Kanuni za kuishi maisha matakatifu

¹Basi, kwa kuwa mmefufuliwa pamoja na Kristo, yatafuteni yaliyo juu, Kristo alikoketi mkono wa kuume wa Mungu.

²Yafikirini mambo yaliyo juu, wala si ya duniani.

³Kwa maana ninyi mlikufa, nao uhai wenu sasa umefichwa pamoja na Kristo katika Mungu.

⁴Kristo, aliye uzima wenu, atakapofunuliwa, ndipo nanyi mtafunuliwa pamoja naye katika utukufu.

⁵Basi, ueni kabisa chochote kilicho ndani yenu cha asili ya kidunia: yaani uasherati, uchafu, tamaa mbaya, mawazo mabaya na ulafi, ambao ni ibada ya sanamu.

⁶Kwa sababu ya mambo haya, ghadhabu ya Mungu inakuja.

⁷Ninyi pia zamani mlienenda katika mambo haya mlipoishi maisha hayo.

⁸Lakini sasa yawekeni mbali nanyi mambo kama haya yote: yaani hasira, ghadhabu, uovu, masingizio na lugha chafu kutoka midomoni mwenu.

⁹Msiambiane uongo, kwa maana mmevua kabisa utu wenu wa kale pamoja na matendo yake,

¹⁰nanyi mmevaa utu mpya, unaofanywa upya katika ufahamu sawasawa na mfano wa Muumba wake.

¹¹Hapa hakuna Myunani wala Myahudi, aliyetahiriwa wala asiyetahiriwa, asiyestaarabika wala aliyestaarabika, mtumwa wala mtu huru, bali Kristo ni yote, na ndani ya yote.

¹²Basi, kwa kuwa ninyi mmekuwa wateule wa Mungu, watakatifu wanaopendwa sana, jivikeni moyo wa huruma, utu wema, unyenyekevu, upole na uvumilivu.

¹³Vumilianeni na kusameheana mtu akiwa na lalamiko lolote dhidi ya mwenzake. Sameheaneni kama vile Bwana alivyowasamehe ninyi.

¹⁴Zaidi ya maadili haya yote jivikeni upendo, ambao ndio unaofunga kila kitu pamoja katika umoja mkamilifu.

¹⁵Amani ya Kristo na itawale mioyoni mwenu, kwa kuwa ninyi kama viungo vya mwili mmoja mmeitiwa amani. Tena kuweni watu wa shukrani.

¹⁶Neno la Kristo na likae kwa wingi ndani yenu, mkifundishana na kuonyana katika hekima yote, mkimwimbia Mungu zaburi, nyimbo na tenzi za rohoni, huku mkiwa na shukrani mioyoni mwenu.

¹⁷Lolote mfanyalo, ikiwa ni kwa neno au kwa tendo, fanyeni yote katika jina la Bwana Yesu, mkimshukuru Mungu Baba kupitia kwake.

Kanuni katika madaraka ya nyumbani

¹⁸Ninyi wake, watiini waume zenu, kama inavyostahili katika Bwana.

¹⁹Ninyi waume, wapendeni wake zenu, wala msiwe wakali kwao.

²⁰Enyi watoto, watiini wazazi wenu katika mambo yote, kwa maana hii inampendeza Bwana.

²¹Ninyi akina baba, msiwachokoze watoto wenu, wasije wakakata tamaa.

²²Ninyi watumwa, watiini mabwana zenu wa hapa duniani katika mambo yote. Fanyeni hivyo si wakiwepo tu, wala si kwa kujipendekeza tu kwao, bali kwa moyo mnyofu na kumcha Bwana.

²³Lolote mfanyalo, fanyeni kwa moyo wote kama watu wanaomtumikia Bwana, na si wanadamu,

²⁴kwa kuwa mnajua kwamba mtapokea urithi wenu kutoka kwa Bwana ukiwa thawabu yenu. Ni Bwana Yesu Kristo mnayemtumikia.

²⁵Yeyote atendaye mabaya atapewa adhabu ya mabaya yake, wala hakuna upendeleo.