¹Mvinyo ni mdhihaki na kileo ni mgomvi;

yeyote apotoshwaye navyo hana hekima.

²Ghadhabu ya mfalme ni kama ngurumo ya simba;

yeye amkasirishaye hupoteza uhai wake.

³Ni kwa heshima ya mtu kujitenga ugomvi,

bali kila mpumbavu ni mwepesi kugombana.

⁴Mvivu halimi kwa majira;

kwa hiyo wakati wa mavuno hutazama

lakini hapati chochote.

⁵Makusudi ya moyo wa mwanadamu ni maji yenye kina,

lakini mtu mwenye ufahamu huyachota.

⁶Watu wengi hujidai kuwa na upendo usiokoma,

bali mtu mwaminifu ni nani awezaye kumpata?

⁷Mtu mwenye haki huishi maisha yasiyo na lawama,

wamebarikiwa watoto wake baada yake.

⁸Mfalme anapoketi kwenye kiti chake cha ufalme kuhukumu,

hupepeta ubaya wote kwa macho yake.

⁹Ni nani awezaye kusema, “Nimeuweka moyo wangu safi;

mimi ni safi na sina dhambi?”

¹⁰Mawe ya kupimia yaliyo tofauti na vipimo tofauti,

Bwana huchukia vyote viwili.

¹¹Hata mtoto hujulikana kwa matendo yake,

kama tabia yake ni safi na adili.

¹²Masikio yasikiayo na macho yaonayo:

Bwana ndiye alivifanya vyote viwili.

¹³Usiupende usingizi la sivyo utakuwa maskini,

uwe macho nawe utakuwa na chakula cha akiba.

¹⁴“Haifai, haifai!” asema mnunuzi,

kisha huondoka akijisifia ununuzi wake.

¹⁵Kuna dhahabu, na marijani kwa wingi,

lakini midomo inayonena maarifa

ni kito cha thamani.

¹⁶Chukua vazi la yule awekaye dhamana

kwa ajili ya mgeni;

lishikilie liwe dhamana

kwa ajili ya mgeni.

¹⁷Chakula kilichopatikana kwa hila ni kitamu kwa mwanadamu,

bali huishia na kinywa kilichojaa changarawe.

¹⁸Fanya mipango kwa kutafuta mashauri,

ukipigana vita, tafuta maelekezo.

¹⁹Maneno ya kusengenya husababisha kutokuaminika,

kwa hiyo mwepuke mtu anayezungumza kupita kiasi.

²⁰Ikiwa mtu atamlaani baba yake au mama yake,

taa yake itazimwa katika giza nene.

²¹Urithi upatikanao haraka mwanzoni,

hautabarikiwa mwishoni.

²²Usiseme, “Nitakulipiza kwa ajili ya kosa hili!”

Mngojee Bwana , naye atakuokoa.

²³Bwana anachukia sana mawe ya kupimia ya udanganyifu,

nazo mizani zisizo halali hazimpendezi.

²⁴Hatua za mtu huongozwa na Bwana .

Anawezaje basi mtu yeyote kuelewa njia yake mwenyewe?

²⁵Ni mtego kwa mtu kuweka wakfu kitu kwa haraka

na baada ya kitambo kidogo kufikiria tena nadhiri zake.

²⁶Mfalme mwenye hekima hupepeta waovu,

hulipitisha gurudumu la kupuria juu yao.

²⁷Taa ya Bwana huchunguza roho ya mwanadamu,

huchunguza utu wake wa ndani.

²⁸Upendo na uaminifu humweka mfalme salama;

kiti chake cha ufalme huwa salama kwa upendo.

²⁹Utukufu wa vijana ni nguvu zao,

mvi ni fahari ya uzee.

³⁰Mapigo na majeraha huusafisha ubaya,

nayo michapo hutakasa utu wa ndani.