Maagizo ya mwisho

¹Nakuagiza mbele za Mungu na mbele za Kristo Yesu, atakayewahukumu watu walio hai na waliokufa wakati wa kuja kwake na ufalme wake, kwamba:

²Hubiri Neno; kuwa tayari wakati ufaao na wakati usiofaa; karipia, kemea na utie moyo kwa uvumilivu wote na kwa mafundisho mazuri.

³Maana wakati utakuja watu watakapokataa kuyakubali mafundisho yenye uzima. Badala yake, ili kutimiza tamaa zao wenyewe, watajikusanyia idadi kubwa ya walimu watakaowaambia yale masikio yao yanatamani kusikia.

⁴Watakataa kusikiliza kweli na kuzigeukia hadithi za uongo.

⁵Bali wewe, vumilia mateso, fanya kazi ya mhubiri wa Injili, timiza wajibu wote wa huduma yako.

⁶Kwa maana mimi sasa ni tayari kumiminwa kama sadaka ya kinywaji, nayo saa yangu ya kuondoka imetimia.

⁷Nimevipiga vita vizuri, mashindano nimeyamaliza, imani nimeilinda.

⁸Sasa nimewekewa taji la haki ambalo Bwana, Mwamuzi wa haki, atanitunukia siku ile: wala si mimi tu, bali pia wote ambao wamengoja kwa shauku kudhihirishwa kwake.

Maelekezo ya binafsi

⁹Jitahidi kuja kwangu upesi

¹⁰kwa sababu Dema, kwa kuupenda ulimwengu, ameniacha na ameenda Thesalonike. Kreske ameenda Galatia, na Tito ameenda Dalmatia.

¹¹Ni Luka pekee aliye hapa nami. Mtafute Marko uje naye, kwa sababu ananifaa sana katika huduma yangu.

¹²Nimemtuma Tikiko huko Efeso.

¹³Utakapokuja, niletee lile joho nililoliacha kwa Karpo huko Troa, na vile vitabu vyangu, hasa vile vya ngozi.

¹⁴Iskanda yule mfua chuma alinitendea ubaya mkubwa. Bwana atamlipa kwa ajili ya yale aliyotenda.

¹⁵Wewe pia ujihadhari naye kwa sababu aliyapinga maneno yetu vikali.

¹⁶Katika utetezi wangu wa mara ya kwanza, hakuna hata mmoja aliyeniunga mkono, bali kila mmoja aliniacha. Naomba wasihesabiwe hatia kwa jambo hilo.

¹⁷Lakini Bwana alisimama upande wangu akanitia nguvu, ili kupitia kwangu lile Neno lihubiriwe kwa ukamilifu, watu wote Mataifa wapate kulisikia. Mimi niliokolewa kutoka kinywa cha simba.

¹⁸Bwana ataniokoa katika kila shambulio baya na kunileta salama katika ufalme wake wa mbinguni. Atukuzwe milele na milele. Amen.

Salamu za mwisho

¹⁹Wasalimu Prisila na Akila, na wote wa nyumbani mwa Onesiforo.[#4:19 kwa Kiyunani ni Priska]

²⁰Erasto alibaki Korintho, nami nikamwacha Trofimo huko Mileto akiwa mgonjwa.

²¹Jitahidi ufike huku kabla ya majira ya baridi.

Eubulo anakusalimu, vivyo hivyo Pude, Lino, Klaudia na ndugu wote.

²²Bwana awe pamoja na roho yako. Neema iwe pamoja nanyi.