Ujumbe kuhusu Moabu

¹Kuhusu Moabu:

Hili ndilo Bwana wa majeshi, Mungu wa Israeli, asemalo:

“Ole wake Nebo, kwa maana utaharibiwa.

Kiriathaimu utaaibishwa na kutekwa;

Misgabu itaaibishwa na kuvunjavunjwa.

²Moabu haitasifiwa tena;

huko Heshboni watu watapanga jinsi ya kumwangusha:

‘Njooni na tuliangamize taifa lile.’

Wewe nawe, ee Madmena, utanyamazishwa;

upanga utakufuatia.

³Sikiliza kilio kutoka Horonaimu,

kilio cha maangamizi makuu na uharibifu.

⁴Moabu utavunjwa,

wadogo wake watapiga kelele.

⁵Wanapanda kwenda njia ya kuelekea Luhithi,

wakilia kwa uchungu wanapotembea,

kwenye njia inayoshuka kwenda Horonaimu,

kilio cha uchungu kwa ajili ya uharibifu kinasikika.

⁶Kimbieni! Okoeni maisha yenu,

kuweni kama kichaka jangwani.

⁷Kwa kuwa mmetumainia matendo yenu na mali yenu,

ninyi pia mtachukuliwa mateka,

naye Kemoshi ataenda uhamishoni,

pamoja na makuhani wake na maafisa wake.

⁸Mwangamizi atakuja dhidi ya kila mji,

wala hakuna mji utakaookoka.

Bonde litaangamizwa na uwanda utaharibiwa,

kwa sababu Bwana amesema.

⁹Wekeni chumvi kwa ajili ya Moabu,

kwa kuwa ataangamizwa;

miji yake itakuwa ukiwa,

hakutakuwa na mtu atakayeishi ndani yake.

¹⁰“Alaaniwe yeye afanyaye kazi ya Bwana kwa ulegevu!

Alaaniwe yeye auzuiaye upanga wake usimwage damu!

¹¹“Moabu amestarehe tangu ujana wake,

kama divai iliyoachwa kwenye machujo yake,

haikumiminwa kutoka chombo kimoja hadi kingine,

hajaenda uhamishoni.

Kwa hiyo ana ladha ile ile kama aliyokuwa nayo,

nayo harufu yake haijabadilika.

¹²Lakini siku zinakuja,”

asema Bwana ,

“nitakapotuma watu wamiminao kutoka magudulia,

nao watamimina;

wataacha magudulia yake yakiwa matupu

na kuvunja mitungi yake.

¹³Kisha Moabu atamwonea aibu Kemoshi,

kama vile nyumba ya Israeli walivyoona aibu

walipotegemea Betheli.

¹⁴“Mwawezaje kusema, ‘Sisi ni mashujaa,

watu hodari katika vita’?

¹⁵Moabu ataangamizwa na miji yake itavamiwa,

vijana wake wa kiume walio bora sana watachinjwa,”

asema Mfalme, ambaye jina lake

ni Bwana wa majeshi.

¹⁶“Kuanguka kwa Moabu kumekaribia,

janga kubwa litamjia kwa haraka.

¹⁷Ombolezeni kwa ajili yake, ninyi nyote mnaomzunguka,

ninyi nyote mnaojua sifa zake,

semeni, ‘Tazama jinsi ilivyovunjika

fimbo ya kifalme yenye nguvu,

tazama jinsi ilivyovunjika

fimbo iliyotukuka!’

¹⁸“Shuka kutoka fahari yako

uketi katika ardhi iliyokauka,

enyi wenyeji wa Binti Diboni,

kwa maana yeye aangamizaye Moabu

atakuja dhidi yako,

na kuangamiza miji yako yenye ngome.

¹⁹Simama kando ya barabara na utazame,

wewe unayeishi Aroeri.

Muulize mwanaume anayekimbia

na mwanamke anayetoroka,

waulize, ‘Kumetokea nini?’

²⁰Moabu amefedheheshwa, kwa kuwa amevunjavunjwa.

Lieni kwa huzuni na kupiga kelele!

Tangazeni kando ya Mto Arnoni

kwamba Moabu ameangamizwa.

²¹Hukumu imefika kwenye uwanda wa juu:

katika Holoni, Yahasa na Mefaathi,

²²katika Diboni, Nebo

na Beth-Diblathaimu,

²³katika Kiriathaimu, Beth-Gamuli

na Beth-Meoni,

²⁴katika Keriothi na Bosra;

kwa miji yote ya Moabu,

iliyo mbali na karibu.

²⁵Pembe ya Moabu imekatwa,[#48:25 pembe inawakilisha nguvu]

mkono wake umevunjwa,”

asema Bwana .

²⁶“Mleweshe,

kwa kuwa amemdharau Bwana .

Moabu atagaagaa katika matapishi yake,

awe kichekesho.

²⁷Je, Israeli hakuwa kitu chako cha kudhihakiwa?

Je, alikamatwa miongoni mwa wezi,

kiasi cha kutikisa kichwa chako kwa dharau

kila mara unapozungumza juu yake?

²⁸Ondokeni miji yenu, mkaishi katikati ya miamba,

enyi mnaoishi Moabu.

Kuweni kama njiwa ambaye hutengeneza kiota chake

kwenye mlango wa pango.

²⁹“Tumesikia kuhusu kiburi cha Moabu:

kutakabari kwake kwa kiburi na majivuno,

kiburi chake na ufidhuli wake,

na kujivuna kwa moyo wake.

³⁰Ninaujua ujeuri wake, lakini ni bure,”

asema Bwana ,

“nako kujisifu kwake hakumsaidii chochote.

³¹Kwa hiyo namlilia Moabu,

kwa ajili ya Moabu yote ninalia,

ninaomboleza kwa ajili

ya watu wa Kir-Haresethi.

³²Ninalia machozi kwa ajili yenu, kama Yazeri aliavyo,

enyi mizabibu ya Sibma.

Matawi yako yameenea hadi baharini;

yamefika hadi bahari ya Yazeri.

Mwangamizi ameyaangukia

matunda yako yaliyoiva

na mizabibu yako iliyoiva.

³³Shangwe na furaha vimetoweka

kutoka bustani na mashamba ya Moabu.

Nimekomesha kutiririka kwa divai kutoka mashinikizo;

hakuna hata mmoja ayakanyagaye kwa kelele za shangwe.

Ingawa kuna kelele,

sio kelele za shangwe.

³⁴“Sauti ya kilio chao inapanda

kutoka Heshboni hadi Eleale na Yahazi,

kutoka Soari hadi Horonaimu na Eglath-Shelishiya,

kwa kuwa hata maji ya Nimrimu yamekauka.

³⁵Nitakomesha wote katika Moabu

watoao sadaka mahali pa juu pa kuabudia,

na kufukiza uvumba kwa miungu yao,”

asema Bwana .

³⁶“Kwa hiyo moyo wangu unaomboleza kwa ajili ya Moabu kama filimbi;

unaomboleza kama filimbi kwa ajili ya watu wa Kir-Haresethi.

Utajiri waliojipatia umetoweka.

³⁷Kila kichwa kimenyolewa

na kila mwenye ndevu zimekatwa;

kila mkono umekatwa

na kila kiuno kimevalishwa gunia.

³⁸Juu ya mapaa yote katika Moabu

na katika viwanja

hakuna kitu isipokuwa maombolezo,

kwa kuwa nimemvunja Moabu

kama gudulia lisilotakiwa na mtu yeyote,”

asema Bwana .

³⁹“Tazama jinsi alivyovunjikavunjika!

Jinsi wanavyolia kwa huzuni!

Tazama jinsi Moabu anavyogeuka kwa aibu!

Moabu amekuwa kitu cha kudhihakiwa,

kitu cha kutisha kwa wale wote

wanaomzunguka.”

⁴⁰Hili ndilo asemalo Bwana :

“Tazama! Tai anashuka chini,

akitanda mabawa yake juu ya Moabu.

⁴¹Miji itatekwa na ngome zake

zitatwaliwa.

Katika siku hiyo, mioyo ya mashujaa wa Moabu

itakuwa kama moyo wa mwanamke katika uchungu wa kuzaa.

⁴²Moabu ataangamizwa kama taifa

kwa sababu amemdharau Bwana .

⁴³Hofu kuu, shimo na mtego vinawangojea,

enyi watu wa Moabu,”

asema Bwana .

⁴⁴“Yeyote atakayeikimbia hiyo hofu kuu

ataanguka ndani ya shimo,

yeyote atakayepanda kutoka shimoni,

atanaswa katika mtego,

kwa sababu nitailetea Moabu

mwaka wa adhabu yake,”

asema Bwana .

⁴⁵“Katika kivuli cha Heshboni,

wakimbizi wamesimama pasipo msaada,

kwa kuwa moto umezimika huko Heshboni,

Mwali wa moto kutoka katikati ya Sihoni;

unaunguza paji za nyuso za Wamoabu,

mafuvu ya wanaojivuna kwa kelele.

⁴⁶Ole wako, ee Moabu!

Watu wa Kemoshi wameangamizwa;

watoto wako wa kiume wamepelekwa uhamishoni,

na binti zako wamechukuliwa mateka.

⁴⁷“Lakini nitarudisha mateka wa Moabu,

katika siku zijazo,”

asema Bwana .

Huu ndio mwisho wa hukumu ya Moabu.