Mataifa yahukumiwa

¹“Katika siku hizo na wakati huo,

nitakaporejesha neema ya Yuda na Yerusalemu,

²nitayakusanya mataifa yote na kuyaleta

katika Bonde la Yehoshafati.

Hapo nitaingia kwenye hukumu dhidi yao

kuhusu urithi wangu, watu wangu Israeli,

kwa kuwa waliwatawanya watu wangu

miongoni mwa mataifa

na kuigawa nchi yangu.

³Waliwapigia kura watu wangu

na kuwauza wavulana ili kupata makahaba;

waliwauza wasichana

ili wapate kunywa mvinyo.

⁴“Sasa una nini dhidi yangu, ee Tiro na Sidoni, nanyi nchi zote za Ufilisti? Je, mnanilipiza kwa yale niliyoyafanya? Kama mnalipa, mimi nitalipiza juu ya vichwa vyenu kwa kasi na kwa haraka yale mliyoyatenda.

⁵Kwa kuwa mlichukua fedha na dhahabu yangu pia mkabeba hazina zangu nzuri sana mkapeleka kwenye mahekalu yenu.

⁶Mliwauza watu wa Yuda na Yerusalemu kwa Wayunani, ili mpate kuwapeleka mbali na nchi yao.

⁷“Tazama nitawaamsha kutoka zile sehemu mlizowauza, nami nitawalipiza juu ya vichwa vyenu kile mlichofanya.

⁸Nitawauza wana wenu wa kiume na wa kike kwa watu wa Yuda, nao watawauza kwa Waseba, taifa lililo mbali.” Bwana amesema.

⁹Tangazeni hili miongoni mwa mataifa:

Jiandaeni kwa vita!

Amsha mashujaa!

Wapiganaji wote wasogee karibu na kushambulia.

¹⁰Majembe yenu yafueni yawe panga,

na miundu yenu ya kukatia iwe mikuki.

Aliye dhaifu na aseme,

“Mimi nina nguvu!”

¹¹Njooni haraka, ninyi mataifa yote kutoka pande zote,

kusanyikeni huko.

Shusha mashujaa wako, Ee Bwana !

¹²“Mataifa na yaamshwe;

na yasonge mbele kuelekea Bonde la Yehoshafati,

kwa kuwa nitaketi mahali pale

kuhukumu mataifa yote yaliyo kila upande.

¹³Tia mundu,

kwa kuwa mavuno yamekomaa.

Njooni, mkanyage zabibu,

kwa kuwa shinikizo la kukamulia zabibu limejaa

na mapipa yanafurika:

kwa kuwa uovu wao ni mkubwa!”

¹⁴Umati mkubwa, umati mkubwa

katika bonde la uamuzi!

Kwa kuwa siku ya Bwana ni karibu

katika bonde la uamuzi.

¹⁵Jua na mwezi vitatiwa giza,

na nyota hazitatoa mwanga wake tena.

¹⁶Bwana atanguruma kutoka Sayuni

na mshindo wa ngurumo kutoka Yerusalemu;

dunia na mbingu vitatikisika.

Lakini Bwana atakuwa kimbilio la watu wake,

ngome imara kwa ajili ya watu wa Israeli.

Baraka kwa watu wa Mungu

¹⁷“Ndipo mtajua kuwa Mimi, Bwana Mungu wenu,

nakaa Sayuni, mlima wangu mtakatifu.

Yerusalemu utakuwa mtakatifu;

kamwe wageni hawatauvamia tena.

¹⁸“Katika siku hiyo milima itadondosha divai mpya,

na vilima vitatiririka maziwa;

mabonde yote ya Yuda yatatiririka maji.

Chemchemi itatiririka kutoka nyumba ya Bwana

na kunywesha Bonde la Shitimu.

¹⁹Lakini Misri itakuwa ukiwa,

Edomu itakuwa jangwa tupu,

kwa sababu ya jeuri waliofanya kwa watu wa Yuda,

ambao katika nchi yao

walimwaga damu isiyo na hatia.

²⁰Yuda itakaliwa na watu milele

na Yerusalemu itadumu vizazi vyote.

²¹Hatia yao ya damu, ambayo sijasamehe,

nitasamehe.”