Ayubu anajibu: Malalamiko yangu ni ya haki

¹Kisha Ayubu akajibu:

²“Laiti uchungu wangu ungeweza kupimwa,

nayo taabu yangu yote ingewekwa kwenye mizani!

³Kwa kuwa hakika ingekuwa nzito kuliko mchanga wa bahari zote,

kwa hiyo si ajabu maneno yangu yamekuwa ya haraka.

⁴Mishale ya Mwenyezi iko ndani yangu,

roho yangu inakunywa sumu yake;

vitisho vya Mungu vimejipanga dhidi yangu.

⁵Je, punda-mwitu hulia akiwa na majani,

au fahali hulia akiwa na chakula?

⁶Je, chakula kisicho na ladha huliwa bila chumvi,

au upo utamu katika ute mweupe wa yai?

⁷Ninakataa kuvigusa;

vyakula vya aina hii hunichukiza.

⁸“Laiti ningepata haja yangu,

kwamba Mungu angenijalia hilo nililotarajia,

⁹kwamba Mungu angekuwa radhi kuniponda,

kuuachia mkono wake na kunikatilia mbali!

¹⁰Ndipo bado ningekuwa na hii faraja,

furaha yangu katika maumivu makali:

kwamba sikuwa nimeyakana maneno yake yeye Aliye Mtakatifu.

¹¹“Nina nguvu gani, hata niendelee kutumaini?

Matazamio yangu ni nini,

hata niendelee kuwa mvumilivu?

¹²Je, mimi nina nguvu za jiwe?

Je, mwili wangu ni shaba?

¹³Je, ninao uwezo wowote wa kujisaidia mimi mwenyewe,

wakati mafanikio yamefukuziwa mbali nami?

¹⁴“Mtu anayekata tamaa angetazamia moyo wa kujitoa wa rafiki zake,

hata akiacha uchaji wa Mwenyezi.

¹⁵Lakini ndugu zangu sio wa kutegemewa,

ni kama vijito vya msimu,

ni kama vijito ambavyo hufurika

¹⁶wakati vimefunikwa barafu iyeyukayo,

ambavyo hujazwa na theluji inayoyeyuka,

¹⁷lakini hukauka majira ya ukame,

na wakati wa hari hutoweka katika mikondo yake.

¹⁸Misafara hugeuka kutoka njia zake;

hukwea kwenda kwenye nchi ya ukiwa na kuangamia.

¹⁹Misafara ya Tema inatafuta maji,

wafanyabiashara wa Sheba wanaosafiri

hutazama kwa matarajio.

²⁰Wamedhikika, kwa sababu walikuwa na matumaini;

wanafika huko, lakini wanahuzunika

kwa kukosa walichotarajia.

²¹Sasa nanyi mmethibitika

kwamba hamna msaada wowote;

mnaona jambo la kutisha,

nanyi mnaogopa.

²²Je, nimewahi kusema, ‘Toeni kitu kwa ajili yangu,

au mnilipie fidia kutoka mali yenu,

²³au niokoeni mikononi mwa adui,

au nikomboeni kutoka makucha ya wasio na huruma’?

²⁴“Nifundisheni, nami nitakaa kimya;

nionesheni nilikokosea.

²⁵Tazama yalivyo ya kuumiza maneno ya kweli!

Lakini mabishano yenu yanathibitisha nini?

²⁶Je, mna maana ya kuyasahihisha ninayosema,

na kuyafanya maneno ya mtu anayekata tamaa kama upepo?

²⁷Mngeweza hata kupiga kura kwa ajili ya yatima,

na kubadilishana rafiki yenu na mali.

²⁸“Lakini sasa kuweni na huruma mkaniangalie mimi.

Je, ningeweza kusema uongo mbele zenu?

²⁹Tulizeni hasira, msiwe wadhalimu;

angalieni tena, kwa maana nimehatarisha uadilifu wangu.

³⁰Je, pana uovu wowote mdomoni mwangu?

Je, kinywa changu hakiwezi kupambanua hila?