¹Wimbo wa Solomoni ulio bora kuliko nyimbo zote.[#1:1 Au, “kwa heshima ya Solomoni”; au “juu ya Solomoni”. Kadiri ya 1Fal 4:32 Solomoni alitunga methali 3000, na zaidi ya nyimbo au tenzi 1000. Katika wimbo huu jina Solomoni linatokea tena katika 1:5; 3:7,9,11; 8:11,12.]

Shairi la kwanza

²Heri midomo yako inibusu,

maana pendo lako ni bora kuliko divai.

³Manukato yako yanukia vizuri,

na jina lako ni kama marashi yaliyomiminwa.

Kwa hiyo wanawake hukupenda!

⁴Nichukue, twende zetu haraka,

mfalme amenileta katika chumba chake.

Tutafurahi na kushangilia kwa sababu yako,

tutasifu mapenzi yako kuliko divai.

Wanawake wana haki kukupenda!

⁵Enyi wanawake wa Yerusalemu,[#1:5 Neno kwa neno: “binti wa Yerusalemu”. Hawa wanatajwa mara kwa mara katika sehemu ya tenzi ambapo wanayo nafasi yao katika muundo wa wimbo huo (1:5; 2:7; 3:5,11; 5:8,16; 8:4).]

mimi ni mweusi na ninapendeza,

kama mahema ya Kedari,

kama mapazia ya Solomoni.

⁶Msinishangae kwa sababu ni mweusi,

maana jua limenichoma.

Ndugu zangu walinikasirikia,

wakanifanya mlinzi wa mashamba ya mizabibu.

Lakini sikutunza shamba langu la mizabibu.

⁷Hebu niambie ee wangu wa moyo,

utawalisha wapi kondoo wako?

Ni wapi watakapopumzikia adhuhuri?

Kwa nini mimi nikutafute

kati ya makundi ya wenzako?

⁸Ewe upendezaye kuliko wanawake wote;

kama hujui, fanya hivi:

zifuate nyayo za kondoo;

basi, walishe mbuzi wako karibu na hema za wachungaji.

⁹Wewe ee mpenzi wangu,

nakulinganisha na farasi dume wa magari ya Farao.

¹⁰Mashavu yako yavutia kwa vipuli,

na shingo yako kwa mikufu ya johari.

¹¹Lakini tutakufanyizia mikufu ya dhahabu,

iliyopambwa barabara kwa fedha.

¹²Mfalme alipokuwa kwenye kochi lake,

marashi yangu ya nardo yalisambaa kila mahali.

¹³Mpenzi wangu ni kama mfuko wa manemane kwangu,

kati ya matiti yangu.

¹⁴Mpenzi wangu ni kama maua ya hina yachanuayo,

kwenye mashamba ya mizabibu huko Engedi.

¹⁵Hakika u mzuri, ee mpenzi wangu,

hakika u mzuri!

Macho yako ni kama ya hua!

¹⁶Hakika u mzuri ewe nikupendaye,

u mzuri kweli!

Majani mabichi yatakuwa kitanda chetu;

¹⁷mierezi itakuwa nguzo za nyumba yetu,

na miberoshi itakuwa dari yake.