Sala kwa ajili ya Israeli

¹Utuhurumie ee Bwana Mungu wa wote.

²Yafanye mataifa yote yakuogope.

³Inua mkono wako dhidi ya mataifa mengine,

uyafanye yauone uwezo wako mkuu.

⁴Kama ulivyotutumia kuyaonesha jinsi ulivyo mtakatifu,

vivyo hivyo yatumie kutuonesha utukufu wako.

⁵Nayo yatajua kama tunavyojua na sisi,

kwamba hakuna Mungu ila wewe, ee Bwana.

⁶Fanya tena ishara na kufanya miujiza zaidi,

⁷ufanye mkono wako uwe na utukufu zaidi.

⁸Onesha hasira yako na kumwaga ghadhabu yako;

⁹waangamize wapinzani na kuwafuta maadui.

¹⁰Iharakishe ile siku na kukumbuka kiapo chako;

wafanye watu wasimulie matendo yako makuu.

¹¹Yeyote atakayeponyoka ateketezwe na ghadhabu yako kali,

na wale wanaowadhuru watu wako wapate maangamizi.

¹²Uwaponde wakuu wa maadui zako,

ambao husema: “Hakuna mwingine ila sisi wenyewe!”

¹³Yakusanye pamoja makabila yote ya Yakobo,[#36:13 Kutokana na vurugu katika tafsiri ya Kigiriki ya kitabu hiki aya 14 na 15 hazitumiwi katika sura hii ya 36. Lakini hakuna maneno yaliyokosekana.]

¹⁶uwape mali yako kama ulivyopanga mwanzoni.

¹⁷Wahurumie ee Bwana watu wanaoitwa kwa jina lako;

Waisraeli uliowaita mzaliwa wako wa kwanza wa kiume.

¹⁸Uuonee huruma mji wa hekalu lako,

Yerusalemu, mji wa pumziko lako.

¹⁹Uujaze mji wa Siyoni shangwe za matendo yako ya ajabu,

na hekalu lako lijae utukufu wako.

²⁰Uwahakiki watu wako uliowaumba mwanzoni,

na kutimiza unabii uliosemwa kwa jina lako.

²¹Uwatuze wale wanaokungojea,

na manabii wako waonekane kuwa ni wa kuaminika.

²²Usikilize, ee Bwana, sala ya watumishi wako,

kulingana na baraka za Aroni juu ya watu wako.

Hivyo binadamu wote duniani watajua

kuwa wewe ndiwe Bwana, Mungu wa nyakati zote.

Kuchagua mke

²³Chakula chochote chaweza kuliwa,

lakini chakula kingine ni bora kuliko kingine.

²⁴Kama ulimi upimavyo mionjo ya aina ya vyakula,

ndivyo na mwenye akili agunduavyo maneno ya uongo.

²⁵Mwenye akili potovu atasababisha huzuni,

lakini mwenye uzoefu wa maisha atamlipa inavyofaa.

²⁶Mwanamke aweza kuolewa na yeyote,

lakini msichana mmoja ni bora kuliko mwingine.

²⁷Uzuri wa mwanamke hufurahisha uso,

na hushinda kila kitu anachotamani mwanamume.

²⁸Kama mwanamke ni mwema na mwenye adabu anapoongea,

mumewe ana bahati kuliko wengine wote.

²⁹Mwanamume akipata mke amepata ubora mkubwa mno,

amejipatia msaidizi bora na nguzo ya msaada.

³⁰Mali isiyolindwa kwa ukuta itaporwa;

ni pasipo mke, mwanamume atatangatanga na kusononeka.

³¹Nani atakayemwamini jambazi azururaye mji hata mji?

Hivyo hakuna atakayemwamini mwanamume asiye na kwake,

ambaye ana malazi popote usiku unapomkuta.