Yesu ajaribiwa nyikani

¹Yesu, akiwa amejaa Roho Mtakatifu, akarudi kutoka Yordani. Akaongozwa na Roho Mtakatifu hadi nyikani,

²ambako alijaribiwa na ibilisi kwa siku arobaini. Kwa siku zote hizo hakula chochote, hivyo baada ya muda huo akaona njaa.

³Ibilisi akamwambia, “Ikiwa wewe ni Mwana wa Mungu, amuru jiwe hili liwe mkate.”

⁴Yesu akamjibu, “Imeandikwa: ‘Mtu haishi kwa mkate tu.’”[#4:4 Kum 8:3]

⁵Ibilisi akampeleka hadi juu ya mlima mrefu akamwonesha milki zote za dunia kwa mara moja.

⁶Akamwambia, “Nitakupa mamlaka juu ya milki hizi na fahari zake zote, kwa maana zimekabidhiwa mkononi mwangu nami ninaweza kumpa yeyote ninayetaka.

⁷Hivyo ukinisujudia na kuniabudu, vyote vitakuwa vyako.”

⁸Yesu akamjibu, “Imeandikwa: ‘Mwabudu Bwana Mungu wako na umtumikie yeye peke yake.’”[#4:8 Kum 6:13]

⁹Kisha ibilisi akampeleka hadi Yerusalemu, akamweka juu ya mnara mrefu wa Hekalu, akamwambia, “Kama wewe ndiwe Mwana wa Mungu, jitupe chini kutoka hapa,

¹⁰kwa maana imeandikwa:

“ ‘Atakuagizia malaika wake

ili wakulinde kwa uangalifu;

¹¹nao watakuchukua mikononi mwao,

usije ukajikwaa mguu wako katika jiwe.’”

¹²Yesu akamjibu, “Imenenwa: ‘Usimjaribu Bwana Mungu wako.’”[#4:12 Kum 6:16]

¹³Ibilisi alipomaliza kila jaribu, akamwacha Yesu hadi wakati mwingine ufaao.

Huduma ya Yesu huko Galilaya

Yesu aanza kuhubiri

¹⁴Kisha Yesu akarudi hadi Galilaya, akiwa amejaa nguvu za Roho Mtakatifu, nazo habari zake zikaenea katika sehemu zote za nchi za kandokando.

¹⁵Akaanza kufundisha kwenye masinagogi yao, na kila mmoja akamsifu.

Yesu akataliwa Nazareti

¹⁶Yesu akaenda Nazareti, alipolelewa, na siku ya Sabato alienda katika sinagogi kama ilivyokuwa desturi yake. Akasimama ili asome,

¹⁷naye akapewa kitabu cha nabii Isaya, akakifungua na kukuta mahali palipoandikwa:

¹⁸“Roho wa Bwana yu juu yangu,

kwa sababu amenipaka mafuta

kuwahubiria maskini Habari Njema.

Amenituma kuwatangazia wafungwa

kufunguliwa kwao,

na vipofu kupata kuona tena,

kuwaweka huru wanaoteswa,

¹⁹na kutangaza mwaka wa Bwana uliokubalika.”[#4:19 Isa 61:1, 2]

²⁰Kisha akakifunga kitabu, akamrudishia mtumishi na akaketi. Watu wote waliokuwamo katika sinagogi wakamkazia macho.

²¹Ndipo akaanza kwa kuwaambia, “Leo andiko hili limetimia mkiwa mnasikia.”

²²Watu wote walimsifu na kuyastaajabia maneno yake yaliyojaa neema, wakaulizana, “Je, huyu si mwana wa Yusufu?”

²³Yesu akawaambia, “Bila shaka mtatumia mithali hii: ‘Tabibu, jiponye mwenyewe! Mambo yale tuliyosikia kwamba uliyafanya huko Kapernaumu, yafanye na hapa kwenye mji wako.’ ”

²⁴Yesu akasema, “Amin, nawaambia, hakuna nabii anayekubalika katika mji wake mwenyewe.

²⁵Lakini ukweli ni kwamba palikuwa na wajane wengi katika Israeli wakati wa Eliya, mbingu zilipofungwa kwa miaka mitatu na miezi sita pakawa na njaa kuu katika nchi nzima.

²⁶Hata hivyo Eliya hakutumwa hata kwa mmoja wao, bali kwa mjane mmoja wa Sarepta katika nchi ya Sidoni.

²⁷Pia palikuwa na wengi wenye ukoma katika Israeli katika siku za nabii Elisha, lakini hakuna hata mmoja wao aliyetakaswa, isipokuwa Naamani mtu wa Shamu.”[#4:27 yaani Siria]

²⁸Watu wote katika sinagogi waliposikia maneno haya, wakakasirika sana.

²⁹Wakasimama, wakamtoa nje ya mji, wakamchukua hadi kwenye kilele cha mlima ambao mji huo ulikuwa umejengwa juu yake, ili wamtupe chini kutoka mteremko mkali.

³⁰Lakini yeye akapita papo hapo katikati ya umati huo wa watu akaenda zake.

Yesu atoa pepo mchafu

³¹Kisha Yesu akashuka kwenda Kapernaumu, mji wa Galilaya, na katika siku ya Sabato akawa anafundisha.

³²Wakashangazwa sana na mafundisho yake, maana maneno yake yalikuwa na mamlaka.

³³Ndani ya sinagogi palikuwa na mtu aliyekuwa amepagawa na pepo mchafu. Naye akapaza sauti kwa nguvu akisema,

³⁴“Tuache! Tuna nini nawe, Yesu wa Nazareti? Je, umekuja kutuangamiza? Ninakujua wewe ni nani. Wewe ndiwe Aliye Mtakatifu wa Mungu!”

³⁵Basi Yesu akamkemea yule pepo mchafu, akamwamuru, “Nyamaza! Mtoke mtu huyu!” Yule pepo mchafu akamwangusha yule mtu chini mbele yao wote, akatoka pasipo kumdhuru.

³⁶Watu wote wakashangaa, wakaambiana, “Mafundisho haya ni ya namna gani? Anawaamuru pepo wachafu kwa mamlaka na nguvu, nao wanatoka!”

³⁷Habari zake zikaanza kuenea kila mahali katika sehemu ile.

Yesu amponya mama mkwe wa Simoni na pia watu wengi

³⁸Yesu akatoka katika sinagogi, akaenda nyumbani mwa Simoni. Basi huko alimkuta mama mkwe wa Simoni akiwa ameshikwa na homa kali, nao wakamwomba Yesu amsaidie.

³⁹Hivyo Yesu akamwinamia na kukemea ile homa, nayo ikamwacha. Akaamka mara moja, naye akaanza kuwahudumia.

⁴⁰Jua lilipokuwa linatua, watu wakamletea Yesu watu wote waliokuwa na maradhi mbalimbali, naye akaweka mikono yake juu ya kila mgonjwa, naye akawaponya.

⁴¹Pepo wachafu pia wakawatoka watu wengi, nao walipokuwa wakitoka wakapiga kelele, wakisema: “Wewe ni Mwana wa Mungu!” Lakini Yesu akawakemea na kuwazuia wasiseme, kwa maana walimjua kuwa yeye ndiye Kristo.[#4:41 maana yake Masiya , yaani Aliyetiwa mafuta.]

⁴²Kesho yake, kulipopambazuka, Yesu alienda mahali pa faragha. Watu wengi wakawa wanamtafuta kila mahali, nao walipomwona wakajaribu kumzuia asiondoke.

⁴³Lakini yeye akawaambia, “Imenipasa kuhubiri Habari Njema ya ufalme wa Mungu katika miji mingine pia, kwa maana kwa kusudi hili nilitumwa.”

⁴⁴Naye aliendelea kuhubiri katika masinagogi ya Yudea.