Zaburi 129

Maombi dhidi ya adui za Israeli

¹Wamenitesa sana tangu ujana wangu;

Israeli na aseme sasa:

²wamenitesa sana tangu ujana wangu,

lakini bado hawajanishinda.

³Wakulima wamelima mgongo wangu,

na kufanya mifereji yao mirefu.

⁴Lakini Mwenyezi Mungu ni mwenye haki;

amenifungua toka kamba za waovu.

⁵Wale wote wanaoichukia Sayuni

na warudishwe nyuma kwa aibu.

⁶Wawe kama majani juu ya paa,

ambayo hunyauka kabla hayajakua;

⁷kwa hayo mvunaji hawezi kujaza vitanga vyake,

wala akusanyaye kujaza mikono yake.

⁸Wale wapitao karibu na wasiseme,

“Baraka ya Mwenyezi Mungu iwe juu yako;

tunakubariki katika jina la Mwenyezi Mungu.”