Bildadi anasema: Mungu huwaadhibu waovu

¹Bildadi Mshuhi akajibu:

²“Je, ni lini utafika mwisho wa maneno haya?

Uwe mwenye busara, nasi ndipo tutakapoweza kuongea.

³Kwa nini sisi tunafikiriwa kama wanyama,

na kuonekana wajinga machoni pako?

⁴Wewe unayejirarua mwenyewe vipande vipande

katika hasira yako,

je, dunia iachwe kwa ajili yako wewe?

Au ni lazima miamba iondolewe mahali pake?

⁵“Taa ya mwovu imezimwa,

nao mwali wa moto wake umezimika.

⁶Mwanga kwenye hema lake umekuwa giza;

taa iliyo karibu naye imezimika.

⁷Nguvu za hatua zake zimedhoofishwa;

hila zake mwenyewe zinamwangusha.

⁸Miguu yake imemsukumia kwenye wavu,

naye anatangatanga kwenye matundu ya wavu.

⁹Tanzi litamkamata kwenye kisigino;

mtego utamshikilia kwa nguvu.

¹⁰Kitanzi kimefichwa ardhini kwa ajili yake;

mtego uko kwenye njia yake.

¹¹Vitisho vimemtia hofu kila upande,

na adui zake humwandama kila hatua.

¹²Janga linamwonea shauku;

maafa yako tayari kwa ajili yake aangukapo.

¹³Nayo yatakula sehemu ya ngozi yake;

mzaliwa wa kwanza wa mauti atakula maungo yake.

¹⁴Atangʼolewa kutoka usalama wa hema lake,

na kupelekwa kwa mfalme wa vitisho.

¹⁵Moto utakaa katika hema lake;

moto wa kiberiti utamwagwa juu ya makao yake.

¹⁶Mizizi yake chini itakauka

na matawi yake juu yatanyauka.

¹⁷Kumbukumbu lake litatoweka katika dunia,

wala hatakuwa na jina katika nchi.

¹⁸Ameondolewa nuruni na kusukumiwa gizani,

naye amefukuzwa mbali atoke duniani.

¹⁹Hana mtoto wala mzao miongoni mwa watu wake,

wala aliyenusurika mahali alipoishi.

²⁰Watu wa magharibi watashangaa yaliyompata;

watu wa mashariki watapatwa na hofu.

²¹Hakika ndivyo yalivyo makao ya mtu mwovu;

ndivyo palivyo mahali pake mtu asiyemjua Mungu.”