Ujumbe kuhusu Wafilisti

¹Hili ndilo neno la Bwana lililomjia nabii Yeremia kuhusu Wafilisti, kabla Farao hajaishambulia Gaza:

²Hili ndilo asemalo Bwana :

“Tazama jinsi maji yanavyoinuka huko kaskazini,

yatakuwa mafuriko yenye nguvu sana.

Yataifurikia nchi na vitu vyote vilivyo ndani yake,

miji na wanaoishi ndani yake.

Watu watapiga kelele;

wote wanaoishi katika nchi wataomboleza

³kwa sauti ya kwato za farasi wanaoenda mbio,

kwa sauti ya magari ya vita ya adui,

na mngurumo wa magurudumu yake.

Baba hawatageuka kuwasaidia watoto wao,

mikono yao italegea.

⁴Kwa maana siku imewadia

kuwaangamiza Wafilisti wote

na kuwakatilia mbali walionusurika wote

ambao wangeweza kusaidia Tiro na Sidoni.

Bwana anakaribia kuwaangamiza Wafilisti,

mabaki toka pwani za Kaftori.

⁵Gaza atanyoa kichwa chake katika kuomboleza,

Ashkeloni atanyamazishwa.

Enyi mabaki kwenye tambarare,

mtajikatakata wenyewe hadi lini?

⁶“Mnalia, ‘Aa, upanga wa Bwana ,

utaendelea hadi lini ndipo upumzike?

Rudi ndani ya ala yako;

acha na utulie.’

⁷Lakini upanga utatuliaje

wakati Bwana ameuamuru,

wakati ameuagiza kuishambulia Ashkeloni

pamoja na pwani yake?”