Misemo ya Mfalme Lemueli

¹Misemo ya Mfalme Lemueli, usia wa mama yake aliyomfundisha:

²“Sikiliza, ee mwanangu! Sikiliza, ee mwana wa tumbo langu!

Sikiliza, ee mwana wa nadhiri zangu!

³Usitumie nguvu zako kwa wanawake,

uhodari wako kwa wale wanaowaharibu wafalme.

⁴“Ee Lemueli, haifai wafalme,

haifai wafalme kunywa mvinyo,

haifai watawala kutamani sana kileo,

⁵wasije wakanywa na kusahau vile sheria inavyoamuru

na kuwanyima haki zao wote waliodhulumiwa.

⁶Wape kileo wale wanaoangamia,

mvinyo wale walio na uchungu,

⁷Wanywe na kusahau umaskini wao

na wasikumbuke taabu yao tena.

⁸“Sema kwa ajili ya wale wasioweza kujisemea,

kwa ajili ya haki za wote walioachwa ukiwa.

⁹Sema na uamue kwa haki,

tetea haki za maskini na wahitaji.”

Maneno ya mwisho: Mke mwenye sifa nzuri

¹⁰Mke mwenye sifa nzuri, ni nani awezaye kumpata?[#31:10 imetungwa kila mstari ukianzia na herufi ya alfabeti ya Kiebrania zikifuatana tangu Aleph (A) hadi Taw (T); zote ni 22.]

Yeye ni wa thamani sana kuliko marijani.

¹¹Mume wake anamwamini kikamilifu,

wala hakosi kitu chochote cha thamani.

¹²Humtendea mumewe mema, wala si mabaya,

siku zote za maisha yake.

¹³Huchagua sufu na kitani,

naye hufanya kazi kwa mikono yenye bidii.

¹⁴Yeye ni kama meli za biashara,

akileta chakula chake kutoka mbali.

¹⁵Yeye huamka kukiwa bado giza,

naye huwapa jamaa yake chakula

na wajakazi wake mafungu yao.

¹⁶Huangalia shamba na kulinunua;

kutokana na mapato yake hupanda shamba la mizabibu.

¹⁷Hufanya kazi zake kwa nguvu,

mikono yake ina nguvu kwa ajili ya kazi zake.

¹⁸Huona kwamba biashara yake ina faida,

wala taa yake haizimiki usiku.

¹⁹Huweka mikono yake kwenye pia,

navyo vidole vyake hushikilia kijiti chenye uzi.

²⁰Huwanyooshea maskini mikono yake

na kuwakunjulia wahitaji vitanga vyake.

²¹Theluji inaposhuka, hana hofu

kwa ajili ya watu wa nyumbani mwake,

kwa maana wote wamevikwa

nguo za kutia joto.

²²Yeye hutengeneza mazulia ya urembo

ya kufunika kitanda chake,

huvaa kitani safi na urujuani.

²³Mume wake anaheshimiwa kwenye lango la mji,

aketipo miongoni mwa wazee wa nchi.

²⁴Hutengeneza mavazi ya kitani na kuyauza,

naye huwauzia wafanyabiashara mishipi.

²⁵Amevikwa nguvu na heshima,

anaweza kucheka bila kuwa na hofu kwa siku zijazo.

²⁶Huzungumza kwa hekima,

na mafundisho ya kuaminika yapo ulimini mwake.

²⁷Huangalia mambo ya nyumbani mwake

wala hali chakula cha uvivu.

²⁸Watoto wake huamka na kumwita aliyebarikiwa,

mumewe pia humsifu, akisema:

²⁹“Wanawake wengi hufanya vitu vyenye sifa nzuri,

lakini wewe umewapita wote.”

³⁰Kujipamba ili kuvutia ni udanganyifu,

na uzuri unapita upesi;

bali mwanamke anayemcha Bwana atasifiwa.

³¹Mpe thawabu anayostahili,

nazo kazi zake na zimletee sifa kwenye lango la mji.