Wimbo wa Debora

¹Siku hiyo Debora na Baraka mwana wa Abinoamu wakaimba wimbo huu:

²“Wakuu katika Israeli wanapoongoza,

wakati watu wanapojitoa

kwa hiari yao wenyewe:

mhimidini Bwana !

³“Sikieni hili, enyi wafalme!

Sikilizeni, enyi watawala!

Nitamwimbia Bwana , nitaimba;

kwa wimbo nitamhimidi Bwana ,

Mungu wa Israeli.

⁴“Ee Bwana , ulipotoka katika Seiri,

ulipopita katika mashamba ya Edomu,

nchi ilitetemeka, mbingu nazo zikamwaga,

naam, mawingu yakamwaga maji.

⁵Milima ilitetemeka mbele za Bwana , Yule wa Sinai,

mbele za Bwana , Mungu wa Israeli.

⁶“Katika siku za Shamgari mwana wa Anathi,

katika siku za Yaeli,

barabara kuu hazikuwa na watu;

wasafiri walipita njia za kando.

⁷Mashujaa walikoma katika Israeli,

walikoma hadi mimi, Debora, nilipoinuka,

nilipoinuka kama mama katika Israeli.

⁸Mungu alichagua viongozi wapya

vita vilipokuja malangoni ya mji;

lakini hapakuonekana ngao wala mkuki

miongoni mwa watu elfu arobaini katika Israeli.

⁹Moyo wangu u pamoja na wakuu wa Israeli,

u pamoja na wale wanaojitoa kwa hiari yao

miongoni mwa watu.

Mhimidini Bwana !

¹⁰“Ninyi mpandao punda weupe,

mkiketi juu ya matandiko ya thamani,

nanyi mnaotembea barabarani,

fikirini

¹¹kuhusu sauti za waimbaji

mahali pa kunyweshea maji.

Wanasimulia matendo ya haki ya Bwana ,

matendo ya haki ya mashujaa wake

katika Israeli.

“Ndipo watu wa Bwana

walipoteremka malangoni pa mji.

¹²‘Amka, amka! Debora!

Amka, amka, uimbe!

Ee Baraka! Inuka,

chukua mateka wako uliowateka,

ee mwana wa Abinoamu.’

¹³“Ndipo mabaki ya watu

wakashuka dhidi ya wakuu,

watu wa Bwana wakashuka kwangu

dhidi ya wenye nguvu.

¹⁴Baadhi yao walitoka Efraimu,

ambao chimbuko lao ni Amaleki;

Benyamini alikuwa miongoni

mwa watu waliokufuata.

Kutoka Makiri wakashuka viongozi,

na kutoka Zabuloni wale washikao

fimbo ya jemadari.

¹⁵Wakuu wa Isakari walikuwa pamoja na Debora;

naam, Isakari alikuwa pamoja na Baraka,

wakija nyuma yake kwa mbio

wakielekea bondeni.

Katika jamaa za Reubeni,

palikuwa na kujihoji kukubwa moyoni.

¹⁶Kwa nini ulikaa katikati ya mazizi ya kondoo

kusikiliza sauti ya filimbi zinazoita makundi?

Kwa jamaa za Reubeni,

palikuwa na kujihoji kukubwa moyoni.

¹⁷Gileadi alikaa ngʼambo ya Yordani.

Naye Dani, kwa nini alikaa

kwenye merikebu siku nyingi?

Asheri alikaa kwa utulivu ufuoni mwa bahari,

akikaa kwenye ghuba zake ndogo.

¹⁸Watu wa Zabuloni walihatarisha maisha yao,

vilevile nao watu wa Naftali.

¹⁹“Wafalme walikuja na kufanya vita;

wafalme wa Kanaani walipigana

huko Taanaki, karibu na maji ya Megido,

lakini hawakuchukua nyara za fedha.

²⁰Kutoka mbinguni nyota zilipigana,

nyota kutoka njia zake

zilipigana na Sisera.

²¹Mto wa Kishoni uliwasomba,

ule mto wa zamani, mto wa Kishoni.

Songa mbele, ee nafsi yangu,

kwa ujasiri!

²²Ndipo kwato za farasi zikafanya mshindo:

farasi wake wenye nguvu

huenda mbio kwa kurukaruka.

²³Malaika wa Bwana akasema, ‘Laani Merozi.

Laani watu wake kwa uchungu,

kwa kuwa hawakuja kumsaidia Bwana ,

kumsaidia Bwana dhidi ya hao wenye nguvu.’

²⁴“Yaeli abarikiwe kuliko wanawake wote,

mkewe Heberi, Mkeni,

abarikiwe kuliko wanawake wote

wanaoishi kwenye mahema.

²⁵Sisera alimwomba maji, naye akampa maziwa;

kwenye bakuli la heshima

akamletea maziwa mgando.

²⁶Akanyoosha mkono wake

akashika kigingi cha hema,

mkono wake wa kuume

ukashika nyundo ya fundi.

Akampiga Sisera kwa nyundo,

akamponda kichwa chake,

akamvunjavunja na kumtoboa

paji lake la uso.

²⁷Aliinama miguuni pa Yaeli,

akaanguka; akalala hapo.

Alipoinama miguuni pake,

alianguka;

pale alipoinamia, ndipo alipoanguka,

akiwa amekufa.

²⁸“Kupitia dirishani mamaye Sisera alichungulia;

nyuma ya dirisha alilia, akasema,

‘Mbona gari lake la vita linachelewa kufika?

Mbona vishindo vya magari yake ya vita

vimechelewa?’

²⁹Wajakazi wale wenye busara

kuliko wengine wote wanamjibu;

naam, naye anasema moyoni mwake,

³⁰‘Je, hawapati na kugawanya nyara:

msichana mmoja au wawili kwa kila mtu,

mavazi ya rangi mbalimbali kwa Sisera kuwa nyara,

mavazi ya rangi mbalimbali yaliyotariziwa,

mavazi yaliyotariziwa vizuri kwa ajili ya shingo yangu:

haya yote yakiwa nyara?’

³¹“Adui zako wote na waangamie hivyo, Ee Bwana !

Bali wote wanaokupenda na wawe kama jua

linavyochomoza kwa nguvu zake.”

Hivyo nchi ikawa na amani kwa miaka arobaini.