mawe yenye madini gizani.

⁴Binadamu huchimba mashimo mbali na makazi ya watu,

mbali na watu mahali kusipofikika,

wachimba madini huning'inia wamefungwa kamba.

⁵Kutoka udongoni chakula hupatikana,

lakini chini yake kila kitu huvurugwa kwa moto.

⁶Katika mawe yake ndimo vilimo vito vya rangi ya samawati

na udongo wake una vumbi la dhahabu.

⁷“Njia za kwenda kwenye migodi hiyo

hakuna ndege mla nyama azijuaye;

na wala jicho la tai halijaiona.

⁸Wanyama waendao kwa madaha hawajazikanyaga

wala simba hawajawahi kuzipitia.

⁹Binadamu huchimbua miamba migumu kabisa,

huichimbua milima na kuiondolea mbali.

¹⁰Hupasua mifereji kati ya majabali,

na jicho lake huona vito vya thamani.

¹¹Huziba chemchemi zisitiririke,[#28:11 Tafsiri ya makala ya Kiebrania. Kulingana na tafsiri nyingine za kale ni “Hufunua vianzio.”]

na kufichua vitu vilivyofichika.

¹²“Lakini hekima itapatikana wapi?

Ni mahali gani panapopatikana maarifa?

¹³Hakuna mtu ajuaye thamani ya hekima,

wala hekima haipatikani nchini mwa walio hai.

¹⁴Vilindi vyasema, ‘Hekima haimo kwetu,’

na bahari yasema, ‘Haiko kwangu.’

¹⁵Hekima haiwezi kupatikana kwa dhahabu,

wala kwa kupima kiasi kingi cha fedha.

¹⁶Haiwezi kupimwa kwa dhahabu ya Ofiri,

wala kwa vito vya Sardoniki au vya rangi ya samawati,

¹⁷dhahabu au kioo havilingani nayo,[#28:17 Hapo kale kioo na vitu vilivyotengenezwa nacho vilihesabiwa miongoni mwa vitu vya thamani.]

wala haiwezi kubadilishwa na vito vya dhahabu safi.

¹⁸Hekima ina thamani kuliko matumbawe na marijani,[#28:18 Vitu hivi ni vito vya thamani. Kadhalika na “topazi” katika aya inayofuata.]

thamani yake yashinda thamani ya lulu.

¹⁹Topazi ya Kushi haiwezi kulinganishwa nayo,[#28:19 Eneo la Afrika Kaskazini kuanzia kusini mwa Misri kuelekea sehemu ambayo sasa ni Ethiopia na Eritrea hadi Sudani na hata sehemu ya kaskazini ya Afrika Mashariki.]

wala haiwezi kupewa bei ya dhahabu safi.

²⁰“Basi, hekima yatoka wapi?

Ni wapi panapopatikana maarifa?

²¹Imefichika machoni pa viumbe vyote hai,

na ndege wa angani hawawezi kuiona.

²²Abadoni na Kifo wasema,

‘Tumesikia uvumi wake kwa masikio yetu.’

²³“Mungu aijua njia ya hekima,

anajua mahali inapopatikana.

²⁴Maana yeye huona mpaka upeo wa dunia,

huona kila kitu chini ya mbingu.

²⁵Alipoupa upepo uzito wake,

na kuyapimia maji mipaka yake;

²⁶alipoamua mvua inyeshe wapi,

umeme na radi vipite wapi;

²⁷hapo ndipo alipoiona hekima na kuitangaza,

aliisimika na kuichunguza.”

²⁸Kisha Mungu akamwambia mwanadamu:

“Tazama! Kumcha Bwana ndio hekima;

na kujitenga na uovu ndio maarifa.”