Kitabu cha Tano

Zaburi 107

Kumsifu Mwenyezi Mungu kwa wema wake

¹Mshukuruni Mwenyezi Mungu, kwa kuwa yeye ni mwema,

fadhili zake zadumu milele.

²Waliokombolewa wa Mwenyezi Mungu na waseme hivi,

wale aliowaokoa kutoka mkono wa adui,

³wale aliowakusanya kutoka nchi mbalimbali,

kutoka mashariki na magharibi,

kutoka kaskazini na kusini.

⁴Baadhi yao walitangatanga jangwani,

hawakuona njia ya kuwafikisha mji ambao wangeweza kuishi.

⁵Walikuwa na njaa na kiu,

nafsi zao zikadhoofika.

⁶Ndipo walipomlilia Mwenyezi Mungu katika shida yao,

naye akawaokoa kutoka taabu yao.

⁷Akawaongoza kwa njia iliyo sawa

hadi mji ambao wangeweza kuishi.

⁸Basi na wamshukuru Mwenyezi Mungu kwa upendo wake usiokoma,

na kwa matendo yake ya ajabu kwa wanadamu,

⁹kwa maana yeye humtosheleza mwenye kiu,

na kumshibisha mwenye njaa kwa vitu vyema.

¹⁰Wengine walikaa gizani na katika huzuni kuu,

wafungwa wakiteseka katika minyororo,

¹¹kwa sababu waliasi dhidi ya maneno ya Mungu,

na kudharau ushauri wa Aliye Juu Sana.

¹²Aliwatumikisha kwa kazi ngumu;

walijikwaa na hapakuwa na mtu wa kuwasaidia.

¹³Ndipo walipomlilia Mwenyezi Mungu katika shida yao,

naye akawaokoa kutoka taabu yao.

¹⁴Akawatoa katika giza na huzuni kuu

na akavunja minyororo yao.

¹⁵Basi na wamshukuru Mwenyezi Mungu kwa upendo wake usiokoma,

na kwa matendo yake ya ajabu kwa wanadamu,

¹⁶kwa kuwa yeye huvunja malango ya shaba

na kukata mapingo ya chuma.

¹⁷Wengine wakawa wapumbavu kutokana na uasi wao,

wakapata mateso kwa sababu ya uovu wao.

¹⁸Wakachukia kabisa vyakula vyote,

wakakaribia malango ya mauti.

¹⁹Ndipo walipomlilia Mwenyezi Mungu katika shida yao,

naye akawaokoa kutoka taabu yao.

²⁰Akalituma neno lake na kuwaponya,

akawaokoa kutoka maangamizi yao.

²¹Basi na wamshukuru Mwenyezi Mungu kwa upendo wake usiokoma,

na kwa matendo yake ya ajabu kwa wanadamu.

²²Na watoe dhabihu za kushukuru,

na wasimulie matendo yake kwa nyimbo za furaha.

²³Wengine walisafiri baharini kwa meli,

walikuwa wafanyabiashara kwenye maji makuu.

²⁴Waliziona kazi za Mwenyezi Mungu,

matendo yake ya ajabu kilindini.

²⁵Kwa maana alisema na kuamsha tufani

iliyoinua mawimbi juu.

²⁶Yakainuka juu mbinguni, yakashuka chini hadi vilindini;

katika hatari hii ujasiri wao uliyeyuka.

²⁷Walipepesuka na kuyumbayumba kama walevi,

ujanja wao ukafikia ukomo.

²⁸Ndipo walipomlilia Mwenyezi Mungu katika shida yao,

naye akawatoa kwenye taabu yao.

²⁹Akatuliza dhoruba kwa mnong’ono,

mawimbi ya bahari yakatulia.

³⁰Walifurahi ilipokuwa shwari,

naye akawaongoza hadi bandari waliyoitamani.

³¹Basi na wamshukuru Mwenyezi Mungu kwa upendo wake usiokoma,

na kwa matendo yake ya ajabu kwa wanadamu.

³²Na wamtukuze yeye katika kusanyiko la watu,

na wamsifu katika baraza la wazee.

³³Yeye aligeuza mito kuwa jangwa,

chemchemi za maji zinazotiririka kuwa ardhi yenye kiu,

³⁴nchi inayozaa ikawa ya chumvi isiyofaa,

kwa sababu ya uovu wa wale walioishi humo.

³⁵Aligeuza jangwa likawa madimbwi ya maji,

nayo ardhi kame kuwa chemchemi za maji zinazotiririka;

³⁶aliwaleta wenye njaa wakaishi humo,

nao wakajenga mji wangeweza kuishi.

³⁷Walilima mashamba na kupanda mizabibu,

nayo ikazaa matunda mengi,

³⁸Mungu aliwabariki, hesabu yao ikaongezeka sana,

wala hakuruhusu mifugo yao kupungua.

³⁹Kisha hesabu yao ilipungua, na walinyenyekeshwa

kwa kuonewa, maafa na huzuni.

⁴⁰Yeye ambaye huwamwagia dharau wakuu,

aliwafanya watangetange nyikani isiyo na njia.

⁴¹Lakini yeye aliwainua wahitaji katika taabu zao,

na kuongeza jamaa zao kama makundi ya kondoo.

⁴²Wanyofu wataona na kufurahi,

lakini waovu wote watafunga vinywa vyao.

⁴³Yeyote aliye na hekima, ayasikie mambo haya,

na atafakari upendo mkuu wa Mwenyezi Mungu.