¹Ole wako mji wa mauaji!

Umejaa udanganyifu mtupu na nyara tele,

usiokoma kamwe kuteka nyara.

²Sikia! Mlio wa mjeledi,

mrindimo wa magurudumu,

vishindo vya farasi

na ngurumo za magari!

³Wapandafarasi wanashambulia,

panga na mikuki inametameta;

waliouawa hawana idadi,

maiti wengi sana;

watu wanajikwaa juu ya maiti!

⁴Ninewi! Wewe umekuwa kama malaya.[#3:4 Katika ujumbe wa manabii kwa Waisraeli matumizi ya neno “malaya” n.k. ni ya kimfano kuashiria au kudokeza hali ya kumwacha Mwenyezi-Mungu na kuabudu miungu mingine. Lakini hapa, Ninewi ni kama mshawishi mkubwa ambaye mwishowe huishia kwa kuwafanya hao walioshawishiwa kuwa watumwa wake.]

Umewashawishi watu, ewe binti wa uchawi,

uliyeyafanya mataifa kuwa watumwa kwa umalaya wako,

na watu wa mataifa kwa uchawi wako.

⁵Mimi Mwenyezi-Mungu wa majeshi nasema nitapambana nawe;

nitalipandisha vazi lako hadi kichwani,

niyaache mataifa yauone uchi wako,

tawala ziikodolee macho aibu yako.

⁶Nitakutupia uchafu,[#3:6 Neno la Kiebrania lililotafsiriwa hapa kwa “uchafu” linatumika kwa kawaida kutaja vinyago na mifano mingine ya miungu wa uongo. Taz k.m., Yer 4:1; 16:18; 32:34, ambapo neno hilo limetafsiriwa kwa maneno: “vitu vya kuchukiza”, “miungu ya kuchukiza”, n.k.]

na kukutendea kwa dharau,

na kukufanya uwe kioja kwa watu.

⁷Kisha wote watakaokuona watakukimbia wakisema,

“Ninewi umeangamizwa,

ni nani atakayeuombolezea?

Nani atakayekufariji?”

⁸Je, wewe Ninewi, ni bora kuliko Thebesi,[#3:8 Mji wa kale wa Misri uliokuwa yapata kilomita 670 kusini mwa Kairo; huo ulivamiwa na Waashuru mnamo mwaka 663 K.K. Taz Yer 46:25 maelezo na rejea Eze 30:14-16.]

mji uliojengwa kando ya mto Nili?

Thebesi ulizungukwa na maji,

bahari ilikuwa boma lake,

maji yalikuwa ukuta wake!

⁹Kushi ilikuwa nguvu yake;[#3:9 Eneo kusini mwa Misri. Taz Mwa 10:6-10 maelezo.]

nayo Misri pia, tena bila kikomo;

watu wa Puti na Libia waliusaidia!

¹⁰Hata hivyo, ulichukuliwa mateka,

watu wake wakapelekwa uhamishoni.

Hata watoto wake walipondwapondwa

katika pembe ya kila barabara;

watu wake mashuhuri walinadiwa,

wakuu wake wote walifungwa minyororo.

¹¹Ninewi, nawe pia utalewa;[#3:11 Dokezo kuhusu kuleweshwa kwa kikombe cha ghadhabu ya Mwenyezi-Mungu.]

utamkimbia adui na kujaribu kujificha.

¹²Ngome zako zote ni za tini za mwanzo;

zikitikiswa zinamwangukia mlaji kinywani.

¹³Tazama askari wako:

wao ni waoga kama wanawake.

Milango ya nchi yako ni wazi mbele ya adui zako;

moto umeyateketeza kabisa makomeo yake.

¹⁴Tekeni maji muwe tayari kuzingirwa;

imarisheni ngome zenu.

Pondeni udongo kwa kuukanyagakanyaga,

tayarisheni tanuri ya kuchomea matofali!

¹⁵Lakini huko pia moto utawateketezeni,

upanga utawakatilia mbali;

utawamaliza kama nzige walavyo.

Ongezekeni kama nzige,

naam, ongezekeni kama panzi!

¹⁶Wafanyabiashara wako waliongezeka kuliko nyota;

lakini sasa wametoweka kama panzi warukavyo.

¹⁷Wakuu wako ni kama panzi,

maofisa wako kama kundi la nzige;

wakati wa baridi wanakaa kwenye kuta,

lakini jua lichomozapo, huruka,

wala hakuna ajuaye walikokwenda.

¹⁸Ewe mfalme wa Ashuru, wachungaji wako wamelala,

waheshimiwa wako wamesinzia.

Watu wako wametawanyika milimani,

wala hakuna yeyote wa kuwakusanya.

¹⁹Hakuna wa kuyapa nafuu majeraha yako,

vidonda vyako ni vya kifo.

Wote wanaosikia habari zako wanashangilia.

Maana ni nani aliyeuepa ukatili wako usio na kikomo?