Ayubu anajibu: Mimi ni mtu wa kuchekwa

¹Ndipo Ayubu akajibu:

²“Bila shaka ninyi ndio watu,

nayo hekima itakoma mtakapokufa!

³Lakini mimi ninao ufahamu kama ninyi;

mimi si duni kwenu.

Ni nani asiyejua mambo haya yote?

⁴“Nimekuwa mtu wa kuchekwa na rafiki zangu,

ingawa nilimwita Mungu naye akanijibu:

mimi ni mtu wa kuchekwa tu,

ingawa ni mwadilifu na nisiye na hatia!

⁵Wanadamu wakiwa katika utulivu huwa na dharau kwa wale wenye msiba

kana kwamba ndiyo haki ya wale ambao miguu yao inateleza.

⁶Mahema ya wanyangʼanyi hayasumbuliwi,

wale wanaomghadhibisha Mungu wako salama:

wale wamchukuao mungu wao mikononi mwao.

⁷“Lakini ulizeni wanyama, nao watawafundisha,

au ndege wa angani, nao watawaambia;

⁸au zungumzeni na dunia, nayo itawafundisha,

au acheni samaki wa baharini wawape taarifa.

⁹Ni nani miongoni mwa hawa wote asiyejua

kwamba mkono wa Bwana ndio uliofanya hili?

¹⁰Mkononi mwake kuna uhai wa kila kiumbe,

na pumzi ya wanadamu wote.

¹¹Je, sikio haliyajaribu maneno

kama vile ulimi uonjavyo chakula?

¹²Je, hekima haipatikani kwa wazee?

Je, maisha marefu hayaleti ufahamu?

¹³“Hekima na nguvu ni vya Mungu;

shauri na ufahamu ni vyake yeye.

¹⁴Kile anachokibomoa hakiwezi kujengeka tena;

mtu aliyefungiwa naye hawezi kufunguliwa.

¹⁵Akizuia maji, huwa pana ukame;

akiyaachia maji, huharibu nchi.

¹⁶Kwake kuna nguvu na ushindi;

anayedanganywa na anayedanganya, wote wawili ni wake.

¹⁷Yeye huwaondoa washauri wakiwa wametekwa nyara,

naye huwapumbaza wanaotoa maamuzi.

¹⁸Huondoa pingu zilizofungwa na wafalme,

na kuwafunga mishipi ya kiunoni.

¹⁹Huwaondoa makuhani wakiwa wametekwa nyara,

na kuwaangusha waliojiimarisha muda mrefu.

²⁰Hunyamazisha midomo ya washauri wanaoaminika,

na kuondoa busara ya wazee.

²¹Huwadharau wanaoheshimika,

na kuwavua silaha wenye nguvu.

²²Hufunua mambo ya ndani ya gizani,

na kuyaleta nuruni yale yaliyositirika sana.

²³Huyafanya mataifa yatukuke na kuyaangamiza;

hufanya mataifa kuwa makubwa, naye huyatawanya.

²⁴Huwaondolea viongozi wa nchi akili zao;

huwapeleka watangetange nyikani pasipo na njia.

²⁵Hupapasa gizani pasipokuwa na mwanga;

huwafanya wapepesuke kama walevi.