Zaburi 121

Mwenyezi Mungu mlinzi wetu

¹Nayainua macho yangu natazama milima:

msaada wangu utatoka wapi?

²Msaada wangu hutoka kwa Mwenyezi Mungu,

Muumba wa mbingu na dunia.

³Hatauacha mguu wako uteleze,

yeye akulindaye hatasinzia,

⁴hakika, yeye alindaye Israeli

hatasinzia wala hatalala usingizi.

⁵Mwenyezi Mungu anakulinda,

Mwenyezi Mungu ni uvuli wako mkono wako wa kuume,

⁶jua halitakudhuru mchana,

wala mwezi wakati wa usiku.

⁷Mwenyezi Mungu atakukinga na madhara yote,

atayalinda maisha yako,

⁸Mwenyezi Mungu atakulinda unapoingia na unapotoka,

tangu sasa na hata milele.