Mfano wa wasichana kumi

¹“Wakati huo, ufalme wa mbinguni utafanana na wasichana kumi waliochukua taa zao, wakaenda kumlaki bwana arusi.

²Watano miongoni mwao walikuwa wapumbavu na watano walikuwa wenye busara.

³Wale wapumbavu walichukua taa zao, lakini hawakuchukua akiba ya mafuta.

⁴Lakini wale wenye busara walichukua mafuta katika chupa pamoja na taa zao.

⁵Kwa kuwa bwana arusi alikawia kuja, wale wasichana wote walisinzia, wakalala.

⁶Usiku wa manane kukawa na kelele: ‘Haya, haya! Bwana arusi anakuja; nendeni kumlaki.’

⁷Hapo wale wasichana wote wakaamka, wakazitayarisha taa zao.

⁸Wale wapumbavu wakawaambia wale wenye busara: ‘Tupeni mafuta yenu kidogo maana taa zetu zinazimika.’

⁹Lakini wale wenye busara wakawaambia, ‘Hayatatutosha sisi na nyinyi! Afadhali mwende dukani mkajinunulie wenyewe!’

¹⁰Basi, wale wasichana wapumbavu walipokwenda kununua mafuta, bwana arusi akafika, na wale wasichana waliokuwa tayari wakaingia pamoja naye katika jumba la harusi, kisha mlango ukafungwa.

¹¹Baadaye wale wasichana wengine wakaja, wakaita: ‘Bwana, Bwana, tufungulie!’

¹²Lakini yeye akawajibu, ‘Nawaambieni kweli, siwajui nyinyi.’”

¹³Kisha Yesu akasema, “Kesheni basi, kwa maana hamjui siku wala saa.

Mfano wa watumishi watatu

¹⁴“Wakati huo itakuwa kama mtu mmoja aliyetaka kusafiri ng'ambo: aliwaita watumishi wake, akawakabidhi mali yake.[#25:14 Mfano wa tatu wenye kuhusu kuja kwake “Mwana wa Mtu” (wa kwanza 24:45-51; wa pili 25:1-13). Huu wa tatu nao pia wafundisha namna ya kuishi sasa tukifikiria ulimwengu mpya ujao.]

¹⁵Alimpa kila mmoja kadiri ya uwezo wake: mmoja fedha talanta tano, mwingine talanta mbili na mwingine talanta moja, kisha akasafiri.[#25:15 Taz 18:24. Talanta moja ilikuwa kiasi cha fedha aliyolipwa kibarua kama angefanya kazi kwa mwaka mmoja. Kama mfano uliotangulia, hapa pia shabaha ya mfano ni kuonesha umuhimu wa jambo la kuwa tayari; lakini pia wazo jingine muhimu linaongezwa hapa: yyaani umuhimu wa “kuzalisha” mali (talanta) alizokabidhiwa mtu.]

¹⁶Mara yule aliyekabidhiwa fedha talanta tano akafanya kazi nazo akapata faida talanta tano.

¹⁷Hali kadhalika na yule aliyekabidhiwa talanta mbili akapata faida talanta mbili.

¹⁸Lakini yule aliyekabidhiwa fedha talanta moja akaenda, akachimba shimo ardhini, akaificha fedha ya bwana wake.

¹⁹“Baada ya muda mrefu, yule bwana alirudi, akaanza kukagua hesabu ya matumizi na mapato ya fedha yake.

²⁰Mtumishi aliyekabidhiwa fedha talanta tano akaja amechukua talanta tano faida, akamwambia, ‘Bwana, ulinikabidhi talanta tano, hapa pana talanta tano zaidi faida niliyopata.’

²¹Bwana wake akamwambia, ‘Vema, mtumishi mwema na mwaminifu. Umekuwa mwaminifu katika mambo madogo, nitakukabidhi makubwa. Njoo ufurahi pamoja na bwana wako.’

²²“Mtumishi aliyekabidhiwa talanta mbili akaja, akatoa talanta mbili faida, akisema, ‘Bwana, ulinikabidhi talanta mbili. Chukua talanta mbili zaidi faida niliyopata.’

²³Bwana wake akamwambia, ‘Vema, mtumishi mwema na mwaminifu. Umekuwa mwaminifu katika mambo madogo, nitakukabidhi makubwa. Njoo ufurahi pamoja na bwana wako.’

²⁴“Lakini yule aliyekabidhiwa fedha talanta moja akaja, akasema, ‘Bwana, najua wewe ni mtu mgumu; wewe huvuna pale ambapo hukupanda, na kukusanya pale ambapo hukutawanya.

²⁵Niliogopa, nikaificha fedha yako katika ardhi. Chukua basi mali yako.’

²⁶“Bwana wake akamwambia, ‘Wewe ni mtumishi mwovu na mvivu! Unajua kuwa mimi huvuna mahali ambapo sikupanda, na hukusanya pale ambapo sikutawanya.

²⁷Ilikupasa basi, kuiweka fedha yangu katika benki, nami ningelichukua mtaji wangu na faida yake!

²⁸Basi, mnyang'anyeni hiyo fedha mkampe yule mwenye talanta kumi.

²⁹Maana, aliye na kitu atapewa na kuzidishiwa. Lakini yule asiye na kitu, hata kile alicho nacho kitachukuliwa.

³⁰Na kuhusu huyu mtumishi asiye na faida, mtupeni nje gizani! Huko kutakuwa na kilio na kusaga meno.’[#25:30 Taz Mat 8:12 maelezo.]

Hukumu ya mwisho

³¹“Wakati Mwana wa Mtu atakapokuja katika utukufu wake na malaika wote wakiwa pamoja naye, hapo ataketi juu ya kiti chake cha enzi kitukufu.[#25:31-46 Sehemu hii ni hatima ya mfululizo wa masimulizi yaliyotangulia, (sura 23—25). Baada ya simulizi hili tutasikia juu ya mateso ya Yesu. Lengo lake ni kuwaita wanafunzi waoneshe imani yao kwa matendo.]

³²Mataifa yote yatakusanyika mbele yake, naye atawatenganisha watu kama mchungaji anavyotenganisha kondoo na mbuzi.[#25:32-33 Eze 34:17-20. Huko Palestina kondoo walifikiriwa kuwa bora kuliko mbuzi.]

³³Atawaweka kondoo upande wake wa kulia na mbuzi upande wake wa kushoto.

³⁴“Kisha Mfalme atawaambia wale walio upande wake wa kulia, ‘Njoni enyi mliobarikiwa na Baba yangu; pokeeni ufalme mliotayarishiwa tangu kuumbwa kwa ulimwengu.[#25:34 Bila shaka wazo la kushiriki furaha hiyo ndilo linalohusika hapa.]

³⁵Maana nilikuwa na njaa nanyi mkanipa chakula; nilikuwa na kiu nanyi mkanipa maji; nilikuwa mgeni nanyi mkanikaribisha;

³⁶nilikuwa uchi, mkanivika; nilikuwa mgonjwa nanyi mkaja kunitazama; nilikuwa gerezani nanyi mkaja kunitembelea.’[#25:36 Matendo ambayo Yesu anayasifu hapa ni matendo ya huruma ambayo yalitajwa pia katika A.K. na mahala pengine katika A.J.: - kuwalisha wenye njaa (Isa 58:6-10; rejea Eze 18:7; 13:3; Yak 1:27; 2:15-16); - ukarimu kwa wageni (10:40-42; Rom 12:13; Kol 4:10; 1Pet 4:9; Ebr 13:2; taz Mat 10:14; Luka 9:53-54); kuwavika wasio na nguo (Luka 3:11; Mate 9:36,39; Yak 2:15-16); kuwatembelea wagonjwa (Luka 10:33-35; 2Tim 1:16-18; Ebr 13:3; Yak 5:14).]

³⁷Hapo, hao watu wema watamjibu mfalme ‘Bwana, ni lini tulikuona mwenye njaa nasi tukakupa chakula, au ukiwa na kiu nasi tukakunywesha maji?

³⁸Ni lini tulikuona ukiwa mgeni nasi tukakukaribisha, au bila nguo nasi tukakuvika?

³⁹Ni lini tulikuona ukiwa mgonjwa au mfungwa nasi tukaja kukutazama?’

⁴⁰Mfalme atawajibu, ‘Kweli nawaambieni, kila kitu mlichomtendea mmojawapo wa hawa ndugu zangu wadogo, mlinitendea mimi.’[#25:40 Ni hao wanaotajwa katika aya ya 42 (ling 10:40-42; 18:5). Ni dhahiri kwamba neno hili linawataja watu wote wenye taabu.]

⁴¹“Kisha atawaambia wale walio upande wake wa kushoto, ‘Ondokeni mbele yangu enyi mliolaaniwa! Nendeni katika moto wa milele aliotayarishiwa Ibilisi na malaika wake.

⁴²Maana nilikuwa na njaa nanyi hamkunipa chakula; nilikuwa na kiu nanyi hamkunipa maji.

⁴³Nilikuwa mgeni nanyi hamkunikaribisha; nilikuwa mgonjwa na mfungwa nanyi hamkuja kunitazama.’

⁴⁴“Hapo nao watajibu, ‘Bwana, ni lini tulikuona ukiwa na njaa au kiu, ukiwa mgeni au bila nguo, ukiwa mgonjwa au mfungwa, nasi hatukukuhudumia?’

⁴⁵Naye atawajibu, ‘Nawaambieni kweli, kila mlipokataa kumtendea mambo haya mmojawapo wa hawa wadogo, mlikataa kunitendea mimi.’

⁴⁶Basi, hawa watakwenda kwenye adhabu ya milele, lakini wale waadilifu watakwenda kwenye uhai wa milele.”