Zaburi 19

Utukufu wa Mungu katika uumbaji

¹Mbingu zinatangaza utukufu wa Mungu,

anga zahubiri kazi ya mikono yake.

²Siku baada ya siku zinatoa habari,

usiku baada ya usiku zinatangaza maarifa.

³Hakuna msemo wala lugha,

ambapo sauti zao hazisikiki.

⁴Sauti yao imeenea duniani pote,

nayo maneno yao yameenea

hadi miisho ya ulimwengu.

Katika mbingu amepiga hema kwa ajili ya jua,

⁵linafanana na bwana arusi

akitoka chumbani mwake,

kama shujaa anavyofurahia

kukamilisha kushindana kwake.

⁶Huchomoza upande mmoja wa mbingu,

na kufanya mzunguko wake

hadi upande mwingine.

Hakuna kilichojificha joto lake.

⁷Sheria ya Bwana ni kamilifu,

ikihuisha nafsi.

Shuhuda za Bwana ni za kuaminika,

zikimpa mjinga hekima.

⁸Maagizo ya Bwana ni kamili,

nayo hufurahisha moyo.

Amri za Bwana huangaza,

zatia nuru machoni.

⁹Kumcha Bwana ni utakatifu,

nako kwadumu milele.

Amri za Bwana ni za hakika,

nazo zina haki.

¹⁰Ni za thamani kuliko dhahabu,

kuliko dhahabu iliyo safi sana,

ni tamu kuliko asali,

kuliko asali kutoka sega.

¹¹Kwa hizo mtumishi wako anaonywa,

katika kuzishika kuna thawabu kubwa.

¹²Ni nani awezaye kutambua makosa yake?

Nisamehe makosa yangu nisiyoyajua.

¹³Mlinde mtumishi wako na dhambi za makusudi,

nazo zisinitawale.

Ndipo nitakapokuwa sina lawama,

niwe huru na hatia kubwa.

¹⁴Maneno ya kinywa changu

na mawazo ya moyo wangu,

yapate kibali mbele zako, Ee Bwana ,

Mwamba wangu na Mkombozi wangu.